Sengilei

Sengilei
Сенгилей

Lidnanznam	Flag
Valdkund	Venäma
Eläjiden lugu (2017)	6,568 ristitud
Pind	6 km²
Pämez'	Nikolai Žirtujev (sügüz'ku 2016—)
Telefonkod	+7−84 233-xx-xxx
Avtokod	73, 173
Aigvö	UTC+4 (MSK+1)

Sengilei (ven.: Сенгилей) — om Venäman lidn da lidnankund Ul'janovskan agjan suvipäivlaskmas. Se om Sengilein rajonan administrativine keskuz da üks'jäine lidn.

Istorii

Enzne tatarine Sengili-lidn oli muretud aigan joksten. Muretud lidn sijadase 5 km suvhe nügüdläižen Sengilein territorijaspäi. Nimitihe lidnad Sengilei-jogen mödhe, nece nimi om erzän augotižlibundal.

Simbirskan käsknik Ivan Daškov-ruhtinaz pani nügüdläižen eländpunktan alust vl 1666 kuti Sengilein slabad (ven.: Сенгилеевская слобода) kaičemha venälaižid žiloid kalaidajiden heimoiden londoišpäi. Vl 1708 koume slabadad (Staničnai (päžilo), Butirskai i Vibornai) ühtištuihe Pokrovskoje-žiloks jumalanpertin nimen mödhe. Vozil 1780−1925 se oli i vspäi 1943 om Sengilei-lidnaks.

Vl 1954 sirtihe Sengilein palad udhe sijha edel Kuibiševan vezivaradimen täutmišt (1955−1957).

Geografijan andmused

Lidn sijadase Volgaveren ülüdel, 78 m ü.m.t. keskmäižel korktusel, Volgan oiktal randal (Kuibiševan vezivaradim). Pened Sengileik- da Tušenk-joged lanktas Volgha lidnan territorijal jogen randal. Matkad Ul'janovskhasai om 48 km lodeheze orhal, 72 km avtotedme. Lähembaine lidn om Novoul'janovsk 45 km lodeheze avtotedme vai vetme.

Lidnanvuitte Cemzavod-žilo (1102 rist. vl 2016) om lidnankundan toine eländpunkt, sijadase 6 km lodeheze orhal lidnaspäi (12 km avtotedme). Lidnankundan administracii om saudud neciš žilos. Lidnankundan pind — 59,72 km².

Eläjad

Vl 1913 eläjiden lugu oli 9 100 ristitud. Vl 1979 ristitišt oli kaikiš suremb — 10 817 eläjad. Vn 2010 Venäman rahvahanlugemižen mödhe 6 958 ristitud elihe lidnas, 8 114 ristitud — lidnankundas, rajonan koumandez. Vl 2017 kaik 7 627 ristitud elädas lidnankundas.

Rahvahad: venälaižed, totarlaižed, čuvašalaižed, mordvinalaižed.

Ižanduz da transport

Ižandusen päsarakod oma sauvondmaterialiden tegimed (silikatsavič, cement), hüväladuližen kvarcletken rafiniruindtegim, mugažo pästtas mineraližid heretusid i mouckivid.

Kaks' specialižen keskopendusen aluzkundad om lidnas: pedagogine i tehnologine tehnikumad.

Jogivaldmad oma saudud lidnas. Lähembaine raudtestancii sijadase rajonan lidnanvuiččes Krasnii Guläi-žilos 39 km päivlaskmha.

Irdkosketused

• Lidnankundan lehtpoled Sengilein rajonan oficialižel saital (sengilej.ru). (ven.)
• Lidnan informacine sait (gorod-sengiley.narod.ru). (ven.)