Otradnoje (lidn, Leningradan agj)

Otradnoje
Отрадное
Lidnanznam;	Flag;
Valdkund	Venäma
Eläjiden lugu (2023)	25,402 ristitud
Pind	70,1 km²
Pämez'	Magdanbek Taimashanov; (sügüz'ku 2019—)
Telefonkod	+7−81 362-xx-xxx
Avtokod	47
Aigvö	UTC+3 (MSK+0)

Otradnoje (ven.: Отра́дное, suom.: Pella) om Venäman lidn da lidnankund Leningradan agjan keskuzpalas, mülüb Kirovskan rajonha. Rajonan kaikiš suremb lidn, kut Kirovsk-rajonkeskuz-ki Nevan ülezjogen (26,4 tuh. rist. vl 2018).

Istorii

Ivanovskoje- i Pella-kezaküläd mainitasoiš vspäi 1708. Suren sodan aigan toran ezipird oli läz Otradnojed, kaik pertid da tegimed oliba muretud. Vn 1970 24. redukud ühtištadihe Ivanovskoje-, Otrandoje- i Ust'-Tosno-žiloid lidnha, nimitihe nügüdläižikš.

Otradnoje-lidn šingotase laivansauvomižen «Pella»-tegimel^[1], mecanümbriradmižel tegimel (elektropachad, pilindmaterialad), elektrotehnižen mašiništon tegimel^[2] (transformatorižed alastancijad, elektrolaudad, tegesed elektromontažan täht), sömtegimišton edheotandoil (konditerine ühtelmaz i «Heinz»-kompanijan edheotand), mugažo jogiport i plastikpakuitesen edheotand ratas.

Geografijan andmused

Lidn sijadase Nevan hural randal, 17 m ü.m.t. keskmäižel korktusel, vedase pidust' joged seičemeks kilometraks. Nevan hurad Tosn- (ven.: То́сна 121 km pitte) i Svätk- (Свя́тка 9 km pitte) ližajoged jokstas lidnadme mugažo.

Röunatab Piter-regionan suvipäivnouzmaiženke, sen Kolpinon rajonanke. Piterin metropolitenan lähembaine stancii om Ribackoje 18 kilometras. Toine lähembaine lidn om Nikol'skoje koumes kilometras suvhe. Matkad Kirovskhasai om 16 km pohjoižpäivnouzmha orhal vai avtotedme.

Tobmuz

Otradnoje om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden nevondkundan ezimez'. Edeližed nevondkundan ezimehed oma Irina Vališkova (Ирина Валышкова, sulaku 2018 — sügüz'ku 2019), Mihail Lagutenkov (sügüz'ku 2015 — sulaku 2018). Lidnankundan Administracijan pämehen velgusentäutai om Aleksandr Morozov vn 2021 sulakuspäi. Edeline Administracijan pämez' om Vera Letunovskaja, radoi vn 2021 sulakuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 23 866 ristitud vn 2021 — 25 706 ristitud. Kaik 25 344 eläjad oli lidnas vl 2017. Kaikiš suremb lidnan ristitišt om enamba mi 25 tuhad eläjad vspäi 2014 (25 796 rist. vl 2020).

Ortodoksižen hristanuskondan kaks' pühäpertid^[3] oma avaitud lidnas: ph. Ioann Armahtajan jumalanpert' (om saudud vspäi 1997 nevondkundaližes kul'turkeskusespäi), ph. Jurgii-vägestusenkandajan časoun' (2001). Edel Redukun revolücijad koume pühäpertid oliba lidnan territorijal, panihe mantazole kaikid niid.

Lapsiden opendusen aluzkundad oma viž päivkodid, licei, keskškol nomer 2, keskškol nomer 3, čomamahtoiden škol, školanirdaližen radon keskuz. Vezitransportan tehnikuman (Šlissel'burg) Otradnojen filial^[4] om lidnan professionaližen opendusen aluzkundaks.

Transport

Ivanovskai-platform i Pell-raudtestancii sijadasoiš lidnas. Avtobusmaršrut nomer 2 ühtenzoitab niid läbitaden lidnan keskuzpalad. Elektrojonused ajadas Piterihesai (Moskvan päraudtestancii).

Avtobusad i maršruttaksid ühtenzoittas Piterin metropolitenan Ribackoje-stancijanke 18 kilometras i Piterin lähižidenke ezilidnoidenke: Kirovsk, Nikol'skoje, Šlissel'burg, Tosno, Ul'janovk, Kolpino.

Galerei

«Fortuna»-kul'turkeskuz (2016)
Ph. Ioann Armahtajan jumalanpert', vn 2010 nägu
Laivansauvomižen «Pella»-tegimen stapelid vl 2014
Lidnan licei (2016)
Pell-raudtestancijan sauvuz vl 2014

Homaičendad

↑ Laivansauvomižen «Pella»-tegimen sait (pellaship.ru). (ven.)
↑ Nevan «Elektroščit»-tegimen sait (nze.ru). (ven.) (angl.)
↑ Otradnojen pühäpertid sobory.ru-saital. (ven.)
↑ Otradnojen filial Vezitransportan tehnikuman spolokvt226.narod.ru-saital. (ven.)

Irdkosketused

Lidnan tobmuden sait (otradnoe-na-neve.ru). (ven.)

Otradnoje (lidn, Leningradan agj) Vikiaitas

	Leningradan agjan lidnad
	Boksitogorsk \| Bugri \| Gatčin \| Ivangorod \| Kamennogorsk \| Kingisepp \| Kiriši \| Kirovsk \| Koltuši \| Kommunar \| Kos'kenaluine \| Kudrovo \| Lug \| Lüban' \| Murino \| Nikol'skoje \| Otradnoje \| Pikalövo \| Primorsk \| Priozersk \| Pöud \| Sertolovo \| Slanci \| Sosnovii Bor \| Svetogorsk \| Säs'stroi \| Šlissel'burg \| Tel'manan lidn \| Tihvin \| Tosno \| Uz' Ladog \| Viipur \| Visock \| Volhov \| Volosovo \| Vsevoložsk

[1] Laivansauvomižen «Pella»-tegimen sait (pellaship.ru). (ven.)

[2] Nevan «Elektroščit»-tegimen sait (nze.ru). (ven.) (angl.)

[3] Otradnojen pühäpertid sobory.ru-saital. (ven.)

[4] Otradnojen filial Vezitransportan tehnikuman spolokvt226.narod.ru-saital. (ven.)

[1]

[2]

[3]

[4]