Čapligin (lidn)

Vikipedii
Mine navigeerimisribale Mine otsikasti
Čapligin
Чаплыгин
 Lidnanznam
Coat of arms chaplygin.svg
 Flag
Flag of Chaplygin (Lipetsk oblast).png
Valdkund Venäma
Eläjiden lugu (2018-01-01) 11,802 ristitud
Pind 11 km²
Čapligin Чаплыгин
Pämez' Sergei Feronov
(eloku 2019—)
Telefonkod +7-47 475-xx-xxx
Avtokod 48
Aigvö UTC+3 (MSK+0)


Čapligin (ven.: Чаплы́гин) om Venäman lidn, lidnankund da raudtesol'm Lipeckan agjan pohjoižpäivnouzmas. Se om Čapliginan rajonan administrativine keskuz.

Istorii[redaktiruida | redaktiruida purde]

Eländpunktan aluz om pandud vl 1638 kuti Ust' Stanovih Räs-külä (ven.: Усть Становы́х Ряс), möhemba Slobodskoje-žilo. Vl 1695 Petr I-carin puine lebuerižpert' oli saudud läz žilod tel Moskvaspäi Voronežannoks. Vl 1702 Petr I pani penen Oranijenbaum-lidnusen alust Alamaiden lidnusiden ezikuvan mödhe. Sil-žo vodel car' lahjoiči žilod lidnusenke ičeze Aleksandr Menšikov-favoritale. Vl 1737 ned kändiba valdkundaližikš. Žilo sai makundan lidnan statusad vn 1778 16 (27). sügüz'kud Ranenburg-nimitusenke lidnusen värištadud rahvahal nimen mödhe.

Vl 1890 raudte ühtenzoiti lidnad Dankovanke. Vspäi 1896 saudihe tošt raudted Moskvhasai, se kändi Ranenburg-stancijad raudtesol'meks. Lidn sai nügüdläšt nimitust vn 1948 2. päiväl redukud venämalaižen i nevondkundaližen Sergei Čapligin-mehanikantedomehen (1869−1942) kanzannimen mödhe, hän oli sündnu sihe.

Čapligin šingotase sömtegimištol (maidon edheotand, jauhtegim, trahmaltegim, leibänkombinat) i turizmal. Mašinansauvomižen edheotandad ratas eriližen tegimištzonan rezidentoikš lidnanno.

Geografijan andmused[redaktiruida | redaktiruida purde]

Lidn sijadase rajonan keskuzpalas, Stanovaja Räs-jogen randal (ven.: Станова́я Ря́са 100 km pitte, Donan hurapol'ne bassein), 140 m ü.m.t. keskmäižel korktusel. Jagodnaja Räs-jogi (ven. Я́годная Ря́са 75 km pitte) lankteb Stanovaja Räsha oiktalpäi lidnan suves. Matkad Tambovan agjhasai om 7 km päivnouzmha orhal. Matkad Lipeckhasai om 75 km suvhe orhal, 82 km avtotel vai 130 km raudtel. Lähembaižed lidnad oma Mičurinsk (Tambovan agj) suvipäivnouzmha, Lebedän' suvipäivlaskmha, Dankov päivlaskmha i Räžsk (Räzanin agj) pohjoižhe. Ranenburg-raudtestancii radab lidnan lodehes vspäi 1890.

Čapligin om lidnankundan üks'jäine eländpunkt. Lidnankundan pind — 20 km².

Eläjad[redaktiruida | redaktiruida purde]

Vl 1897 ristitišt oli 15 300 eläjad, vl 1931 — 7 800 eläjad. Vn 2010 Venäman rahvahanlugemižen mödhe lidnan eläjiden lugu oli 12 656 ristitud, rajonan kaks' videndest. Kaikiš suremb lidnan ristitišt oli 16 100 eläjad vl 1913 i enamba 14 tuhad eläjid vll 1989−2001 (14 343 rist. vl 1989). Ortodoksižen hristanuskondan Pühän Stroican päjumalanpert' (om saudud 1806−1818) i nell' jumalanpertid[1] oma olmas lidnas. Phh. Pedroin da Pauloin mez'jumalankodi om avaitud 2 km päivnouzmha lidnaspäi vspäi 1712.

Rahvahad (2010): venälaižed — 98,1%, toižed rahvahad — 1,9%.

Professionaližen opendusen aluzkund om Čapliginan agrarine kolledž.[2]

Galerei[redaktiruida | redaktiruida purde]

Homaičendad[redaktiruida | redaktiruida purde]

  1. Čapliginan pühäpertid sobory.ru-saital. (ven.)
  2. Čapliginan agrarižen kolledžan sait (agrocolleg.ru). (ven.)

Irdkosketused[redaktiruida | redaktiruida purde]



Lipeckan agjan lidnad
Čapligin | Dankov | Gräzi | Jelec | Lebedän' | Lipeck | Zadonsk | Usman'