Insar

Insar
Инсар (ven. i erz.)
Инзара (mokš.)
	Lidnanznam;
Valdkund	Venäma
Eläjiden lugu (2021)	7,920 ristitud
Pämez'	Nikolai Paršutkin; (reduku 2021—)
Telefonkod	+7−83 449-xx-xxx
Avtokod	13, 113
Aigvö	UTC+3 (MSK+0)

Insar (ven.: Инса́р, erz.: Инсар, mokš.: Инзара) om Venäman lidn da lidnankund Mordovijan Tazovaldkundan suves. Se om Insaran rajonan administrativine keskuz.

Istorii

Eländpunktan aluz om pandud vl 1647 kuti lidnuz posadanke. Vl 1780 sai makundan lidnan statusad Penzan gubernijas. Vspäi 1935 mülüb Mordovijha. Vozil 1926−1958 oli žiloks, vn 1958 29. päiväspäi elokud om lidnaks tošti.

Insar šingotase mašinansauvomižel («Neon»-tegim pästab varapaloid vagonoiden täht, «Ksenon»-tegim^[1] tegeb pidatusen kaikenvuiččid ladimid), linkapken tegimel, argvoin da saguden tegimel^[2].

Geografijan andmused

Lidn sijadase rajonan pohjoižröunanno, Iss-jogen hural randal (ven.: Исса, Mokš-jogen oiged ližajogi, Okan oigedpol'ne bassein), 160 m ü.m.t. keskmäižel korktusel.

Matkad Saranskhasai om 77 km pohjoižpäivnouzmha avtotedme. Lähembaižed lidnad oma Kovilkino 38 km lodeheze avtotedme i Ruzajevk 50 km pohjoižpäivnouzmha avtotedme. Lähembaine raudtestancii sijadase lidnanvuiččes Kadoškino-žilos 18 km pohjoižhe avtotedme.

Tobmuz

Pen' Zor'a-žilo (20 rist. vl 2016) mülüb lidnankundha Insaran ližaks. Lidnankundan pind om 52,18 nellikkilometrad.

Lidnankundan pämez' om sen Deputatoiden nevondkundan ezimez'. Edeline lidnan pämez' om Mihail Višnäkov, radoi edel vn 2021 redukud. Jelena Kašajeva tegeb lidnankundan Administracijan pämehen velgusidme vn 2023 sügüz'kuspäi. Lidnankundan Administracijan edeližed pämehed oma Jurii Buličev (uhoku 2020 — sügüz'ku 2023), Valerii Letin (kül'mku 2015 — uhoku 2020) i Najil' Dolotkazin (edel 2015. vot).

Eläjad

Vn 2010 Venäman rahvahanlugemižen mödhe lidnan eläjiden lugu oli 8687 ristitud, rajonan ristitišton kaks' koumandest. Kaik 8 169 eläjad oli lidnas vl 2017. Kaikiš suremb lidnan ristitišt oli enamba 9,5 tuh. eläjid vozil 1992−1998 (9 800 rist. vl 1996).

Ortodoksižen hristanuskondan ph. Ol'gan naižjumalankodi^[3] i Sündun Raštvoiden jumalanpert' oma udessündutadud lidnas, niiden ližaks kaks' pühäpertid oma kaičenus vaiše paloin.

Insaran agrarine tehnikum^[4] om lidnan professionaližen opendusen aluzkundaks.