Železnogorsk (Kurskan agj)

Železnogorsk
Железногорск
Lidnanznam;	Flag;
Valdkund	Venäma
Eläjiden lugu (2025)	94,959 ristitud
Pind	100,88 km²
Pämez'	Dmitrii Kotov; (tal'vku 2016—)
Telefonkod	+7−47 148-xx-xxx
Avtokod	46
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Lidnan i sen ümbärdajan rajonan kart (2014)

Železnogorsk (ven.: Железного́рск) om Venäman lidn da lidnümbrik Kurskan agjan lodehes. Se om agjan kahtenz' lidn eläjiden lugun mödhe, Železnogorskan rajonan administrativižeks keskuseks mugažo (vspäi 1965), ei mülü sihe.

Istorii

Eländpunktan aluz om pandud oficialižeks grečan pöudol vn 1957 2. päiväl redukud Oktäbr'skii-radnikžiloks otmaha kävutamižhe raudkivendon löudmižsijad (tetas vspäi 1950). Udesnimitihe nügüdläižikš vn 1958 24. päiväl kezakud. Mülütihe radnikžilho kaht lähišt žilod i üht küläd. Žilo sai lidnan statusad vn 1962 28. päiväl semendkud. Vspäi 2008 nell' lähišt žilod i kaks' küläd oma lidnan palaks, ende mülüiba sen lidnümbrikho.

Železnogorsk šingotase sijaližen raudkivendon «Mihailovskii»-küllästamižfabrikal (kahtenz' surtte Venämas), erazvuiččen pakuitesen «GOTEK»-kompanijoil, sauvondmaterialiden pästandal (raudbetontegesed, savič), sömtegimištol (maidtegim, kalan edheotand).

Geografijan andmused

Lidn sijadase 220 m ü.m.t. keskmäižel korktusel. Kaik nell' pen't joged läbitadas lidnümbrikod: Čern' (37 km, lankteb Svap-jogehe, Seiman oigedpol'ne bassein), sen Rečic-ližajogi (ven.: Речица 23 km) i Räsnik-ližajogi (20 km), Rečican Pogarššin-ližajogi (ven.: Погарщина 12 km pitte).

Lidnümbrik röunatab Orelan agjanke pohjoižes. Matkad Kurskhasai om kahesakümne seičeme kilometrad suvipäivnouzmha orhal, 109 km avtotel vai 194 km raudtel. Lähembaižed lidnad oma Dmitrovsk (Orelan agj) 24 km lodeheze orhal vai 29 km avtotedme, i Dmitrijev 29 km suvipäivlaskmha orhal, 35 km avtotedme vai 63 km raudtedme. Mihailovskii Kaivuz-raudtestancii radab lidnan päivnouzmaižel röunal «Orel — L'gov»-keskustal. «Orel — Ukrainan röun»-avtote (A142-trass) om lidnan suvipäivnouzmaižeks röunaks.

Tobmuz

Železnogorsk om lidnümbrikon üks'jäižeks eländpunktaks. Lidnümbrikon pind — 100,88 km². Lidn jagase vižtoštkümneks mikrorajonaks. Pertišt sijadase lidnümbrikon lodehes tobjimalaz.

Eläjad

Vl 1959 žilon ristitišt oli 1 897 eläjad. Vn 2002 Venäman rahvahanlugemižen mödhe lidnan eläjiden lugu oli 95 528 ristitud, vn 2010 — 95 049 ristitud, vn 2021 — 97 038 ristitud. Kaik 100 671 eläjad oli lidnas vl 2017. Kaikiš suremb lidnan ristitišt oli 100 740 eläjad vl 2018.

Rahvahad (ozutadud rahvahudenke vl 2010): venälaižed — 96,8 %, ukrainalaižed — 1,7 %, toižed rahvahad — 1,5 %.

Ortodoksižen hristanuskondan nell' pühäpertid^[1] oma kaičenus i saudud lidnas: Eläban Eziauguižen Stroican päjumalanpert', Venäman kaikiden pühämehiden päjumalanpert', jumalanpert' i časoun'. Niiden ližaks kaks' jumalanpertid oma sauvomas.

Openduz

Lapsiden opendusen aluzkundad oma päivkodid, ühesa keskškolad, kaks' liceid, kaks' gimnazijad, korrekcine škol, čomamahtoiden škol, horan muzikškol G. Struven nimed, noriden naturalistoiden stancii.

Professionaližen opendusen aluzkundad oma Železnogorskan kaivuzmetallurgine^[2] i politehnine kolledžad, Železnogorskan čomamahtoline i servisan da kommercijan tehnikumad.