Sosnovii Bor (lidn, Leningradan agj)

Sosnovii Bor
Сосновый Бор
Lidnanznam;	Flag;
Valdkund	Venäma
Eläjiden lugu (2016)	67,602 ristitud
Pind	71,98 km²
Pämez'	Dmitrii Puläjevskii; (2009—)
Telefonkod	+7−81 369-xx-xxx
Avtokod	47
Aigvö	UTC+3 (MSK+0)

Sosnovii Bor (ven.: Сосновый Бор) om Venäman lidn da lidnümbrik Leningradan agjan päivlaskmas. Vspäi 2006 se om üks'jäine alištui agjan tobmudele oikti lidn.

Istorii[redaktiruida | redaktiruida purde]

Eländpunktan aluz om pandud vl 1958 kuti radnikžilo atomtegimišton täht Lomonosovan rajonas. Vozil 1967−1973 Leningradan AES:an ezmäine energoblok om saudud, vodele 1981 — jäl'gmäine, nellänz' lugul. Vl 1973 sulakun 19. päiväl radnikžilo tegihe lidnaks agjan alištusenke. Vl 1974 sidä ühtištuihe lähižen Ustjan küläkundan eländpunktoidenke. Lidnümbrik om olmas nügüdläižiš röunoiš vspäi 2006.

Vspäi 1993 lidnan territorii om Venäman röunma, se om sauptud verhiden maiden rahvahanikoiden tulendad vaste eriližeta laskendbumagata.

Geografijan andmused[redaktiruida | redaktiruida purde]

Lidn sijadase Suomen lahten suvirandal (Koporjen laht), 20 m valdmeren pindan päl keskkorktusel. Matkad Piterin röunhasai om 35 kilometrad päivnouzmha orhal (Lomonosov-lidn), Piterin keskushesai — 80 km.

Kovaši-jogi lankteb Suomen lahthe lidnan südäimes.

Sosnovii Bor-lidnümbrik röunatab Lomonosovan rajonanke pohjoižpäivnouzmas, päivnouzmas da suves. Baltijan meren Suomen laht levigandeb päivlaskmha lidnaspäi.

Sosnovii Bor om lidnümbrikon üks'jäine eländpunkt. Lidnümbrik jagase 20 valičemižümbrikoks.

Tobmuz[redaktiruida | redaktiruida purde]

Käskusenandai tobmuz om Ezitajiden Nevondkund (ven.: Совет депутатов) 20 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl. Dmitrii Puläjevskii radab sen ezimehen da lidnan pämehen vspäi 2009 kahtenden strokun jäl'geten. Edel sidä vozil 2006−2009 hän radoi lidnan administracijan pämehen. Ezitajiden Nevondkund valičeb lidnan administracijan pämest.

Vs 2014 tal'vkuspäi Vladimir Sadovskii radab lidnan administracijan pämehen. Ezmäine varapämez' da nell' muite varapämest oma hänele abhu. Kuz' komitetad, 18 palakundad da 1 laudkund alištudas rajonan administracijan pämehištole.

Eläjad[redaktiruida | redaktiruida purde]

Vl 2010 eläjiden lugu oli 65 788 ristitud. Ortodoksižen hristanuskondan Jumalanmaman Korbendatoi Penzaz-jumalaižen päjumalanpert', Panteleimonan pühäpert' i časoun' oma lidnas.

Rahvahad (vn 2010 Venäman rahvahanlugemižen mödhe, enamba 0,4%): venälaižed — 71,9%, ukrainalaižed — 2,1%, vaugedvenälaižed — 1,2%, totarlaižed — 0,6%, toižed rahvahad — 1,8%, rahvahuden ozutandata — 22,4% (jäl'gmäižišpäi vaiše 3,8% mahttas pagišta venäkelel).

Erased igähižed rahvahad: suomalaižed — 70 rist. (0,11%), karjalaižed — 37 rist. (0,06%), estilaižed — 24 rist. (0,04%), vepsläižed — 9 rist. (0,01%), ižoralaižed — 7 rist. (0,01%), vodilaižed — 3 rist. (vähemba mi 0,01%)^[1].

Ižanduz[redaktiruida | redaktiruida purde]

Ižandusen päsarakod oma atomenergetik (Leningradan AES, Leningradan AES 2, tedoinstitutad), sauvond da sauvondmaterialoiden pästand (raudbeton, metallkonstrukcijad, teraztorvveimed)^[2].

Om specialižen opendusen aluzkundoid lidnas: keskopenduz — politehnine kolledž, üläopenduz — Piterin universitetoiden koume filialad da Venäman valdkundaližen radnikoičendan akademijan filial.

Galerei[redaktiruida | redaktiruida purde]

Lidnan administracijan sauvuz vl 2011
Optoelektronikan tedoinstitutan «Vertikal'»-kodvindkompleks (2008)
Leningradan atomelektrostancii vl 2010
Lapsiden «Andersengrad»-bobuštuzkompleks (om saudud vll 1975−1980)
Kališče-raudtestancii

Homaičendad[redaktiruida | redaktiruida purde]

Irdkosketused[redaktiruida | redaktiruida purde]

Sosnovii Bor-lidnümbrikon oficialine sait (sbor.ru). (ven.)

Sosnovii Bor (lidn, Leningradan agj) Vikiaitas

	Leningradan agjan lidnad
	Boksitogorsk \| Gatčin \| Ivangorod \| Kamennogorsk \| Kingisepp \| Kiriši \| Kirovsk \| Kommunar \| Kos'kenaluine \| Kudrovo \| Lug \| Lüban' \| Murino \| Nikol'skoje \| Otradnoje \| Pikalövo \| Primorsk \| Priozersk \| Pöud \| Sertolovo \| Slanci \| Sosnovii Bor \| Svetogorsk \| Säs'stroi \| Šlissel'burg \| Tihvin \| Tosno \| Uz' Ladog \| Viipur \| Visock \| Volhov \| Volosovo \| Vsevoložsk

[1] Национальный состав и владение языками, гражданство населения Ленинградской области (Leningradan agjan rahvahaline mülükund, ristitišton kel'mahtod da rahvahanikuz.) / Стат. сборник. Часть 1. — СПб.: Петростат, 2013. — 266 lpp. — Lp. 21. (ven.)

[2] Sosnovii Bor-lidnankundan investicine pasport (lenoblinvest.ru). — 12 lp. — Lpp. 1−4. (ven.)

[1]

[2]