Santa Krus de la Sjerr

Santa Krus de la Sjerr
Santa Cruz de la Sierra
Lidnanznam;	Flag;
Valdkund	Bolivii
Eläjiden lugu (2012)	1,453,549 ristitud
Pind	363 km²
Telefonkod	+591-
Aigvö	UTC−4

Santa Krus de la Sjerr (isp.: Santa Cruz de la Sierra [ˈsanta ˈkɾuz ðe la ˈsjera], lühetud Santa Krus) om lidn Bolivijan keskuzpalan päivnouzmas. Se om valdkundan kaikiš suremb lidn eläjiden lugun mödhe, Santa Krusan departamentan i sen Andres Ibanes-provincijan administrativine keskuz da municipalitet.

Istorii

Kalaidajad čanje-indejalaižed elänzoitiba lidnan tahondad edelkolumbižen aigan. Vl 1560 Njuflo de Čavesan ekspedicii oli oigetud Asunsjonaspäi panemha ispanižen eländpunktan alust neniš tahondoiš. Eländpunktan aluz om pandud vl 1561 nügüdläiženke nimenke kut uden provincijan administrativine keskuz, nügüdläižel sijal — vl 1595, 220 km päivlaskmha enččes sijadusespäi indejalaižiden londoiden tagut. Vhesai 1622 sirtud lidnan nimi oli San Lorenco (isp.: San Lorenzo), sid' pörtihe eziaugušt nimed, kudambad Njuflo de Čaves andoi ičeze kodilidnan mödhe Ispanijan päivlaskmas, nüg. pen' Santa Krus de la Sjerr-žilo avtonomižes Estremadur-ühthižkundas. Ispanižed missionerad mänetiba kaks' voz'sadad polenemha indejalaižiden vastustust lidnan ümbrištos. Šingotaškanzihe 1950-nzil vozil kivivoin da londuseližen gazan löudmižsijidenno.

Santa Krus de la Sjerran tegimišton päsarakod oma kivivoinhimii, sömtegimišt sijaližel torhudel, mecan ümbriradmine, sauvond, turizm.

Geografijan andmused

Lidn sijadase departamentan päivlaskmas, Pirai-jogen randal (Amazonasan bassein), 416 m ü.m.t. keskmäižel korktusel.

Matkad Sukre-pälidnhasai om 250 km suvipäivlaskmha orhal vai 480 km avtotedme.

Klimat om tropižen savannan, pil'vekaz vodes läbi. Tal'veližed suvitulleid todas viluhkod säd teravas. Voden keskmäine lämuz om +24,1 C°, redukun-keväz'kun +25,5..+26,3 C°, tal'ven (semendku-eloku) +20,4..+22,2 C°. Ekstremumad oma +1,3 C° (heinku, eloku) i +40,0 C° (uhoku, sügüz'ku, kül'mku). Il'man lämuz voib ületada +33 C° miččel taht kul. Paneb halad tal'vel harvoin lujas. Paneb sadegid 1453 mm vodes, enamba kül'mkus-uhokus (160..196 mm kus), vähemba kezakus-sügüz'kus (54..80 mm kus). Kun keskmäine relätivine nepsuz vajehtase 65..71 % röunoiš heinkus-kül'mkus, 76..77 % tal'vkus-kezakus.

Eläjad

Vl 1992 lidnan eläjiden lugu oli 1,030,000 ristituid. Läz 2,1 mln ristituid elädas ezilidnoidenke (2012, kahtenz' surtte lidnaglomeracii).

Transport

Avtobusad oma kundaližeks transportaks lidnas (132 maršrutad) da sen ümbrištos. Ajelijad rengazteidme (ühtenz' i kahtenz') paksumbad maršrutad oma vuelteros.

Rahvahidenkeskeine civiline Viru Viru-lendimport (VVI / SLVR, 4,1 mln passažiroid vl 2023) om avaitud vspäi 1983 seičemetoštkümnes kilometras pohjoižhe lidnaspäi. Tehtas reisid Latinižen Amerikan surihe lidnoihe, AÜV:oihe (Majami, Vašington), Madridha, La Pasha. Enzne rahvahidenkeskeine El' Trompil'jo-lendimport (SRZ / SLET) sijadase lidnas kahtes kilometras suvhe sen keskuztorguspäi. Se radoi passažiroiden täht vll 1920−2019, nügüd' sodamehed i pen' openduz- da ekstraordinarine aviacii kävutadas vanhad lendimportad.

Galerei

Lidnan municipalitetan tobmuden sauvuz (tal'vku 2019)
Ph. Lavrentijan kafedraline bazilikjumalanpert' (katoline, alusenpanend 1595), nägu vn 2025 sügüz'kus
Equipetrol-rajon, reduku 2025. Ventura-moll om ezimal oiktalpäi
Green Tower Santa Cruz vl 2024
Bolivijan privatine universitet (UPB, eloku 2025)
Rahvahidenkeskeižen Viru Viru-lendimportan terminal vn 2011 elokus

Sebruzlidnad

Brazilii Kuritib, Paran, Brazilii (vspäi 1989)
La Plat, Buenos Airesan agj, Argentin (1994)

Homaičendad

Santa Krus de la Sjerr Vikiaitas