Lug

Lug
Луга

Lidnanznam	Flag
Valdkund	Venäma
Eläjiden lugu (2024)	37,015 ristitud
Pind	13 km²
Pämez'	Vladislav Golub (reduku 2019—)
Telefonkod	+7−81 372-xx-xxx
Avtokod	47
Aigvö	UTC+3 (MSK+0)

Lug (ven.: Лу́га, suom.: Laukaa / Ylä-Laukaa / Luga, vod.: Laugaz) om Venäman lidn da lidnankund Leningradan agjan suvipäivlaskmas. Se om Lugan rajonan administrativine keskuz, mülüb rajonha vspäi 2006.

Istorii

Eländpunkt mainitase ezmäižen kerdan 16. voz'sadan aigkirjoiš kuti Luskoje-žilut da Lužskii Posad. Posad sai lidnan statusad vl 1777, kätihe Lugan makundan keskuseks vl 1781. Om rajonan keskuseks vspäi 1927.

Vozil 1939−2005 lidn oli alištunu Leningradan agjan tobmudele oikti. Toižen mail'man sodan aigan oli okkupiruidud nacistižen Germanijan sodavägil vll 1941 (24. eloku) — 1944 (12. uhoku).

Lugan ižandusen päsarakod oma sömtegimišt (lihakombinat, leibkombinat, maidkombinat, konservtegim, sötken tegim živatoiden täht), instrumentan tehmine (tigelid, abrazivmaterialad, formuindletked), himine tegim (rostkenvastaižed nozoluded, kodihimii, mujud), avtopaloiden edheotand, elektrotegesiden pästand puhtastamha vet.

Geografijan andmused

Lidnan tobj pala seižub Lug-jogen hural randal (Baltjan meren bassein), 48 metrad ü.m.t. keskmäižel korktusel. Kavag'mecad letkesižil mahusil ümbärtas lidnad.

Matkad Piterihesai om 130 kilometrad pohjoižhe orhal, 140 km avtotedme vai raudtedme. Lähembaižed järedad lidnad oma Gatčin 95 km pohjoižhe orhal, avtotedme vai raudtedme, i Sur' Uz'lidn 85 km päivnouzmha orhal, 95 km avtotedme vai raudtedme.

Tobmuz

Lugan lidnankund vn 2011 rajonan kartal

Kaik kaks' pen't žilod-lebutahod, külä da kordon mülüdas lidnankundha Lugan ližaks. Lidnankundan pind — 230 km².

Lidnankundan tobmuden pämez' om sen Deputatoiden nevondkundan ezimez'. Nevondkund kogoneb 20 deputataspäi. Edeline nevondkundan ezimez' om Vladimir Stepanov (sügüz'ku 2014 — reduku 2019). Lidnankundan erigoittud Administracii om likvidiruidud vn 2014 redukus. Jurii Hil' oli sen likvidacižen laudkundan ohjandajan vn 2014 semendkuspäi.

Eläjad

Vn 2010 Venäman rahvahanlugemižen mödhe 38 593 ristitud elihe lidnas, 39 172 — kaikes lidnankundas, rajonan pol'. Vn 2021 rahvahanlugemižen mödhe lidnan ristitišt oli 38 407 eläjad. Vl 2017 kaik 35 785 ristitud elihe lidnas i 36 328 ristitud kaikes lidnankundas. Kaikiš suremb lidnan ristitišt oli 40..41 tuhad eläjid vozil 1989−2003 (41 800 rist. vl 1992). Om äi kezakülid ümbrištos, niiden ristitišt ližadub lujas kezaaigan.

Ortodoksižen hristanuskondan kahesa pühäpertid oma kaičenus i letud lidnas: koume päjumalanpertid (Jumalanmaman Kazanin jumalaižen, Hristan Eläbzdusen, ph. Jekaterinan), kaks' jumalanpertid i koume časounäd. Niiden ližaks kaks' jumalanpertid i kaks' časounäd oma pandud mantazole.

Lapsiden opendusen aluzkundad oma severz'-se päivkodid, kuz' keskškolad (nomer 2..6 i ehtal'ne), kaks' školad-internatad, lapsiden da norišton sädamižen keskuz, čomamahtoiden škol, lapsiden da norišton sportškol, kompjuterine keskuz. Lugan agrotegimištoline tehnikum om lidnan professionaližen opendusen aluzkundaks, mugažo Leningradan agjan medicinižen školan filial da Leningradan universitetan (Puškin-lidn) filial oma avaitud lidnas.

Transport

Kundaline transport om avtobusad lidnan südäimes, ezilidnelektrojonused ümbrištos da Piterihesai. Avtote ümbärdab lidnad päivnouzmpoles vspäi 2009.

Lug-1-raudtestancii sijadase lidnan keskuses, Lug-2 — lidnan suves Uz'lidnan sarakol.

Galerei

• 
  Lidnan administracijan sauvuz (2004)
• 
  Hristan Eläbzdusen päjumalanpert', vn 2015 nägu
• 
  Lugan abrazivtegim vl 2010
• 
  Škol nomer kaks' (2013)
• 
  Lug I-päraudtestancijan sauvuz vl 2018

Irdkosketused

• Lidnankundan lehtpoled Lugan rajonan oficialižel saital (luga.ru). (ven.)