Nadim

Vikipedii-späi
Nadim
Надым
 Lidnanznam
 Flag
Valdkund Venäma
Eläjiden lugu (2020) 44,830 ristitud
Pind 307,01 km²
Nadim Надым
Pämez' Leonid Däčenko
(2007−2012, reduku 2015—)
Telefonkod +7−3499-xxx-xxx
Avtokod 89
Aigvö UTC+5 (MSK+2)


Nadim (ven.: Нады́м, nenc. i tot.: Надым, ukr.: Надим, sel'k.: Нярэм) om Venäman lidn da lidnankund Jamalan Nenciden avtonomižen ümbrikon keskuzpalan suves. Se om Nadiman rajonan administrativine keskuz, ümbrikon nellänz' lidn eläjiden lugun mödhe.

Istorii[vajehta | vajehtada tekst]

Nadiman lidneihuden aluz oli pandud vl 1597 32 kilometras Nadim-jogensuspäi ülezjogen. Vl 1802 se oli znamasižeks. Nügüd'aigan tehtas arheologižid kaivandusid.

Panihe Uz' Nadim-žilon alust 60 kilometras ülezjogen vanhas Nadim-lidneihudespäi vl 1929 kuti perdankazvatusen sovhozan keskuz, vspäi 1934 muite faktorii oli puiženke pertištonke. Voden 1952 elokus ezmäine jonuz tuli Salehardaspäi, no jäl'geližil kezoil raudte upsi igähižhe roughu. Vspäi 1967 valitihe žilod keskuseks otmaha kävutamižhe gazan Medvežje-löudmižsijad kožujan kuivan tahon olendan tagut sauvomha lendimportad.

Nadim sai lidnan statusad vl 1972. Se šingotase londuseližen gazan samižel («Gazprom»- i «Novatek»-kompanijad). Venäman sadud gazan kümnendez läbitab lidnan ümbrištod i oigendase veimihe. Gazanveimiden kaikiš järedamb sol'm mail'mas sijadase Nadimanno.

Geografijan andmused[vajehta | vajehtada tekst]

Lidn sijadase ühtennimižen jogen hural randal, kuz' metrad ü.m.t. keskmäižel korktusel. Om ümbärtud penil järvil. Matkad Salehardhasai om 290 km lodeheze. Toižed lähembaižed lidnad oma Uz' Urengoi pohjoižpäivnouzmha (passažirraudtestancii) i Gubkinskii suvipäivnouzmha. Nadim-Valdmad-raudtestancii om sarakon Udes Urengoišpäi lopstancijaks, raudtesarak radab vaiše vemha jüguid.

Klimat om subarktine. Voden keskmäine lämuz om −6,6 C°, kezakun-elokun +7..+13 C°, tal'vkun-uhokun −21..−24 C°. Ekstremumad oma −57 C° i +34 C°. Paneb sadegid 449 mm kus, enamba heinkus-elokus (54..67 mm kus), vähemba vilukus-sulakus (20..26 mm kus).

Nadim om lidnankundan üks'jäine eländpunkt. Lidnfartaliden pind om 18,5 km².

Eläjad[vajehta | vajehtada tekst]

Vn 2010 kaiken Venäman rahvahanlugemižen mödhe eläjiden lugu oli 46 611 ristitud, rajonan seičeme kümnendest. Kaikiš suremb lidnan ristitišt oli 52 586 eläjad vl 1989. Vl 2017 lidnan ristitišt oli 44 660 eläjad.

Rahvahad (enamba 1,1% vl 2010): venälaižed — 75,1%, ukrainalaižed — 9,1%, totarlaižed — 5,1%, nencalaižed — 1,2%, baškiralaižed — 1,1%, vaugedvenälaižed — 1,1%, toižed rahvahad — 7,3%.

Ortodoksižen hristanuskondan nell' pühäpertid[1] oma saudud lidnas: kaks' jumalanpertid i kaks' časounäd. Islaman «Azat Safa»-mečet' om avaitud.

Nadiman kolledž[2] i «Gazprom»-kompanijan openduztehmižkeskuz[3] oma lidnan professionaližen opendusen aluzkundoikš.

Galerei[vajehta | vajehtada tekst]

Homaičendad[vajehta | vajehtada tekst]

  1. Nadiman pühäpertid sobory.ru-saital. (ven.)
  2. Nadiman professionaližen kolledžan sait (nadym-college.ru). (ven.)
  3. Openduztehmižkeskusen lehtpol' nadymdobycha.gazprom.ru-saital. (ven.)

Irdkosketused[vajehta | vajehtada tekst]



Jamalan Nenciden avtonomižen ümbrikon lidnad
Gubkinskii | Labitnangi | Muravlenko | Nadim | Nojabr'sk | Salehard | Tarkosale | Uz' Urengoi