Mine sisu juurde

Ivangorod

Vikipedii-späi
Ivangorod
Ивангород
 Lidnanznam
 Flag
Valdkund Venäma
Eläjiden lugu (2023) 9,679 ristitud
Pind 7,7 km²
Ivangorod Ивангород
Pämez' Viktor Karpenko
(kezaku 2016—)
Telefonkod +7−81 375-xx-xxx
Avtokod 47
Aigvö UTC+3 (MSK+0)


Ivangorod (ven.: Иванго́род vai Ива́нгород, Ива́нго́род, est.: Jaanilinn, suom.: Ivangorod / Iivananlinna) om Venäman lidn da lidnankund Leningradan agjan suvipäivlaskmas. Mülüb Kingiseppan rajonha, sen kahtenz' lidn kahtespäi. Valdkundröunan zon, tulend dokumentan mödhe.

Istorii[vajehta | vajehtada tekst]

Panihe eländpunktan alust Venäman Ivan III Sur'-carin käskön mödhe vl 1492 kuti valdkundan ezmäine lidnuz da torguindmeriport Baltijan meren randanno, nimitihe carin oiktastuseks. Vll 1581−1590 i 1612−1704 oli Ročinman palaks. Udessaudud lidnuz om kaičenus tähäsai. 19. voz'sadal i 20. voz'sadan ezmäižel polel mainitase kuti Narvanlidnan pala oiktal randal. Vll 1919 — kül'mku 1944 oli ripmatoman Estinman palaks. Vl 1947 sai radnikžilon statusad Venäman NFST:s. Anttihe lidnan statusad vn 1954 28. päiväl redukud.

Ivangorod šingotase Narvan GES:al (vspäi 1955), lämuzmašiništon tegimel, džutpölvhanfabrikal i avtoveimiden edheotandal.

Geografijan andmused[vajehta | vajehtada tekst]

Lidn sijadase Narv-jogen oiktal randal i GES:an kanalan randoil, 32 m ü.m.t. keskmäižel korktusel, Kingiseppan rajonan päivlaskmas. Matkad Kingisepphasai om 22 km päivnouzmha orhal, raudtedme vai avtol. Ivangorod seižub «Piter — Tallidn»-raudtejonol i avtotel. Lähembaine lidn om Narv (Estinma) ani päivlaskmas, jogen taga. Koume kontrol'punktad om valdkundröunal: avtosildanno, raudtesildanno i jaugnikoiden sildanno. Raudtestancii nimitase Ivangorod-Narvskii.

Pähkimmähut-külä (ven.: Ореховая Горка, 10 rist. vl 2010) i Popovk-futor (1 rist. vl 2014) mülüdas lidnankundha Ivangorodan ližaks. Lidnankundan pind — 65,04 km².

Eläjad[vajehta | vajehtada tekst]

Vn 2010 Venäman rahvahanlugemižen mödhe lidnan eläjiden lugu oli 9 854 ristitud, lidnankundan — 9 865 ristitud. Kaikiš suremb lidnan ristitišt oli 14 400 eläjad vl 1959. Vl 2017 lidnan ristitišt oli 10 539 eläjad.

Rahvahad (enamba 0,4 % lidnankundas vl 2010): venälaižed — 84,7 %, ukrainalaižed — 2,7 %, vaugedvenälaižed — 1,5 %, totarlaižed — 0,5 %, armenijalaižed — 0,5 %, toižed rahvahad — 2,6 %, rahvahuden ozutandata — 7,5 %.

Ortodoksižen hristanuskondan kuz' pühäpertid[1] oma olmas lidnas: nell' jumalanpertid i kaks' časounäd.

Ivangorodan gumanitariž-tehnine institut[2] om lidnan professionaližen opendusen aluzkundaks, se om Piterin valdkundaližen aerokosmižen ladimensauvomižen universitetan filial.

Municipalitetan pämez' om Deputatoiden Nevondkundan ezimez'. Lidnan Admimistracijan pämez' om Aleksandr Sosnin vn 2019 kül'mkuspäi.

Galerei[vajehta | vajehtada tekst]

Homaičendad[vajehta | vajehtada tekst]

  1. Ivangorodan pühäpertid sobory.ru-saital. (ven.)
  2. Ivangorodan gumanitariž-tehnižen institutan sait (ifguap.ru). (ven.)

Irdkosketused[vajehta | vajehtada tekst]



Leningradan agjan lidnad
Boksitogorsk | Gatčin | Ivangorod | Kamennogorsk | Kingisepp | Kiriši | Kirovsk | Koltuši | Kommunar | Kos'kenaluine | Kudrovo | Lug | Lüban' | Murino | Nikol'skoje | Otradnoje | Pikalövo | Primorsk | Priozersk | Pöud | Sertolovo | Slanci | Sosnovii Bor | Svetogorsk | Säs'stroi | Šlissel'burg | Tel'manan lidn | Tihvin | Tosno | Uz' Ladog | Viipur | Visock | Volhov | Volosovo | Vsevoložsk