Lebedän'

Lebedän'
Лебедянь
Lidnanznam;	Flag;
Valdkund	Venäma
Eläjiden lugu (2021)	20,049 ristitud
Pind	17,98 km²
Pämez'	Svetlana Trofimova; (sulaku 2010—)
Telefonkod	+7−47 466-xx-xxx
Avtokod	48
Aigvö	UTC+3 (MSK+0)

Lebedän' (ven.: Лебедя́нь) om Venäman lidn da lidnankund Lipeckan agjan pohjoižpalas. Se om Lebedänin rajonan administrativine keskuz.

Istorii

Nügüdläine eländpunkt mainitase ezmäižen kerdan vl 1605 kuti Lebedänkan lidneihut (ven.: Лебедянское городище), nimitihe penen sijaližen jogen mödhe. Vl 1613 kätihe sidä valdkundaližeks lidnaks ičeze sodavejanke, i se voz' lugese lidnan oficialižen alusenpanendan vodeks. Kaiči Venäman suviröunad kalaidajiden mehiden londoid vaste. Vspäi 1621 kivine Eläban Eziauguižen Stroican naižjumalankodi om olmas lidnas (edel 1929. vot oli mez'jumalankodikš). Puine lidnuz paloi lophu vl 1703 udessündutamižeta. Lebedän' sai makundan lidnan statusad Jekaterina II-imperatornaižen käskön mödhe vn 1779 sügüz'kun 16 (27). päiväspäi. Joucen (ven.: лебедь) kuvadase lidnanznamal, no tedmata tarkoikti, om-ik sidodud neche lindhu lidnan nimituz vai ei. Šingotihe heboiden jarmankoil da ippodromal 19. voz'sadal.

Lebedän' šingotase mašinansauvomižen tegimil (betonanpeksimed i čomitandan sauvondmašinad, pompad da separatorad tegimišton täht), sömtegimištol (maidtegim, südäiveziden konservuindtegim, «PepsiCo:n» südäiveziden toine konservuindtegim i čipsoiden tegim), plastikdetaliden edheotandal elektrotehnižiden tegimiden täht i gofriruidud kartonpakuitesen tegimel.

Geografijan andmused

Lidn sijadase rajonan keskuzpalan pohjoižes, Don-jogen üläjoksmusen muugotil randoil, 160 m ü.m.t. keskmäižel korktusel. Lebedänk-jogi (ven.: Лебедянка 26 km pitte) jokseb kahtes kilometras suvhe lidnaspäi i lankteb Donha huralpäi.

Matkad Lipeckhasai om 55 km suvipäivnouzmha orhal, 62 km avtotel vai 160 km raudtel. Lähembaine lidn om Dankov 27 km pohjoižhe orhal, 35 km avtotedme vai 50 km raudtedme. Lebedän'-raudtestancii radab «Lev Tolstoi — Jelec»-keskustal 1890-nziš vozišpäi, se om saudud Donan hural randal.

Tobmuz

Lebedän' om lidnankundan üks'jäižeks eländpunktaks. Lidnankundan pind — 17,98 nellikkilometrad.

Lidnankundan tobmuden pämez' om sen Deputatoiden nevondkundan ezimez', Administracijan olendan aigan sen pämez' oli lidnankundan pämehen. Lidnan erigoittud Administracii om likvidiruidud vn 2021 kül'mkus, Anton Antonov oli sen jäl'gmäižen pämehen (vn 2020 semendku-reduku) i likvidacižen laudkundan ohjandajan vn 2020 redukuspäi. Edeline lidnan Administracijan pämez' oli Aleksei Hripčenko (kül'mku 2013 — semendku 2020). Nügüd'aigan rajonan Administracii tegeb lidnan Administracijan velgusidme.

Eläjad

Vl 1897 lidnan ristitišt oli 12 800 eläjad, vl 1931 — 11 100 eläjad. Vn 2010 Venäman rahvahanlugemižen mödhe lidnan eläjiden lugu oli 21 012 ristitud, rajonan pol', vn 2021 — 20 049 ristitud. Kaik 19 503 eläjad oli lidnas vl 2017. Kaikiš suremb lidnan ristitišt oli 22..23 tuhad eläjid vll 1989−2005 (23 100 rist. vl 1992 i 23 tuh. rist. vl 2003).

Rahvahad (2010): venälaižed — 97,7 %, toižed rahvahad — 2,3 %.

Rahvahad (enamba 0,4 % vl 2010): venälaižed — 97,5 %, toižed rahvahad — 1,4 %, rahvahuden ozutandata — 1,1 %.

Ortodoksižen hristanuskondan nened pühäpertid oma kaičenus i saudud lidnas: Eläban Eziauguižen Stroican naižjumalankodi-lidnuz^[1] (Stroican päjumalanpert' i kaks' jumalanpertid), mugažo Jumalanmaman Kazanin jumalaižen vanh (1771) da uz' (vspäi 1836) päjumalanpertid, koume jumalanpertid i časoun'.

Lapsiden opendusen aluzkundad oma seičeme nimitadud i nomeruidud päivkodid (nomer 1..7), kaks' keskškolad (nomer 2 i 3), gimnazii nomer 1 N.I. Borcovan nimed, lidnan lapsiden da norišton keskuz, muzikškol K.N. Igumnovan nimed, lidnan lapsiden da norišton sportškol, noriden naturalistoiden stancii. Professionaližen opendusen aluzkundad oma Lebedänin pedagogine kolledž^[2] i Lebedänin tegimištoližiden, informacižiden tehnologijoiden i ohjandusen tehnikum^[3] (edel vn 2024 heinkud torguimiž-ekonomine tehnikum).