Vsevoložsk

Vsevoložsk
Всеволожск

Lidnanznam	Flag
Valdkund	Venäma
Eläjiden lugu (2017)	70,292 ristitud
Pind	62,26 km²
Pämez'	Angelina Pligun (sügüz'ku 2014—)
Telefonkod	+7−81 370-xx-xxx
Avtokod	47
Aigvö	UTC+3 (MSK+0)

Vsevoložsk (ven.: Всеволожск, suom.: Seuloskoi) om Venäman lidn Leningradan agjas, Piterin da Ladogan keskes, Piterin pohjoižpäivnouzmaine ezilidn. Se om Vsevoložskan rajonan administrativine keskuz da kaikiš suremb lidn, mugažo municipaližen «Vsevoložsk-lidn»-ühtnikan keskuz.

Istorii

Eländpunktan aluz om pandud vl 1892 kuti žilo Räbovo-raudtestancijanno. Vspäi 1895 Vsevoložskai-raudtestancii (ven.: Всеволожская) om avaitud pol'tošt kilometras Räbovo-raudtestancijaspäi, se om lidnan päraudtestancii nügüd'. Pavel Vsevoložskii (1839−1898) lugese lidnan alusenpanijaks, sikš miše ühtni sauvomižhe akcioneraks arvoimiženke nimitada pandud hänen mal raudtestancijad ičeze kanzannimen mödhe, no Räbovo-stancii jäi ičeze nimenke.

Suren Tatanman sodan aigan Elonte oli läbitanu žilod.

Vl 1963 Vsevoložskii-radnikžilo kändihe lidnaks, alištihe sidä agjan tobmudele oikti, no lidnan ispolkomale alištuiba molembad lidn da rajon.

Geografijan andmused

Lidn sijadase Lubj-jogen molembil randoil, 11..68 m valdmeren pindan päl korktusil. Matkad Piterin keskushesai om 28 kilometrad suvipäivlaskmha, lidnan röunaspäi Piterin röunhasai — 4 km.

Koume pen't žilod mülüdas lidnankundha Vsevoložskan ližaks. Lidnankundan pind — 172,05 km².

Eläjad

Vozil 1959−1992 radnikžilon ristitišt oli 27..33 tuhad röunoiš. Vn 2002 Venäman rahvahanlugemižen mödhe lidnan eläjiden lugu oli 45 310 ristitud, lidnan vl 2010 — 59 704 ristitud, lidnankundan vl 2010 — 60 018 ristitud. Kaikiš suremb ristitišt om nügüd'. Rajonan ristitišton videndez eläb Vsevoložskas. Vl 2017 kaik 70 523 ristitud elädas lidnankundas.

Rahvahad (enamba 0,4% vl 2010): venälaižed — 90,7%, ukrainalaižed — 2,5%, armenijalaižed — 1,0%, vaugedvenälaižed — 0,7%, totarlaižed — 0,5%, toižed rahvahad — 2,3%, rahvahuden ozutandata — 2,3%.

Erased igähižed rahvahad: suomalaižed — 92 rist. (0,15%), estilaižed — 21 rist. (0,03%), karjalaižed — 19 rist. (0,03%), vepsläižed — 5 rist. (0,01% vähemba).

Ižanduz da transport

Ižandusen päsarakod oma renghanpäližiden tehmine (Nokian Tyres), metallkonstrukcijoiden i avtoiden metallpaloiden tehmine, eländkodiden sauvond, bumagpakuitesen tehmine, sömtegimišt, kirjoiden pästand, torguind da logistik. Kebnavtoiden pästandan tegim (Ford Motors — Ford Sollers Vsevoložsk-edheotand) radoi vll 2002−2019 i om konservacijas.

Irinovkan raudte läbitab lidnad Piterin Suomenman päraudtestancijaspäi, om koume raudestancijad lidnas, sen lopstancijad oma Ladoganjärv ühtel tel i lidnanvuitte Morozovan nimel nimitadud žilo rajonan suvipäivnouzmas toižel tel.

Avtobusad da ezilidnelektrojonused oma kundaližeks transportaks lidnan südäimes. Lähembaine metrostancii om Ladožskaja (38 minutad maršruttaksil).

Specialižen keskopendusen aluzkund om Vsevoložskan agrarižtegimišton tehnikum (edel 2012. vot maižandusen kolledž).

Galerei

• 

  Vsevoložskan da sen rajonan administracijan sauvuz, 2021

• 

  Pühän Stroican jumalanpert', vn 2013 nägu

• 

  Savičtegim (2011)

• 

  Agrarižtegimišton tehnikum (2012)

• 

  Torguindkeskuz Vsevoložsk-raudteplatformanno vl 2010

Irdkosketused

• Lidnankundan tobmuden aluzkundoiden oficialine sait (vsevolozk.ru). (ven.)