Fatež

Fatež
Фатеж
	Lidnanznam;
Valdkund	Venäma
Eläjiden lugu (2021)	4,691 ristitud
Pind	4,34 km²
Pämez'	Sergei Jemel'janov; (reduku 2023—)
Telefonkod	+7−47 144-xx-xxx
Avtokod	46
Aigvö	UTC+3 (MSK+0)

Fatež (ven.: Фате́ж) om Venäman lidn da lidnankund Kurskan agjan pohjoižes. Se om Fatežan rajonan administrativine keskuz.

Istorii

Tahond mainitase ezmaižen kerdan voziden 1641−1642 Kurskan dokumentoiš kuti Fotižan joginišk (ven.: Фотижское верховье). Eländpunktan aluz om pandud lidnuseks 17. voz'sadan lopus. Fatež sai makundan lidnan oficiališt statusad vl 1779. Sen edheotandad radoiba ümbärdajan maižanduzrajonan torhudel. Toižen mail'man sodan aigan lidn oli okkupiruidud nacistižen Germanijan sodavägil (22. reduku 1941 — 7. uhoku 1943).

Fatež šingotase sömtegimištol (voitegim da maidproduktad, lihajauhon edheotand) i savičun tegimel.

Geografijan andmused

Lidn sijadase rajonan keskuzpalas, Usož-jogen oiktal randal (ven.: Усо́жа 95 km pitte, Desnan hurapol'ne bassein), 200 m ü.m.t. keskmäižel korktusel. Fatežik-oja lankteb Usožha oiktalpäi, oja om lidnan päivnouzmaižeks röunaks, pen' vezivaradim om saudud sil lidnan pohjoižes.

Matkad Kurskhasai om 45 km suvipäivnouzmha-suvhe orhal vai 47 km avtotel. Toine lähembaine lidn om Železnogorsk 44 km lodeheze orhal vai 61 km avtotedme. «Orel — Kursk»-avtote (M2-trassan pala) ümbärdab lidnad päivlaskmaspäi, se mäni lidnadme edel 2014. vot.

Tobmuz

Lidn om lidnankundan üks'jäižeks eländpunktaks. Lidnankundan pind — 4,34 km².

Lidnankundan tobmuden pämez' om sen Administracijan pämez'. Edeližed lidnan Administracijan pämehed oma Sergei Cukanov (eloku 2021 — reduku 2023), Jevgenii Lobov (sulaku 2017 — heinku 2021). Lidnan Deputatoiden suiman ezimez' om Ol'ga Jurkina vn 2022 redukuspäi.

Eläjad

Vl 1939 lidnan ristitišt oli 3 417 eläjad. Vn 2010 Venäman rahvahanlugemižen mödhe lidnan eläjiden lugu oli 5 404 ristitud, rajonan koumandez, vn 2021 — 4 601 ristitud. Kaikiš suremb lidnan ristitišt oli 7 500 eläjad vl 1913, kuz' tuhad eläjid vl 1996 i 5 999 eläjad vl 2017.

Rahvahad (2010): venälaižed — 97,8 %, toižed rahvahad — 2,2 %.

Ortodoksižen hristanuskondan kaks' pühäpertid^[1] oma kaičenus i saudud lidnas: Jumalanmaman Tihvinan jumalaižen jumalanpert' (1800) i Hristan Eläbzdusen kodijumalanpert' (om saudud rajonan läžundkodin territorijal vspäi 2013). Niiden ližaks kaks' pühäpertid ei ole kaičenus: Jumalannägundan päjumalanpert' (1795−1937, rušihe sauvomha školad) i Jumalanmaman Katken jumalanpert' (oli vll 1818−1962, rušihe vspäi 1936 kluban sauvondan täht).

Lapsiden opendusen aluzkundad oma päivkodi, kaks' keskškolad (nomer 1 i 2), pioneroiden da školnikoiden pert', čomamahtoiden škol. Dmitrijevan maižanduztehnikuman Fatežan filial om lidnan professionaližen opendusen aluzkundaks.