Ardatov

Ardatov
Ардатов (ven. i mokš.)
Орданьбуе (erz.)
Lidnanznam;	Flag;
Valdkund	Venäma
Eläjiden lugu (2021)	8,857 ristitud
Pind	33,52 km²
Pämez'	Nadežda Mel'nikova; (kul'mku 2016—)
Telefonkod	+7−83 431-xx-xxx
Avtokod	13, 113
Aigvö	UTC+3 (MSK+0)

Ardatov (ven.: Арда́тов, mokš.: Ардатов, erz.: Орданьбуе ош) om Venäman lidn Mordovijan Tazovaldkundan pohjoižpäivnouzmas. Se om Ardatovan rajonan lidnankund da administrativine keskuz.

Istorii

Eländpunkt mainitase ezmäižen kerdan 17. voz'sadal kuti Ardatovankülä (ven.: деревня Ардатова). Vspäi 1780 kätihe Simbirskan gubernijan makundan lidnaks.

Nevondkundaližen aigan Ardatov šingotihe punümbriradajal tegimištol, vatan fabrikal i sömtegimištol (leibänkombinat i argvoin tegim).

Geografijan andmused

Lidn sijadase rajonan keskuzpalan päivnouzmas, Alatir'-jogen oiktal randal (lankteb Surha huralpäi 20 kilometras, Volgan oigedpol'ne bassein), 85..185 m korktusil, 150 m ü.m.t. keskmäižel korktusel.

Matkad Saranskhasai om 114 km suvipäivlaskmha avtotedme. Lähembaine lidn om Alatir' (Čuvašii) kaks'kümnes kilometras päivnouzmha orhal. Ardatov-raudtestancii sijadase kümnes kilometras suvhe lidnaspäi «Saransk — Kazan'»-linijal.

Klimat om ven kontinentaline. Heinkun keskmäine lämuz om +19 C°, vilukun −12 C°. Ekstremumad oma −45 C° i +39 C°. Paneb sadegid 470 mm vodes.

Tobmuz

Ardatov om lidnankundan üks'jäižeks eländpunktaks.

Lidnankundan tobmuden pämez' om Deputatoiden Nevondkundan ezimez'. Lidnankundan Administracijan pämez' om Mihail Karpov vn 2021 sulakuspäi, sen edeline pämez' om Andrei Kozlov (kül'mku 2016 — sulaku 2021).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 9 400 ristitud, rajonan ristitišton koumandez, vn 2021 — 8 857 ristitud. Kaik 8 734 eläjad oli lidnas vl 2017. Kaikiš suremb lidnan ristitišt oli enamba 10 tuhad eläjid vozil 1989−2001 (10 200 rist. vl 1998).

Rahvahad (enamba 1 % vn 2002 rahvahanlugemižen mödhe, ozutadud rahvahudenke): venälaižed — 66,2 %, mordvinalaižed (tobj. erzänkel'žed) — 32,1 %, toižed rahvahad — 1,7 %.

Ortodoksižen hristanuskondan koume pühäpertid^[1] oma kaičenus i saudud lidnas: ph. Mikulain kafedraline päjumalanpert' (vspäi 1809), Eläban Eziauguižen Stroican päjumalanpert' (saudihe vspäi 1769, ei ole väges), ph. Sergii Radonežalaižen časoun' (om letud vl 2011).