El' Ain

El' Ain
العين‎

Valdkund	Araban Ühtenzoittud Emiratad
Eläjiden lugu (2021)	846,747 ristitud
Telefonkod	+971−3
Aigvö	UTC+4

El' Ain (arab.: العين‎ [æl ˈʕajn] «purde») om Araban Ühtenzoittud Emiratoiden nellänz' lidn eläjiden lugun mödhe. Mülüb Abu Dabi-emiratha, sen kahtenz' surtte lidn.

Istorii

Vl 2018 islaman amuižen pühäpertin aluz om löutud lidnan territorijal. Alusen igä om enamba tuhad vot.

El' Ain šingotase torguindal (mollad), Coca-Cola:n tegimel, cementan tegimel, opendusen keskuseks, turizmal (lidnuz, adivpertid oazisanno, sur' zoopark).

Geografijan andmused

Lidn sijadase valdkundan päivnouzmas, Omanan röunanno, Bureimi-oazisas, 292 m ü.m.t. keskmäižel korktusel. Matkad emiratan Abu Dabi-pälidnhasai om 148 km päivlaskmha avtotedme, Dubaihesai om 130 km pohjoižhe-lodeheze.

El' Ain om valdkundan üks'jäine järed lidn sijadusenke edehko mererandalpäi. Oazis om ümbärtüd letetazangištoil i mägil. Om mineraližiden veziden purtkid ezimägištol.

Klimat om räk kuiv letetazangišton. Voden keskmäine lämuz om +28,8 C°, kezakun-elokun +36..+37 C°, tal'vkun-uhokun +18..+21 C°. Ekstremumad oma +5,6 C° i +49,3 C°. Paneb sadegid 61 mm vodes, enamba vilukus (12 mm) i keväz'kus (19 mm).

Eläjad

Vl 2012 lidnan eläjiden lugu oli 518 316 ristitud, vl 2017 — 766 936 ristitud. Kaikiš suremb ristitišt om nügüd'. Territorii 13 100 km² pindanke alištui lidnan tobmudele vl 2012, nügüd'aigan 15 123 km².

AÜE:n universitet om saudud lidnas (angl.: United Arab Emirates University, UAEU, arab.: جامعة الإمارات العربية المتحدة, alusenpanend 1976, 15 tuh. üläopenikoid).

Transport

Rahvahidenkeskeine civiline El' Ain-lendimport (AAN / OMAL, 136 tuhad passažiroid vl 2017) radab vspäi 1994 i sijadase 15 km päivlaskmha lidnaspäi. Tehtas reisid Kairha, Kuveitha, Pakistanha, om sezonreisid Džiddha.

Irdkosketused

• Lidnan municipalitetan lehtpoled dmt.gov.ae-saital. (arab.) (angl.)
• Lidnan oficialižed lehtpoled dpm.gov.abudhabi-saital. (arab.) (angl.)