Miškin

Miškin
Мышкин

Lidnanznam	Flag
Valdkund	Venäma
Eläjiden lugu (2021)	5,621 ristitud
Pind	7,54 km²
Pämez'	Valerii Krilov (viluku 2024—, velgusentäutai)
Telefonkod	+7−48 544-xx-xxx
Avtokod	76
Aigvö	UTC+3 (MSK+0)

Lidnankundan vn 2008 generaline plan

Miškin (ven.: Мы́шкин) om Venäman lidn da lidnankund Jaroslavlin agjan päivlaskmas. Se om Miškinan rajonan administrativižeks keskuseks da palaks.

Istorii

Eländpunkt mainitase 15. voz'sadaspäi. Se sai lidnan statusad vn 1777 3. päiväl elokud. Legendan mödhe, hir' noustati ruhtinast jogen randal i muga hän päzui kün koskendusespäi.

Miškin oli torgovanoiden lidnaks. Kadoti lidnan statusad i oli Miškino-žiloks vll 1927−1988, lidnanvuiččeks žiloks vspäi 1943, sid' Miškin-žiloks. Sai lidnan statusad tošti vl 1991.

Miškin šingotase turizmal (Hiren pert'kulu, puižed erižpertid, viž muzejad, 140 tuhazesai turistoid vodes), londuseližen gazan veimiden videl kompressorcehal («Gazprom», läz 800 radnikad) i kivivoiveimen pompandan stancijal, mugažo kan'goiden edheotandal i radonmahtoiden keskusel. Lindfabrik radab lidnan päivlaskmaižel röunal.

Geografijan andmused

Lidn sijadase Volgan hural korktal randal Ribinskan vezivaradimen augotišes, 110 m ü.m.t. keskmäižel korktusel.

Om valdmoid turistlaivoiden täht. Kümneminutine ehtatim ühtenzoitab lidnan suvišt randirdad Volgan oiktanke randanke, «Uglič — Ribinsk»-avtote mäneb siš i avtobusstancii sijadase läz ehtatimen seižutest oiktal randal. Juhot'-jogi (ven.: Ю́хоть 75 km pitte) lankteb Volgha oiktalpäi lidnad vaste. Lähembaine raudtestancii om saudud Volg-žilos 21 km pohjoižhe «Ribinsk — Bologoje»-raudtekeskustal, avtote ühtenzoitab senke Volgan huradme randadme. Matkad Jaroslavlihesai om 87 km päivnouzmha orhal vai 100 km oiktadme avtotedme. Lähembaižed lidnad oma Uglič 30 km suvhe orhal vai 38 km avtotedme i Ribinsk 37 km pohjoižpäivnouzmha orhal keskushesai vai 46 km avtotel.

Tobmuz

Lidnankundan sijaduz rajonas (2022, pen', om ozutadud rusttal mujul)

Miškin om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline lidnan pämehen velgusentäutai om Anna Košutina (sügüz'ku 2022 — viluku 2024). Edeline lidnan pämez' om Jevgenii Petrov (reduku 2014 — sügüz'ku 2022). Lidnan Municipaline nevondkund om likvidiruidud vn 2024 heinkus. Sen jäl'gmäine ezimez' om Leonid Čistäkov, radoi vn 2019 kül'mkuspäi, edeline — Roman Šuvalov.

Eläjad

Vn 2010 Venäman rahvahanlugemižen mödhe lidnan eläjiden lugu oli 5 932 ristitud, rajonan nell' seičemendest, vn 2021 — 5 621 ristitud. Kaik 5 738 eläjad oli lidnas vl 2017. Kaikiš suremb lidnan ristitišt oli 6 600 eläjad vll 1996−1998.

Rahvahad (enamba 0,4 % vl 2021): venälaižed — 94,7 %, azerbaidžanlaižed — 1,4 %, ukrainalaižed — 0,5 %, toižed rahvahad — 1,7 %, rahvahuden ozutandata — 1,7 %.

Ortodoksižen hristanuskondan kahesa pühäpertid oma kaičenus da avaitud lidnas: ph. Mikulain päjumalanpert' (om saudud vll 1766−1837), Jumalanmaman Emäganpäivän päjumalanpert' (letihe vll 1805−1820), «Kaikiden gorähižiden ihastuz»-jumalaižen jumalanpert' (1714, kaumžomal) i viž časounäd. Niiden ližaks Eläban Eziauguižen Stroican jumalanpert' i kuz' časounäd oma todud toižiš eländpunktoišpäi lidnan rahvahaližhe etnografižhe muzejha i «Mahajev dvor»-muzei-usadibha.

Lapsiden opendusen aluzkundad oma nell' nimitadud päivkodid, keskškol, lapsiden sädamižen pert', čomamahtoiden škol, lapsiden da norišton sportškol. Miškinan politehnine kolledž om lidnan professionaližen opendusen aluzkundaks.

Galerei

• 
  Lapsiden sädamižen pert' (2008)
• 
  Ph. Mikulain päjumalanpert', vn 2016 nägu
• 
  Hiren pert'kulu (2014)
• 
  Adivpert' (2009)
• 
  Kodirandantedištandmuzei (2009)

Irdkosketused

• Lidnankundan tobmuden sait (gorodmyshkin.ru). (ven.)