Viipur

Viipur
Выборг

Lidnanznam	Flag
Valdkund	Venäma
Eläjiden lugu (2017)	78,457 ristitud
Pind	160,847 km²
Pämez'	Aleksandr Lisov (2014—)
Telefonkod	+7−81 378-xx-xxx
Avtokod	47
Aigvö	UTC+3 (MSK+0)

Viipur (ven.: Выборг, suom.: Viipuri, roč.: Viborg) om lidn, municipaline ühtnik (lidnankund) da Baltijan meren järed meriport Venäman i sen Leningradan agjan lodehes. Viipur om Viipurin rajonan administrativine keskuz da sen kaikiš suremb lidn.

Istorii

Nügüdläižen eländpunktan aluz om pandud ročilaižil vl 1293 kuti Viborgan lidnuz. Žilo lidnusenke saiba lidnan oiktusid vl 1403. 1930-nzil vozil lidn oli Suomenman tegimišton znamasižeks keskuseks.

Oli mülütadud NSTÜ:he vn 1940 sulakuspäi Karjalaiž-Suomalaižen NST:an palaks. Vozil 1941 (sügüz'ku) — 1944 (kezaku) oli okkupiruidud Suomenman sodavägil. Mülüb Venäman NFST:n Leningradan agjaha vspäi 1944.

Geografijan andmused

Lidn sijadase Karjalan kaglhan päivlaskmas, Viipurin lahten ozrikkivižel päivnouzmaižel randal, Suomen lahten pohjoižrandal, 0..51 m korktusil, 3 m keskmäižel korktusel valdmeren pindan päl. Matkad Piterin keskushesai om 136 km avtotedme, om 100 km sen röunhasai orhal, Suomenman röunhasai — 30 km lodeheze orhal. Lähembaine lidn da port om Visock 20 km suvipäivlaskmha orhal lahtedme vai 30 km avtotedme.

Viipur om municipaližen ühtnikan üks'jäine eländpunkt. Se jagase 10 territorialižhe rajonha vspäi 2008.

Eläjad

Vn 2010 Venäman rahvahanlugemižen mödhe eläjiden lugu oli 79 962 ristitud, kaks' videndest rajonan ristitištos. Kaikiš suremb ristitišt oli vozil 1986−1996 i 2012−2013, läz 81 tuhad eläjid.

Ižanduz da transport

Ižandusen päsarakod oma laivoiden da meriplatformoiden sauvomine, sauvondmaterialiden tehmine, ladimiden da vilugoitimiden pästand, mašinoidensauvomine, turizm, ozrikkiven samine, sömtegimišt.

Avtobusad da taksid oma kundaližtransportaks lidnas. Ezilidnelektrojonused ühtenzoittas Piterinke. «Allegro»-kiruhjonused tehtas seižutest lidnas. Saiman kanal augotase lidnas. «Pohjoižvalu»-gazanveim (Nord Stream) zavodiše lidnan ümbrištos.

Galerei

• 

  Viipurin rajonan administracijan sauvuz, vhesai 2014 lidnan ohjastusen pert'

• 

  Ph. Olafan lidnuz Zamkan sarel lidnan keskuses (2021)

• 

  «Rockwool-north»-tegim Lazarevk-tegimištzonas (2010)

• 

  «Družba»-adivpert' («sebruz») vl 2021

• 

  Viipurin päraudtestancii

Tetabad sündnuded

• Martti Ahtisaari — Suomenman enzne prezident.
• Vitalii Petrov — Venäman sportnik-avtovoibištelii.

Irdkosketused

• Municipaližen «Viipur-lidn»-ühtnikan oficialine sait (city.vbg.ru). (ven.)
• Leningradan agjan Viipurin rajonan tobmuden aluzkundoiden oficialine sait (vbglenobl.ru). (ven.) (angl.)