Dimitrovgrad (Venäma)

Dimitrovgrad
Димитровград
Lidnanznam;	Flag;
Valdkund	Venäma
Eläjiden lugu (2025)	108,073 ristitud
Pind	103,98 km²
Pämez'	Andrei Bol'šakov; (viluku 2022—)
Telefonkod	+7−84 235-xx-xxx
Avtokod	73, 173
Aigvö	UTC+4 (MSK+1)

Dimitrovgrad (ven.: Димитровгра́д, tot.: Мәләкәс, edel 1972. vot oficialine nimi oli Melekess) om Venäman lidn Ul'janovskan agjan päivnouzmas. Se om agjan kahtenz' surtte lidn. Lidnümbrik om alištunu agjan tobmudele oikti. Lidn om Melekessan rajonan administrativižeks keskuseks mugažo, ei mülü sihe.

Istorii

Eländpunktan aluz om pandud vl 1698 kuti Čuvašan Melekess-külä (čuv.: Мелеккес ялĕ) Melekess-jogen (ven.: Мелеке́сс) alajoksmusen hural randal. Kätihe Melekessan Tegint Melekess-posadaks ičeze Dumanke i lidnan oiktusidenke vn 1877 heinkus. Melekess sai lidnan statusad vl 1926.

Dimitrovgradan ižandusen päsarakod oma atomreaktoriden tedoiduzkeskuz (kuz' atomreaktorad), mašinansauvomine (vagonad-laboratorijad, toine kodvindtehnik i avtomatik raudteiden täht, mašiništ kivivoin da gazan tegimišton täht, avtoagregatoiden tegim AvtoVAZ:an täht), meblin i oluden tehmine, torguind.

Geografijan andmused

Lidn sijadase Melekess- da Sur' Čeremšan-jogiden lanktendan sijas Kuibiševan vezivaradimhe, seižub 50..100 m ü.m.t. korktusil, keskmäine korktuz om 88 metrad valdmeren pindan päl. Lidnümbrikon territorii om ümbärtud Melekessan rajonal kaikiš polišpäi, lidn sijadase ümbärdajan rajonan keskuzpalas.

Matkad Ul'janovskhasai om kahesakümne viž kilometrad päivlaskmha avtotedme. Toižed lähembaižed lidnad oma Nurlat (Tatarstan) 81 km päivnouzmha orhal vai 123 km avtotedme, Tol'jatti (Samaran agj) 79 km suvhe orhal vai 105 km avtotedme, Sengilei 61 km suvipäivlaskmha orhal vai 157 km avtotedme.

Tobmuz

Dimitrovgrad om lidnümbrikon üks'jäižeks eländpunktaks. Lidnfartaloiden pind om 40,5 km².

Edeližed lidnan pämehed oma Aleksei Košaev (reduku 2016 — reduku 2018) i Bogdan Pavlenko (eloku 2019 — heinku 2021).

Eläjad

Vl 1926 lidnan eläjiden lugu oli 18 tuhad ristituid. Vn 2010 Venäman rahvahanlugemižen mödhe kaik 122 580 ristitud elihe lidnas, vn 2021 — 110 968 ristitud. Kaik 116 055 eläjad oli lidnas vl 2017. Kaikiš suremb lidnan ristitišt oli 137 200 eläjad vl 1999.

Rahvahad (enamba 1 % vl 2010): venälaižed — 70,9 %, totarlaižed — 12,3 %, čuvašalaižed — 4,9 %, mordvinalaižed — 1,6 %, ukrainalaižed — 1,0 %, toižed rahvahad — 2,3 %, rahvahuden ozutandata — 7,0 %.

Ortodoksižen hristanuskondan nell'toštkümne pühäpertid^[1] oma kaičenus i saudud lidnas: Spasan Toižetamižen kafedraline päjumalanpert' (om sätud vll 2004−2007), Mikulai-čudonsädajan päjumalanpert' (letihe vll 1985−1988, ende kafedraline), seičeme jumalanpertid i viž časounäd. Islaman pühäpert' om saudud vodele 1900, eli läbi sures kohenduses vl 2006.

Lapsiden opendusen aluzkundad oma päivkodid, keskškolad.