Volosovo

Volosovo
Волосово

Lidnanznam	Flag
Valdkund	Venäma
Eläjiden lugu (2025)	11,293 ristitud
Pind	8 km²
Pämez'	Sergei Frolov (reduku 2009—)
Telefonkod	+7−81 373-xx-xxx
Avtokod	47
Aigvö	UTC+3 (MSK+0)

Volosovo (ven.: Во́лосово, suom.: Volossova) om Venäman lidn Leningradan agjas, Piterin suvipäivlaskmaine ezilidn. Se om Volosovon rajonan administrativine keskuz (sen alusenpanendaspäi vodel 1927), üks'jäine lidn da kaikiš suremb eländpunkt, mugažo Volosovon lidnankundan keskuz.

Istorii

Eländpunkt mainitase ezmäižen kerdan kuti Wolosowa-külä vn 1676 Ingermanlandijan kartal. Tegihe järedaks kezažiloks 19. voz'sadan lopus, mülüi Petergofan makundha. Volosovod panihe lidnanvuiččeks žiloks vl 1937. Žilo oli okkupacijas Toižen mail'man sodan aigan, sid' muretud, no om saudud möst. Žilo sai lidnan statusad vodel 1999.

Ned oma olmas Volosovon edheotandoiden keskes: leibkombinat, šokoladfabrik, kombisötken kombinat (ani suvhe lidnaspäi), inkubatoriž-lindvodindstancii, mecedheotand, varažomad, jändusiden utilizacijan edheotand. Baltijan vagonankohenduztegim om sauvomas. Magistraline gazanveim ümbärdab lidnad.

Geografijan andmused

Lidnoiden sijaduz agjas vn 2004 kartal

Lidn sijadase rajonan keskuzpalan pohjoižpäivnouzmas, Ižoran ülüden suves, 135 m ü.m.t. keskmäižel korktusel. Volosovo om ümbärtud mecsaril.

Matkad Piterin röunhasai om nell'kümne koume kilometrad pohjoižpäivnouzmha da 85 km sen keskuzpalhasai. Raudte jagab lidnad pohjoižeks da suvižeks paloikš.

Tobmuz

Volosovon lidnankund vn 2019 rajonan kartal

Lagonovo-külä (95 rist. vl 2016) mülüb lidnankundha mugažo, se sijadase lidnan pohjoiženno röunanno. Lidnankundan pind — 17,56 km².

Lidnankundan tobmuden pämez' om Deputatoiden nevondkundan ezimez'. Lidnan Administracijan jäl'gmäine pämez' oli Aleksandr Dmitravcov vhesai 2015, nügüd' rajonan Administracii tegeb sen velgusidme.

Eläjad

Vn 2002 Venäman rahvahanlugemižen mödhe lidnan eläjiden lugu oli 11 660 ristitud, vn 2010 — 12 161 ristitud, vn 2021 — 11 931 ristitud. Kaik 12 148 eläjad oli lidnas vl 2017. Vozil 2010−2017 ristitišt oli kaikiš suremb kaikes aigas (12..12,2 tuhad).

Rahvahad (enamba 0,4 % vl 2021): venälaižed — 92,8 %, armenijalaižed — 1,1 %, ukrainalaižed — 0,9 %, vaugedvenälaižed — 0,4 %, azerbaidžanlaižed — 0,4 %, uzbekad — 0,4 %, totarlaižed — 0,4 %, tadžikalaižed — 0,4 %, toižed rahvahad — 2,4 %, rahvahuden ozutandata — 0,8 %.

Erased-se igähižed rahvahad (vl 2021): suomalaižed — 21 rist. (0,18 %), estilaižed — 14 rist. (0,12 %), karjalaižed — 2 rist. (0,02 %), vepsläižed — 2 rist. (0,02 %).

Ortodoksižen hristanuskondan ph. Aleksandr Nevalaižen puine jumalanpert' om saudud lidnas vll 1904−1906.

Openduz

Lapsiden opendusen aluzkundad oma koume nomeruidud päivkodid (nomer 6, 28, 29), Volosovon augotižškol, kaks' keskškolad (nomer 1 i 2), lapsiden da norišton keskuz, čomamahtoiden škol N. K. Rerihan nimed, lapsiden da norišton sportškol.

Leningradan agjan medicinižen profšingotesen keskusen Volosovon filial om lidnan professionaližen opendusen aluzkundaks. Toine professionaližen opendusen aluzkund om Besedan maižanduztehnikum rajonan päivlaskmaiženno röunanno.

Transport

Avtobusad da taksid oma kundaližeks transportaks lidnas da sen ümbrištos. Avtobusad ühtenzoittas lidnad Gatčinanke i Kingiseppanke.

Vodel 1870 saudihe «Piter — Revel'»-raudtekeskustad da Volosovo-raudtestancijad sen ühtes, om elektrojonusid Ivangorodhasai.

Galerei

• 
  Volosovon istoriž-kodirandantedištandmuzei (2009)
• 
  Ph. Aleksandr Nevalaižen jumalanpert', vn 2007 nägu
• 
  Avtostancii vl 2007
• 
  Baikerklub (2013)
• 
  Volosovo-raudtestancijan sauvuz vl 2007

Irdkosketused

• Lidnankundan tobmuden aluzkundoiden oficialine sait (volosovo-gorod.ru). (ven.)