Sertolovo

Sertolovo
Сертолово

Lidnanznam	Flag
Valdkund	Venäma
Eläjiden lugu (2025)	72,273 ristitud
Pind	27,49 km²
Pämez'	Sergei Kolomicev (kül'mku 2016—, Сергей Коломыцев)
Telefonkod	+7−812-xxx-xxxx
Avtokod	47
Aigvö	UTC+3 (MSK+0)

Sertolovo (ven.: Се́ртолово, suom.: Sierattala) om Venäman lidn da lidnankund Leningradan agjan keskuzpalan lodehes. Mülüb Vsevoložskan rajonha, sen kahtenz' surtte lidn, Piterin pohjoine kaimdailidn.

Istorii

Eländpunkt mainitase ezmäižen kerdan Uz'lidnan Vodin pätinan aigkirjas vl 1500 kuti Sirotal-külä (ven.: Сиротала), nimitihe jogen mödhe. 17. voz'sadal oli Ročinman palaks. Mainitase vn 1676 Ingrijan kartal kuti Serodatal (roč.: Serodatala), oli ingrijalaižiden küläks. Pohjoižen sodan jäl'ghe om Venäman palaks, mainitase mugažo kuti Sierattal (suom.: Sierattala), Sertalovo (ven.: Серталово), Sertoll (ven.: Сертолла) i Serpolovo (ven.: Серполово). Mülüi Piterin gubernijha, vspäi 1927 om Leningradan agjan palaks. Vll 1927−1939 külä oli mülünu Kuivozin suomen rahvahaližhe rajonha, i tühjitihe rajonad tehmaha sodasauvondad.

Panihe nügüdläšt eländpunktad Sertolovo-1- da Sertolovo-2-sodažiloikš vodel 1936 kaičemha Venäman lodehlišt röunad Leningradanno, sirtihe ingrijalaižid nügüd'aigaižen Vologdan agjan päivlaskmha. Toižen mail'man sodan aigan ei olend okkupacijan zonas, läžundkodid da varažomad oliba Sertolovos, nevondkundaližen ambunddivizijan päfater.

Vspäi 1954 Sertolovo mülüb Vsevoložskan rajonha, edel sidä oli Pargolovon rajonas. Vll 1977−1998 oli lidnanvuiččeks žiloks. Vl 1998 ühtištadihe kaikid Sertolovo-žilod da külid i anttihe lidnan statusad agjan tobmuden alištusenke, vspäi 2010 alištub rajonan tobmudele.

Sertolovon ižandusen civiližed sarakod oma sauvondmaterialiden pästand (raudbetontegesed, gazbetonblokad, pumaterialad, letken samine) i plastikpakuitesen tehmine.

Geografijan andmused

Lidnoiden sijaduz agjas vn 2004 kartal

Lidnankund sijadase rajonan päivlaskmas, 29..84 metrad ü.m.t. korktusil.

Matkad lidnan suvipalaspäi Piterihesai om üks' kilometr suvhe orhal vai kaks' kilometrad avtotedme, Vsevoložsk-rajonkeskushesai om koumekümne kilometrad suvipäivnouzmha orhal vai 40 km avtotedme, sidä kesken Piterin rengaztedme. Lähembaižed Pesočnai- (ven.: Песочная) i Dibuni (ven.: Дибуны) -raudteplatformad sijadasoiš vides kilometras suvipäivlaskmha lidnan keskuzpalaspäi. Viipurin avtote läbitab lidnan molembid paloid, matkad Piterin rengaztehesai om viž kilometrad suvipäivnouzmha.

Tobmuz

Sertolovon municipalitet rajonas vn 2014 kartal

Päivlaskmaine Lic-žilo (ven.: Западная Лица, 448 rist. vl 2016) mülüb lidnankundha Sertolovon ližaks (vspäi 2010). Lidnankundan pind — 74,15 km².

Sergei Kolomicev radab lidnankundan Deputatoiden nevondkundan ezimehen vn 2016 kül'mkuspäi. Edeline nevondkundan ezimez' om Aleksandr Vernikovskii. Lidnan Administracijan pämez' om Viktor Vasilenko vn 2023 kül'mkuspäi. Edeline Administracijan pämez' om Jurii Hod'ko, radoi vn 2023 kül'mkuhusai.

Eläjad

Vn 2010 Venäman rahvahanlugemižen mödhe 47 457 ristitud elihe lidnas, 47 906 ristitud — lidnankundas, rajonan kudendez, vn 2021 lidnan — 68 241 ristitud. Vl 2017 kaik 51 307 ristitud elihe lidnas i 51 760 ristitud kaikes lidnankundas. Kaikiš suremb lidnan ristitišt om nügüd'. Sodamehed heiden kanzoidenke ottas seičeme kümnendest ristitištos.

Ortodoksižen hristanuskondan ph. Sergii Radonežalaižen puine jumalanpert' om saudud vl 2003.

Lapsiden opendusen aluzkundad oma viž päivkodid (nomer 1..3 i kaks' nimitadud), koume keskškolad (nomer 1, 2 (školanedeliženke palakundanke) i 3), lidnan gimnazii, kaks' lapsen šingotesen keskust, rajonan lapsiden da norišton sädamižen pert'kulu, čomamahtoiden škol, futbolan i tennisan školad. Päivlaskmaižen sodaümbrikon 467. openduzkeskuz sijadase lidnas. Toižed profopendusen aluzkundad ratas lähižes Piteriš.

Transport

Avtobusad da maršruttaksid ühtenzoittas lidnad Piterin M2-metrojonon Parnas-, Prospekt Prosveščenija- i Ozerki-stancijoidenke, Pesočnai-raudteplatformanke, ümbrištonke da Vsevoložskanke.

Galerei

• 
  Lidnan administracijan pert' (2017)
• 
  Sertolovon mecpuišt järvenke vn 2017 semendkun augus
• 
  Sodaopenduzkeskuz vl 2017
• 
  Fizkul'turine tervehtamižkompleks (2017)
• 
  Viipurin avtote i znam lidnan röunal vl 2018

Irdkosketused

• Municipaližen ühtnikan tobmuden sait (sertolovo.gosuslugi.ru). (ven.)