Dankov

Dankov
Данков
	Lidnanznam;
Valdkund	Venäma
Eläjiden lugu (2021)	19,726 ristitud
Pind	23,98 km²
Pämez'	Oleg Rassolov; (tal'vku 2020—)
Telefonkod	+7−47 465-xx-xxx
Avtokod	48
Aigvö	UTC+3 (MSK+0)

Dankov (ven.: Данко́в) om Venäman lidn da lidnankund Lipeckan agjan pohjoižes. Se om Dankovan rajonan administrativižeks keskuseks da palaks.

Istorii

Edeline Donkov-lidn (ven.: Донко́в) mülüi Räzanin ruhtinazkundha, se oli polttud mongoližen vägitungendan aigan. Dankovan rajonan Strešnevo-žilo sijadase sen lidnan sijas koumekümnes kilometras pohjoižhe-lodeheze rajonkeskusespäi Don-jogen hural randal. Kulikovo-pöud levitase läz nügüdläšt lidnad.

Nügüdläine eländpunkt mainitase ezmäižen kerdan vl 1568, konz Moskvan ruhtinased läksiba «panda lidnoid», nimitihe Dankov:aks edeližen lähižen lidnan mödhe. Anttihe makundan lidnan statusad vl 1804. «Ranenburg — Smolensk»-raudte läbiti lidnad 1890-nzil vozil. Kätihe Dankovad žiloks vl 1924, se sai lidnan statusad tošti vn 1957 17. päiväl uhokud. Toižen mail'man sodan aigan lidn ei olend okkupiruidud, no oli ezipirdan röunanno vhesai 1943, sil aigal sodapalakundad, sodaläžundkodid i varažomad oliba sijatud Dankovas. Vspäi 2008 eriline ekonomine «Dankov»-zon radab lidnakundan röunoiš.

Dankov šingotase plastmassan, sintetižen tervan i päiväižpaneliden tegimel, biopuhtastandan ladimiden tegimel, sauvondmaterialiden tegimil (šebin', raudbetontegesed), sömtegimištol (lihategim, leibtegim, sepiden tegim, topinamburan ümbriradmine), mugažo omblendceh radab.

Geografijan andmused

Lidn sijadase rajonan suvipäivnouzmas, Don-jogen üläjoksmusen molembil randoil, 140 m ü.m.t. keskmäižel korktusel.

Matkad Lipeckhasai om seičemekümne kahesa kilometrad suvhe-suvipäivnouzmha orhal, 85 km avtotel vai 210 km raudtel. Lähembaine lidn om Lebedän' 27 km suvhe orhal, 35 km avtotedme vai 50 km raudtedme. Dankov-raudtestancii radab keskustal Lev Tolstoi-žilospäi vaiše jüguiden täht vspäi 2014.

Tobmuz

Dankov om lidnankundan üks'jäižeks eländpunktaks. Lidnankundan pind — 23,98 km². Lidn jagase koumetoštkümneks nimitadud mikrorajonaks.

Lidnan Deputatoiden nevondkundan ezimez' om Oleg Rassolov vn 2020 tal'vkuspäi. Edeline nevondkundan ezimez' om Ivan Kremnev (tal'vku 2012 — kezaku 2020). Lidnankundan Administracii om likvidiruidud vn 2022 uhokus. Andrei Pereverzev oli sen jäl'gmäižen pämehen vm 2019 sügüz'kuspäi i likvidatoral. Edeline Administracijan pämez' oli Aleksei Levin (sügüz'ku 2015 — sügüz'ku 2019).

Eläjad

Vl 1897 lidnan ristitišt oli 9 100 eläjad, vl 1959 — 12 703 eläjad. Vn 2010 Venäman rahvahanlugemižen mödhe lidnan eläjiden lugu oli 21 064 ristitud, rajonan koume videndest, vn 2021 — 19 726 ristitud. Kaik 19 120 eläjad oli lidnas vl 2017. Kaikiš suremb lidnan ristitišt oli 23..24 tuhad eläjid vll 1979−2003 (24 800 rist. vl 1996).

Rahvahad (ozutadud rahvahudenke vl 2010): venälaižed — 97,8 %, toižed rahvahad — 2,2 %.

Ortodoksižen hristanuskondan viž pühäpertid^[1] oma kaičenus i saudud lidnas: Jumalanmaman Tihvinan jumalaižen päjumalanpert' i nell' jumalanpertid.

Openduz

Lapsiden opendusen aluzkundad oma kuz' nimitadud i nomeruidud päivkodid (nomer 1..4, 7, 8), keskškol nomer 1, kaks' liceid (nomer 4 i 6), lidnan lapsiden sädamižen keskuz, čomamahtoiden škol A. K. Lebedevan nimed, lapsiden da norišton sportškol.

Dankovan agrotegimištoline tehnikum^[2] om lidnan professionaližen opendusen aluzkundaks.