Šoutjärv'

Šoutjärv' / Šoutarv'
Шёлтозеро (ven.)
Šoutjärvi (karj.)
Soutjärvi (suom.)

Valdkund	Venäma
Eläjiden lugu (2013)	857 ristitud
Telefonkod	+7−8142−53-xxxx
Avtokod	10
Aigvö	UTC+3 (MSK+0)

Šoutjärv', Šoutarv' (ven.: Шёлтозеро / Шо́лтозеро, karj.: Šoutjärvi, suom.: Soutjärvi) om vepsän žilo (ven.: село́) Karjalan Tazovaldkundan Änižröunan (Änižrandan) rajonas. Oli rajonankeskuseks (Šoutjärven rajon; Vepsän rahvahaline volost'). Nügüd' se om Šoutjärven vepsän küläkundan administrativine keskuz.

Istorii

Šoutjärv' mainitase ezmäižen kerdan vl 1543. Nimituz libub eziauguižen Kodijärven nimespäi, kuspäi Šoutjärv'-jogi lähteb.

Geografijan andmused

Žilo sijadase Änižen suvipäivlaskmaižen randal, Šoutjärv'- (Šoutozerk-) i Sarbaht-jogiden lanktendan sijas järvhe. Šoutjärv'-žilon agjad: Alažagd', Kukeinposad, Petreinmättaz, Hamamättaz, Minamättaz, Markumättaz, Üläžagd', Papinposad, Mel'kamättaz, i Jeremišt (Jeremejanposad) om keskuses.

Avtomatk Šoutjärven da Petroskoin keskes om 83 kilometrad, regionaline R19-te (Petroskoi — Šušt) mäneb siriči Šoutjärves.

Eläjad

Voden 2002 kaiken Venäman rahvahanlugemižen andmusiden mödhe Šoutjärven eläjiden lugu om 1039 ristitud, enamba 30 % eläjid — vepsläižed.

Ortodoksižen hristanuskondan koume pühäpertid oma kaičenus i saudud žilos: ph. Matfei-apostolan (1850, nevondkundaližen aigan kävutadihe kul'turkeskuseks), Jašdären Ionan jumalankodin padvarj (vn 2014 Raštvoiden puine jumalanpert' i kellčuhunduz, vn 2004 Pühän Hengen Tulendan časoun').

Šoutjärves oma Šoutjärven vepsläine etnografine muzei (Mel'kinan-torgovanan pertiš), sur' kirjišt, keskškol, lapsiden muzikškol, läžundkodi i kul'turkeskuz.

Galerei

• 
  Venäkel'ž-vepsänkel'ne teznam Šoutjärves (2008)
• 
  Žilon časoun' (Pühän Hengen Tulendan), vn 2011 nägu
• 
  Vepsän kul'turan muzei (vn 2018 olend)
• 
  Tučinan pert' (2017)

Irdkosketused

• Šoutjärven vepsän küläkundan sait (sheltozero.ru). (ven.)