Volosovon rajon

Vikipedii-späi
Volosovon rajon
Волосовский район
Znam (text)
Flag (text)
Valdkund Venäma
Administrativine keskuz Volosovo
Eläjiden lugu (2016) 51,824 ristitud
Pind 2,680,53 km²
Volosovon rajon Волосовский район

Volosovon rajon (ven.: Волосовский район) om municipaline ühtnik Leningradan agjas.

Administrativine keskuz om Volosovo-lidn, sijadase rajonan pohjoižpäivnouzmas.

Istorii[vajehta | vajehtada tekst]

Rajonan aluz om pandud vl 1927 elokun 1. päiväl Leningradan agjan Leningradan ümbrikho ühten aigan niiden sädandanke. Vl 1930 heinkun 23. päiväl heitihe ümbrikod, i siš aigaspäi rajon mülüb Leningradan agjaha kuti administrativine ühtnik. Vl 1931 enččen Moloskovicin rajonan territorijad ühtištuihe Volosovon rajonanke. Vozil 1931−1939 koume estišt rahvahališt küläkundad oli sätud rajonas.

Toižen mail'man sodan aigan vozil 1941 (heinku) — 1944 (uhoku) rajonan territorii oli okkupiruidud. Vozil 1963−1965 rajonan territorii oli mülünu Kingiseppan rajonha. Vl 1999 sulakun 20. päiväl lindanvuitte Volosovo-žilo tegihe lidnaks. Rajon om olmas nügüdläižiš röunoiš vspäi 2006.

Geografijan andmused[vajehta | vajehtada tekst]

Volosovon rajon om Leningradan agjan suvipäivlaskmaine taho. Pind — 2 680 nellikkilometrad (14nz' sija agjas 18:späi). Mec katab koume videndest rajonan territorijad.

Om röunoid 5 Leningradan agjan rajonanke:

Ižoran ülüz om rajonan tobj pala. Znamasine jogi om Lug sen oiktoiden ližajogidenke (Vrud da Oredež). Om penid järvid rajonadme. Kaik joged da järved mülüdas Baltijan meren (Atlantižen valdmeren) basseinha.

Londuseližed varad oma turbaz, sauvondmaterialad (šebin', saved, letked, mouckivi), mec, reskvezi.

Vspäi 2006 rajonan territorii alajagase 16 municipaližhe ühtnikha: 1 lidnkundha da 15 küläkundha.

Tobmuz[vajehta | vajehtada tekst]

Käskusenandai tobmuz om Ezitajiden Nevondkund (ven. Совет депутатов) 32 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl (koumanz' kucund). Viktor Savenkov radab sen ezimehen da rajonan pämehen vs 2014 sügüz'kun 29. päiväspäi. Ezitajiden Nevondkund valičeb rajonan administracijan pämest.

Vs 2006 vilukun 1. päiväspäi Vasilii Rižkov radab rajonan administracijan pämeheks koumanden strokun jäl'geten. Koume varapämest oma hänele abhu. Nell' komitetad, 5 palakundad, 8 sektorad, laudkund da inspekcii alištudas rajonan administracijan pämehištole.

Eläjad[vajehta | vajehtada tekst]

Vn 2010 Venäman rahvahanlugemižen mödhe eläjiden lugu oli 49 443 ristitud (15nz' sija agjas 18:späi).

Kaik om 202 eländpunktad rajonas, sidä kesken 1 lidn, 21 žilod, 1 žilo raudtestancijanno da 179 küläd.

Toižed sured eländpunktad oma Begunici-külä (3,7 tuh. rist. vl 2010), Sur' Vrud-külä (2,3 tuh. rist. vl 2010), Izvar-külä (2,2 tuh. rist. vl 2010), Kikerino-žilo (2,1 tuh. rist. vl 2013) da Sel'co-žilo (2,1 tuh. rist. vl 2010).

Rahvahad (vn 2010 Venäman rahvahanlugemižen mödhe, enamba 0,4%): venälaižed — 88,8%, ukrainalaižed — 1,8%, vaugedvenälaižed — 1,2%, armenijalaižed — 0,9%, azerbaidžanlaižed — 0,7%, uzbekalaižed — 0,6%, suomalaižed — 0,5%, tadžikalaižed — 0,5%, totarlaižed — 0,5%, toižed rahvahad — 2,7%, rahvahuden ozutandata — 1,8% (jäl'gmäižiden keskes 8,4% mahttas pagišta venäkelel).

Erased igähižed rahvahad: estilaižed — 111 rist. (0,22%), karjalaižed — 24 rist. (0,05%), saamalaižed — 2 rist. (vähemba mi 0,01%), vepsläižed — 2 rist. (vähemba mi 0,01%), ižoralaižed — 1 rist. (vähemba mi 0,01%)[1].

Ižanduz[vajehta | vajehtada tekst]

Rajonan ižandusen päsarakod oma mecan varhapanend da ümbriradmine, sauvond da sauvondmaterialoiden tehmine (apakod puspäi, laudad da lahkod, kuivad sauvondsegoitused, gazbeton), sömtegimišt, maižanduz (maid, kartohkan kazvatuz), turizm[2].

Homaičendad[vajehta | vajehtada tekst]

  1. Национальный состав и владение языками, гражданство населения Ленинградской области (Leningradan agjan rahvahaline mülükund, ristitišton kel'mahtod da rahvahanikuz.) / Стат. сборник. Часть 1. — СПб.: Петростат, 2013. — 266 lpp. — Lpp. 24−25. (ven.)
  2. Volosovon rajonan investicine pasport (lenoblinvest.ru). — 10 lp. — Lpp. 2−5, 8−9. (ven.)

Irdkosketused[vajehta | vajehtada tekst]