Gatčinan rajon

Vikipedii-späi
Gatčinan rajon
Гатчинский район
Znam (text)
Flag (text)
Valdkund Venäma
Administrativine keskuz Gatčin
Eläjiden lugu (2016) 245,976 ristitud
Pind 2,891,81 km²
Gatčinan rajon Гатчинский район

Gatčinan rajon (ven.: Гатчинский район) om municipaline ühtnik Leningradan agjas.

Administrativine keskuz om Gatčin-lidn (agjan-ki keskuz, mülüb rajonha vspäi 2006), sijadase rajonan pohjoižes. Rajonan ristitišton kaks' videndest eläb siš.

Istorii[vajehta | vajehtada tekst]

Rajonan aluz om pandud vl 1927 elokun 1. päiväl Leningradan agjan Leningradan ümbrikho ühten aigan niiden sädandanke kuti Trockan rajon Trock-lidnan administrativižen keskusenke. Vn 1929 elokus lidnad da rajonad udesnimitihe, sättundas, Krasnogvardeiskan rajon:aks da Krasnogvardeisk:aks. Vl 1930 heinkun 23. päiväl heitihe ümbrikod, i siš aigaspäi rajon mülüb Leningradan agjaha kuti administrativine ühtnik. Vozil 1938−2006 Krasnogvardeisk/Gatčin oli alištunu agjan tobmudele oikti.

Toižen mail'man voinan aigan vozil 1941 (eloku) — 1944 (uhoku) rajonan territorii oli okkupiruidud. Vs 1944 vilukun 23. päiväspäi rajon da sen administrativine keskuz oma nügüdläižidenke nimidenke. Vs 1953 heinkuspäi enččen Pavlovskan rajonan pala mülüb Gatčinan rajonha. Vozil 1963−1965 Lomonosovan rajon oli Gatčinan rajonan palaks. Vl 1993 lidnanvuitte Kommunar-žilo tegihe lidnaks da oli alištunu agjan tobmudele vhesai 2006. Rajon om olmas nügüdläižiš röunoiš vspäi 2006.

Geografijan andmused[vajehta | vajehtada tekst]

Gatčinan rajon om Leningradan agjan suvipäivlaskmaine taho. Pind — 2 891 nellikkilometrad (13nz' sija agjas). Mec katab koume videndest rajonan territorijad (1839 km²)[1]. Mecan territorijan koumandez (647 km²) kävutase parččomaks, jättud mecal om il'man kaičendfunkcijad vaiše. Rajonan suvipala om sokaz (81 löudmižsija turbhanke).

Om röunoid 4 Leningradan agjan rajonanke da Piterinke:

Znamasižed joged oma Oredež (Lugan oiged ližajogi) da Ižor (Nevan hura ližajogi). Kaikiš surembad järved oma Väl'je (läz 20 km²) rajonan suvižel röunal da Orlinskoje (2,2 km²) rajonan suvipäivlaskmaižen röunanno. Kaik joged da järved mülüdas Baltijan meren (Atlantižen valdmeren) basseinha.

Londuseližed varad oma turbaz, sauvondmaterialad (sauvondkivi, apakkivi, gravii, šebin', letked), dolomit, mec, reskvezi.

Vspäi 2006 rajonan territorii alajagase 17 municipaližhe ühtnikha: 6 lidnkundha da 11 küläkundha.

Tobmuz[vajehta | vajehtada tekst]

Rajonan tobmuden pert' Gatčinas, Marksan Karlan ird.

Käskusenandai tobmuz om Ezitajiden Nevondkund (ven. Совет депутатов) 34 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl. Andrei Il'jin radab sen ezimehen da rajonan pämehen vspäi 2009 kahtenden strokun jäl'geten. Ezitajiden Nevondkund valičeb rajonan administracijan pämest.

Vs 2012 uhokun 24. päiväspäi Jelena Lübuškina radab rajonan administracijan pämeheks kahtenden strokun jäl'geten. Ezmäine varapämez da seičeme muite varapämest oma hänele abhu. Üks'toštkümne komitetad, 15 palakundad, 1 sektor da 2 laudkundad alištudas rajonan administracijan pämehištole.

Eläjad[vajehta | vajehtada tekst]

Vn 2010 Venäman rahvahanlugemižen mödhe eläjiden lugu oli 233 396 ristitud (kahtenz' sija agjas).

Kaik om 240 eländpunktad rajonas, sidä kesken 2 lidnad, 4 lidnanvuittušt žilod, 26 muite žilod, 7 žilod raudtestancijanno, 200 küläd da 1 futor.

Toižed sured eländpunktad oma Kommunar-lidn (21,7 tuh. rist. vl 2016), lidnanvuiččed Viric-žilo (12,5 tuh. rist. vl 2016), Siverskii-žilo (12,5 tuh. rist. vl 2016), mugažo Uz' Svet-žilo (5,6 tuh. rist. vl 2010).

Rahvahad (vn 2010 Venäman rahvahanlugemižen mödhe, enamba 0,4%): venälaižed — 84,6%, ukrainalaižed — 1,6%, vaugedvenälaižed — 0,9%, suomalaižed — 0,8%, uzbekalaižed — 0,6%, totarlaižed — 0,5%, čiganalaižed — 0,5%, armenijalaižed — 0,4%, toižed rahvahad — 1,9%, rahvahuden ozutandata — 8,2% (jäl'gmäižiden keskes vaiše 7,8% mahttas pagišta venäkelel).

Erased igähižed rahvahad: karjalaižed — 128 rist. (0,05%), estilaižed — 113 rist. (0,05%), vepsläižed — 35 rist. (0,01%), ižoralaižed — 4 rist. (vähemba mi 0,01%), saamalaižed — 1 rist. (vähemba mi 0,01%), vodilaižed — 1 rist. (vähemba mi 0,01%)[2].

Ižanduz[vajehta | vajehtada tekst]

Rajonan ižandusen päsarakod oma mašinoiden da mašiništon tehmine, mujumetalloiden metallurgii, ühthesuladusiden da metalltegesiden pästand, elektro- da optižladimensauvomine, raudbetontegesed, cellülozbumagaižed edheotandad, meblän pästand, sömtegimišt, maižanduz, turizm, logistik da varažomad[3].

Homaičendad[vajehta | vajehtada tekst]

  1. Gatčinan rajonan investicine pasport (lenoblinvest.ru). — 31 lp. — Lpp. 9−12. (ven.)
  2. Национальный состав и владение языками, гражданство населения Ленинградской области (Leningradan agjan rahvahaline mülükund, ristitišton kel'mahtod da rahvahanikuz.) / Стат. сборник. Часть 1. — СПб.: Петростат, 2013. — 266 lpp. — Lpp. 45−46. (ven.)
  3. Gatčinan rajonan investicine pasport (lenoblinvest.ru). — 31 lp. — Lpp. 3−9. (ven.)

Irdkosketused[vajehta | vajehtada tekst]