L'gov

L'gov
Льгов
	Lidnanznam;
Valdkund	Venäma
Eläjiden lugu (2024)	16,779 ristitud
Pind	37,4 km²
Pämez'	Aleksei Klemešov; (semendku 2021—)
Telefonkod	+7−47 140-xx-xxx
Avtokod	46
Aigvö	UTC+3 (MSK+0)

L'gov (ven.: Льгов) om Venäman lidn, lidnümbrik da raudtesol'm Kurskan agjan päivlaskmas. Se om agjan nellänz' lidn eläjiden lugun mödhe, L'govan rajonan administrativižeks keskuseks mugažo, ei mülü sihe.

Istorii

Eländpunkt mainitase ezmaižen kerdan ph. Ipatijan jumalankodin aigkirjas vl 1152 Ol'gov-nimitusenke (ven.: Ольгов). Lidnuz oli muretud 12. voz'sadan lopus i ei olend olmas hätken. Vspäi 1571 Gorodenskai-varjoičendsija (ven. Городенская сторожа) mainitase Venäman röunal, kaiči sidä kalaidajid heimoid vaste. Vll 1630−1764 vanhuskolaižiden jumalankodi oli olmas, i slabad senno sai makundan lidnan oficiališt statusad vl 1779 nügüdläiženke nimitusenke amuižen lidnan oiktastuseks. Kahten čuradusen raudted ristikoittas lidnas 19. voz'sadan lopuspäi: «Kijev — Voronež» i «Har'kov — Bränsk». Toižen mail'man sodan aigan lidn oli okkupiruidud nacistižen Germanijan sodavägil (27. reduku 1941 — 3. keväz'ku 1943).

L'gov šingotase elektrolaudoiden tegimel, sömtegimištol (sahartegim, maidkonservine kombinat, leibtegim), mugažo kombisötken edheotand, pilindedheotand i omblendfabrik ratas lidnas. Ende avtospecmašiništon, armaturan, savičun i raudbetontegesiden tegimed, vintegim i lihakombinat radoiba mugažo.

Geografijan andmused

Lidn sijadase kesked ümbärdajad rajonad, Seim-jogen hural randal tobjimalaz (ven.: Сейм 696 km pitte, Desnan hura ližajogi), 150 m ü.m.t. keskmäižel korktusel.

Matkad Kurskhasai om kuz'kümne kaks' kilometrad päivnouzmha orhal, 83 km avtotel vai 76 km raudtel. Lähembaižed lidnad oma Ril'sk 41 km päivlaskmha orhal, 46 km avtotedme vai 65 km raudtedme, i Kurčatov 26 km päivnouzmha orhal, 39 km avtotedme vai 30 km raudtedme. Koume raudtestancijad: L'gov-1-Kijevskii lidnan suves, L'gov-2-sortiruindstancii lidnan päivlaskmaižel röunal, Šerekino pohjoižes.

Tobmuz

L'gov om lidnümbrikon üks'jäižeks eländpunktaks. Lidnümbrikon pind — 37,4 km².

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Vladimir Vorobjov (kül'mku 2017 — viluku 2021), Jurii Severinov (radoi vn 2017 kül'mkuhusai). Lidnümbrikon Deputatoiden nevondkundan ezimez' om Jurii Skobelev vn 2019 sügüz'kuspäi. Edeline lidnan nevondkundan ezimez' om Nikolai Kostebelov, oli radnikusel vn 2019 sügüz'kuhusai.

Eläjad

Vl 1939 lidnan ristitišt oli 7 732 eläjad. Vn 2010 Venäman rahvahanlugemižen mödhe lidnan eläjiden lugu oli 21 453 ristitud, vn 2021 — 17 557 ristitud. Kaik 19 176 eläjad oli lidnas vl 2017. Kaikiš suremb lidnan ristitišt oli 25..26 tuhad eläjid vll 1967−1996 (26 523 rist. vl 1979).

Rahvahad (ozutadud rahvahudenke vl 2010): venälaižed — 97,7 %, toižed rahvahad — 2,3 %.

Ortodoksižen hristanuskondan nell' pühäpertid^[1] oma kaičenus i saudud lidnas: kaks' jumalanpertid, časoun', vanhuskolaižiden jumalanpert'.

Openduz

Lapsiden opendusen aluzkundad oma kuz' nomeruidud päivkodid (nomer 1..3, 5, 8, 9), aluzškol nomer 7, viž keskškolad (nomer 1..5), L'govan škol-internat lapsiden täht tervhuden röunatud voimusidenke, lapsiden sädamižen pert', čomamahtoiden škol, lapsiden da norišton sportškol.

Professionaližen opendusen aluzkundad oma Kurskan bazine medicinine kolledž — L'govan filial^[2] i Kurskan montažan tehnikuman L'govan filial (ende profškol nomer 6).