Skovorodino

Skovorodino
Сковородино
	Lidnanznam;
Valdkund	Venäma
Eläjiden lugu (2025)	6,328 ristitud
Pind	22 km²
Telefonkod	+7−41 654-xx-xxx
Avtokod	28
Aigvö	UTC+9 (MSK+6)

Skovorodino (ven.: Сковородино́) om Venäman lidn da lidnankund Amuran agjan päivlaskmas. Se om Skovorodinon ümbrikon (edel vn 2022 sulakud — rajonan) administrativine keskuz da üks'jäine lidn.

Istorii

Eländpunktan aluz om pandud vl 1908 kuti Zmeinii-žilo (ven.: посёлок Змеиный) raudtestancijanno Transsibal. Vl 1909 udesnimitihe sidä, i vhesai 1911 žilon nimi oli Never-1. Vozil 1911−1938 eländpunktan nimi oli Ruhlovo, ühtenzoituzteiden Sergei Ruhlov-ministran kanzannimen mödhe, hän ajeli žilho. Lidnanvuitte žilo sai lidnan statusad vl 1927. Om nimitadud nügüdläižikš vn 1938 16. päiväl tal'vkud žilon nevondkundan ezmäižen Afanasii Skovorodin-ezimehen mödhe, japonižed interventad amptihe händast vn 1920 uhokus.

Skovorodino šingotase transportsol'meks: raudtesol'm, «Päivnouzmaine Sibir' — Tün' valdmeri»-kivivoinveim.

Geografijan andmused

Lidn sijadase rajonan keskuzpalan pohjoižpäivnouzmas, Sur' Never-jogen (Amuran hura ližajogi) randal, 400 m ü.m.t. keskmäižel korktusel.

Matkad Kitain valdkundröunhasai om kuz'kümne kilometrad suvhe, Blagoveščenskhasai om 480 km suvipäivnouzmha orhal, 650 km raudtedme vai «Amur»-avtotedme. Lähembaine lidn om Tind 140 km pohjoižhe orhal, 185 km avtotedme vai raudtedme.

Tobmuz

Pen' Lesnoi-žilo (ven.: Лесной, 332 rist. vl 2018) mülüi lidnankundha Skovorodinon ližaks. Lidnankundan pind oli 740,84 km².

Tat'jana Bezuglova radoi lidnankundan pämehen vn 2014 tal'vkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 9 564 ristitud, rajonan ristitišton koumandez, vn 2021 — 7 057 ristitud. Kaik 9 283 eläjad oli lidnas vl 2017. Kaikiš suremb lidnan ristitišt oli 14 100 eläjad vozil 1992−1996. Motoambujan sodajoukun lähtend kucui depopuläcijad.

Ortodoksižen hristanuskondan ph. Ondrii Ezikuctud-apostolan jumalanpert'^[1] i Illän Muromalaižen časoun' (2005) oma saudud da avaitud lidnas.

Lapsiden opendusen aluzkundad oma viž nomeruidud päivkodid (nomer 1, 3, 8..10), kaks' keskškolad (nomer 1 i 3), čomamahtoiden škol. Ende rajonan lapsiden sädamižen pert' i lapsiden da norišton sportškol radoiba mugažo. Lähembaižed professionaližen opendusen aluzkundad ratas Tindas.