Ciolkovskii (lidn)

Ciolkovskii
Циолковский
	Lidnanznam;
Valdkund	Venäma
Eläjiden lugu (2023)	7,429 ristitud
Pind	60,6 km²
Pämez'	Vitalii Brižatii; (heinku 2021—)
Telefonkod	+7−41 643-xx-xxx
Avtokod	28
Aigvö	UTC+9 (MSK+6)

Sil sanal voib olda toižid znamoičendoid; miše nähta niid, tulgat tänna.

Ciolkovskii (ven.: Циолко́вский) om Venäman lidn da lidnümbrik, sauptud administrativiž-territorialine ühtnik Amuran agjan keskuzpalan suves.

Istorii

Eländpunktan aluz om pandud vl 1969 kuti Uglegorsk-žilo (ven.: Углего́рск), no raketdivizijan kaivuded oliba siš, ei olend hilen samišt. Vhesai 1994 sen toine nimi oli Svobodnii-18. Žilo sai lidnan statusad vn 2015 sügüz'kus, udesnimitihe sen-žo voden tal'vkus Konstantin Ciolkovskii-tedomehen kanzannimen mödhe.

Lidnan eläjiden enzne radsija — Svobodnii-kosmodrom — om sauptud vanhtunuden infrastrukturan tagut vl 2007. Päivnouzmaine-kosmodrom om sauvomižes vajehtamha sidä, mugažo kut koumekümnekilometrine raudte sennoks.

Geografijan andmused

Lidn seižub Sur' Pör-jogen randal (ven.: Большая Пёра, Zejan oiged ližajogi).

Matkad Blagoveščenskhasai om 180 km suvhe, Kitain röunhasai — 110 km päivlaskmha. Jäine-raudtestancii (ven.: Ледяная) sijadase Transsibal vides kilometras lidnan keskusespäi.

Klimat om terav kontinentaline, mussonižen tundusidenke, tal'v om vilu lujas. Voden keskmäine lämuz om −1,5 C°, kezakun-elokun +17,4..+20,1 C°, tal'vkun-vilukun −24,1..−25,6 C°. Ekstremumad oma −49,0 C° (tal'vku, viluku) i +39,1 C° (kezaku). Kezaaigan minimum om −2,0 C° (kezaku), tal'vaigan maksimum om +2,7 C° (uhoku). Ei voi panda halad heinkus vaiše (minimum +1,2 C°), ei voi olda sulasäd tal'vkus (maksimum 0 C°) i vilukus (−1,0 C°). Paneb sadegid 496 mm vodes. Voib olda lujid tulleid sulakus-semendkus (20 metrhasai sekundas).

Tobmuz

Kaiken SATÜ:n pind om 1181,65 km². Lidn om sen üks'jäižeks eländpunktaks.

Edeline lidnümbrikon pämez' om Sergei Levickii (kül'mku 2018 — keväz'ku 2021).

Eläjad

Vn 2010 Venäman rahvahanlugemižen mödhe eländpunktan eläjiden lugu oli 5 892 ristitud, vn 2021 — 7 194 ristitud. Kaik 6 526 eläjad oli lidnas vl 2017. Lidnan tobj pala om sauvomas, 2018. vodele projektiruihe 25 tuhad eläjid. Kaikiš suremb lidnan ristitišt om nügüd'.

Ortodoksižen hristanuskondan Jumalanmaman Kazanin jumalaižen puine pühäpert'^[1] om saudud lidnas vll 2011−2016.

Lapsiden opendusen aluzkundad oma kaks' päivkodid, keskškol, lapsiden sädamižen pert', čomamahtoiden škol.