Insar

Insar
Инсар (ven. i erz.)
Инзара (mokš.)
	Lidnanznam;
Valdkund	Venäma
Eläjiden lugu (2020)	7,665 ristitud
Pämez'	Jurii Buličev; (keväz'ku 2020—)
Telefonkod	+7−83 449-xx-xxx
Avtokod	13, 113
Aigvö	UTC+3 (MSK+0)

Insar (ven.: Инса́р, erz.: Инсар, mokš.: Инзара) om Venäman lidn da lidnankund Mordovijan Tazovaldkundan suves. Se om Insaran rajonan administrativine keskuz.

Istorii[vajehta | vajehtada lähte]

Eländpunktan aluz om pandud vl 1647 kuti lidnuz posadanke. Vl 1780 sai makundan lidnan statusad Penzan gubernijas. Vspäi 1935 mülüb Mordovijha. Vozil 1926−1958 oli küläks, vn 1958 29. päiväspäi elokud om lidnaks tošti.

Insar šingotase mašinansauvomižel («Neon»-tegim pästab varapaloid vagonoiden täht, «Ksenon»-tegim^[1] tegeb pidatusen kaikenvuiččid ladimid), linkapken tegimel, argvoin da saguden tegimel.

Geografijan andmused[vajehta | vajehtada lähte]

Lidn sijadase rajonan pohjoižröunanno, Iss-jogen hural randal (ven.: Исса, Mokš-jogen oiged ližajogi, Okan oigedpol'ne bassein), 160 m ü.m.t. keskmäižel korktusel. Matkad Saranskhasai om 77 km pohjoižpäivnouzmha avtotedme. Lähembaižed lidnad oma Kovilkino 38 km lodeheze avtotedme i Ruzajevk 50 km pohjoižpäivnouzmha avtotedme. Lähembaine raudtestancii sijadase lidnanvuiččes Kadoškino-žilos 18 km pohjoižhe avtotedme.

Pen' Zor'a-žilo (20 rist. vl 2016) mülüb lidnankundha Insaran ližaks. Lidnankundan pind om 52,18 nellikkilometrad.

Eläjad[vajehta | vajehtada lähte]

Vn 2010 Venäman rahvahanlugemižen mödhe eläjiden lugu oli 8687 ristitud, rajonan ristitišton kaks' koumandest. Kaikiš suremb ristitišt oli enamba 9,5 tuh. eläjid vozil 1992−1998 (9 800 rist. vl 1996).

Ortodoksižen hristanuskondan ph. Ol'gan naižjumalankodi^[2] i Sündun Raštvoiden jumalanpert' oma udessündutadud lidnas, niiden ližaks kaks' pühäpertid oma kaičenus vaiše paloin.

Insaran agrarine tehnikum^[3] om professionaližen opendusen aluzkundaks.

Lidnankundan Administracijan edeližed pämehed oma Valerii Letin (kül'mku 2015 — uhoku 2020) i Najil' Dolotkazin (edel 2015. vot).