Ščigri

Ščigri
Щигры
	Lidnanznam;
Valdkund	Venäma
Eläjiden lugu (2021)	14,927 ristitud
Pind	21,03 km²
Pämez'	Sergei Černikov; (uhoku 2022—)
Telefonkod	+7−47 145-xx-xxx
Avtokod	46
Aigvö	UTC+3 (MSK+0)

Ščigri (ven.: Щигры́) om Venäman lidn da lidnümbrik Kurskan agjan pohjoižpäivnouzmas. Se om Ščigrin rajonan administrativižeks keskuseks mugažo, ei mülü sihe.

Istorii

Eländpunkt oli lidnuseks 17.-18. voz'sadoil i Troickoje-žiloks senno. Žilo sai makundan lidnan oficiališt statusad nügüdläiženke nimitusenke vl 1779, nimitihe jogen mödhe. Jogen nimi znamoičeb venäkelen sijaližes paginaspäi ištutadud mecad kukhan päl varmitamha vanoid. Vl 1894 raudte läbiti lidnad. Toižen mail'man sodan aigan lidn oli okkupiruidud nacistižen Germanijan sodavägil (21. kül'mku 1941 — 5. uhoku 1943). Fosforitan samine mäni lidnas 1930−1960-nzil vozil.

Ščigri šingotase kivivoimašiništon i buraudamižčuhundusiden tegimel, sauvondmaterialiden pästandal (räzinižen lavakrepindan edheotand, savičun tegim), höunehfabrikal, sömtegimištol (lihakombinat, leibkombinat, voitegim).

Geografijan andmused

Lidn sijadase Ščigor-jogen oiktal randal tobjimalaz (ven.: Щигор 36 km pitte, Donan üläjoksmusen oigedpol'ne bassein), 204 m ü.m.t. keskmäižel korktusel. Pened vezivaradimed oma saudud Ščigor-jogel da sen ližajogil lidnan südäimes.

Matkad Kurskhasai om 53 km päivlaskmha-suvipäivlaskmha orhal, 62 km avtotel vai raudtel, se-žo lähembaine lidn. Ščigri-raudtestancii radab lidnan päivlaskmas «Kursk — Voronež»-keskustal. Toine raudtestancii-platform om Udobritel'nai (ven.: Удобрительная) lidnan päivnouzmas vspäi 1931.

Tobmuz

Ščigri om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeližed lidnan pämehed oma Vladislav Šelest (sulaku 2020 — uhoku 2022), Igor' Žitnäk (keväz'ku 2017 — keväz'ku 2020). Lidnan Duman ezimez' om Igor' Skripkin vn 2022 vilukuspäi. Edeline Duman ezimez' om Nadežda Makarenko (sulaku 2017 — viluku 2022).

Eläjad

Vl 1939 lidnan ristitišt oli 7 639 eläjad. Vn 2010 Venäman rahvahanlugemižen mödhe lidnan eläjiden lugu oli 17 040 ristitud, vn 2021 — 14 927 ristitud. Kaik 15 540 eläjad oli lidnas vl 2017. Kaikiš suremb lidnan ristitišt oli 20..21 tuhad eläjid vll 1979−2001 (21 400 rist. vl 1992).

Rahvahad (2010): venälaižed — 97,8 %, toižed rahvahad — 2,2 %.

Ortodoksižen hristanuskondan nell' pühäpertid^[1] oma kaičenus i saudud lidnas: Eläban Eziauguižen Stroican päjumalanpert' (kivine om saudud vl 1801), jumalanpert' i kaks' časounäd. Niiden ližaks kaks' jumalanpertid ei ole kaičenus. Baptizman pühäpert' radab.

Professionaližen opendusen aluzkundad oma Nevondkundaline (Sovetskii) socialiž-agrarine tehnikum — Ščigrin filial i Kurskan bazine medicinine kolledž — Ščigrin filial^[2].