Inz

Inz
Инза
Lidnanznam;	Flag;
Valdkund	Venäma
Eläjiden lugu (2021)	16,293 ristitud
Pind	22 km²
Pämez'	Viktorija Caröva; (reduku 2020—)
Telefonkod	+7−84 241-xx-xxx
Avtokod	73, 173
Aigvö	UTC+4 (MSK+1)

Inz (ven.: И́нза, erz.: Инзей ош) om Venäman lidn da lidnankund Ul'janovskan agjan päivlaskmas. Se om Inzan rajonan administrativine keskuz.

Istorii

Eländpunktan aluz om pandud vl 1897 kuti raudtestancii da žilo senno, nimitihe jogen mödhe. Žilo kändihe rajonkeskuseks vl 1929. Inz sai lidnan statusad vl 1946, ühtištadihe lähiženke Kitovk-žilonke (ven.: Китовка, vspäi 1678).

Lidn šingotase raudten edheotandoil, diatomitan samižel^[1], sauvondmaterialiden tehmižel (meckombinat, punümbriradai tegim (om bankrotnendan olendas vn 2023 redukuspäi), kuidmaterialad), mugažo lihakombinat radab.

Geografijan andmused

Lidn sijadase rajonan keskuzpalan suvipäivlaskmas, Süksüm-jogen randal (ven.: Сюксюм 54 km pitte, lankteb Inzanjogehe oiktalpäi ani lidnan taga), 170 m ü.m.t. keskmäižel korktusel.

Matkad Ul'janovskhasai om 167 km pohjoižpäivnouzmha orhal. Lähembaine lidn om Nikol'sk (Penzan agj) kaks'kümne nell' kilometrad suvipäivlaskmha orhal vai 51 km avtotedme.

Tobmuz

Troickoje-žilo (263 rist. vl 2010) i Dubenki-külä (49 rist. vl 2010) mülüdas lidnankundha Inzan ližaks. Lidnankundan pind — 48,01 km². Rajonan administracii tegeb lidnankundan administracijan velgusidme vspäi 2016.

Lidnankundan tobmuden pämez' om sen Deputatoiden Nevondkundan ezimez'. Edeline lidnan Nevondkundan ezimez' oli Sergei Rautkin (vn 2009 redukuspäi, eli 1960−2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 18 803 ristitud, lidnankundan — 19 115 ristitud, rajonan koume videndest, vn 2021 lidnan — 16 293 ristitud. Vl 2017 kaik 17 714 ristitud elihe lidnas i 17 989 ristitud kaikes lidnankundas. Kaikiš suremb lidnan ristitišt oli 25 200 eläjad vl 1996.

Rahvahad (enamba 0,4 %, ristitišt 17 705 eläjad, ozutadud rahvahudenke): venälaižed — 86,0 %, mordvinalaižed — 9,5 %, totarlaižed — 3,0 %, toižed rahvahad — 1,5 %.

Ortodoksižen hristanuskondan viž pühäpertid^[2] oma kaičenus i saudud lidnas: Jumalanmaman Sündundan päjumalanpert' (om letud vll 2013−2019), koume jumalanpertid i časoun'.

Lapsiden opendusen aluzkundad oma seičeme nimitadud i nomeruidud päivkodid (nomer 1..6 i 8), Inzan augotižškol, nell' keskškolad (nomer 1..4), Inzan rajonan lapsiden sädamižen keskuz, čomamahtoiden škol, Inzan lapsiden da norišton sportškol. Inzan saraktehnologijoiden, ekonomikan da oiktusen valdkundaline tehnikum om lidnan professionaližen opendusen aluzkundaks.