Šuiskoje (Vologdan agj)
| Valdkund | Venäma |
| Eläjiden lugu (2010) | 2,220 ristitud |
| Pind | 7,67 km² |
| Telefonkod | +7−81 749-xx-xxx |
| Avtokod | 35 |
| Aigvö | UTC+3 (MSK+0) |
Šuiskoje (ven.: Шу́йское) om Venäman žilo Vologdan agjan keskuzpalan suves. Se om Jogidenkeskeižen ümbrikon administrativine keskuz da kaikiš suremb eländpunkt, mugažo oli Suhonan küläkundan keskuseks vn 2022 kezakuhusai.
Istorii
[vajehta | vajehtada lähtetekst]Eländpunktan aluz om pandud 13. voz'sadal, mainitase kirjutadud purtkiš vspäi 1555. Šuiskii Lidnut oli kaičijaks lidnuseks, sured jogivaldmad i laivankohendusen edheotandad radoiba siš 16. voz'sadan lopus. Om ümbrikon (edel vn 2022 kezakud — rajonan) keskuseks sen sädandan aigaspäi vl 1929.
Šuiskoje šingotase valdkundaližil holitišil, mecan i garblon varhapanendal, pilindmaterialiden pästandal. Toižed edheotandad: sömsija, kafe, zell'lauk, torguz.
Geografijan andmused
[vajehta | vajehtada lähtetekst]Žilo sijadase ümbrikon lodehes-pohjoižes, Suhon-jogen oiktal randal, sihe langenijoiden Šui- (ven.: Шуя 54 km pitte) i Šeibuht- (Шейбухта 41 km pitte) jogiden suiden keskes. Pen' Pol'-külä (Малая Сторона, 62 rist. vl 2010) om Suhonan vastrandal. Matkad agjan Vologd-pälidnhasai om 65 kilometrad päivlaskmha-suvipäivlaskmha orhal vai 92 km avtotedme. Toižed lähembaižed lidnad oma Gräzovec (raudtestancijanke) 70 kilometrad suvipäivlaskmha orhal vai 81 km avtotedme, Sokol i Kadnikov 52 kilometrad lodeheze orhal vai 130 km avtotedme, Soligalič (Kostroman agj) 80 km päivnouzmha-suvipäivnouzmha orhal vai 370 km avtol.
Klimat om ven. Voden keskmäine lämuz om +2,5 C°, kezakun..elokun +15..+18 C°, tal'vkun..uhokun −10..−12 C°.
Tobmuz
[vajehta | vajehtada lähtetekst]Suhonan territorialine palakund om sätud küläkundan sijas, sen pämez' om Andrei Popuškov. Enččen küläkundan pind oli 1314,61 km². Kaik 68 eländpunktad oli siš: Šuiskoje-žilo, viž tošt žilod, 62 küläd (niišpäi 30 oma kezakülikš kaikenaigaižeta ristitištota). Niiden ližaks kaks' küläd (Butovo i Dorovskoje) oli edel 2020. vot, ned oma tühjitadud.
Küläkundan tobmuden pämez' oli sen Administracijan pämez'. Küläkundan Administracii om likvidiruidud vn 2023 kezakus. Sen jäl'gmäine pämez' oli Jelena Pal'nikova (Елена Пальникова) vn 2018 vilukuspäi. Küläkundan Nevondkund om likvidiruidud vn 2010 semendkus, rajonan tobmuz tegi sen velgusidme. Nevondkundan likvidator oli Aleksandr Kuročkin vn 2009 kül'mkuspäi.
Eläjad
[vajehta | vajehtada lähtetekst]Vn 2002 Venäman rahvahanlugemižen mödhe žilon eläjiden lugu oli 2 436 ristitud. Vl 2010 kaik 2 220 ristitud elihe žilos. Kaikiš suremb žilon ristitišt oli 2 531 eläjad vl 1989. Vl 1959 niid oli 1819. Vl 2021 kaik 3 128 ristitud elihe küläkundas (3207 rist. vl 2011, 2965 rist. vl 2017, 3256 rist. vl 2018). Ümbrikon ristitišton kaks' videndest eläb žilos, koume videndest oli küläkundas.
Ortodoksižen hristanuskondan koume pühäpertid[1] oma kaičenus i saudud žilos, kaik — Eläban Eziauguižen Stroican. Kaikiš amuižemb pühäpert' om saudud vl 1814 i om kaičenus vaiše paloin, ei ole rados. Kaks' tošt jumalanpertid oma avaitud: ezmäine om letud enččes avtostancijaspäi vll 2001−2005, toine om saudud vll 2015−2018.
Nened valdkundaližen büdžetan aluzkundad ratas žilos: keskškol, päivkodi, lapsiden sädamižen keskuz, lapsiden da norišton sportškol, lapsiden čomamahtoiden škol, rajonan läžundkodi, ristitišton socialižen holitusen keskuz, kanzan i lapsiden socialižen abun keskuz, rauhiden mehiden kodi, kul'turkeskuz, rajonan čomamahtoine kodirandantedištandmuzei[2], počtan palakund, avtobusstancii.
Homaičendad
[vajehta | vajehtada lähtetekst]- ↑ Šuiskojen pühäpertid sobory.ru-saital. (ven.)
- ↑ Jogidenkeskeižen rajonan čomamahtoižen kodirandantedištandmuzejan sait (mezhmuzei.ru). (ven.)