Argun (lidn)

Argun
Аргун (ven.)
Устрада-ГӀала / Орга-ГІала (čeč.)

Lidnanznam	Flag
Valdkund	Venäma
Eläjiden lugu (2024)	43,456 ristitud
Pind	28,11 km²
Pämez'	Ibragim Ajubov (sügüz'ku 2019—)
Telefonkod	+7−87 147-xx-xxx
Avtokod	20, 95
Aigvö	UTC+3 (MSK+0)

Argun (ven.: Аргу́н, čeč.: Устрада-ГӀала / Орга-ГІала vai УстаргӀардойн-Эвла) om Venäman lidn da lidnümbrik Čečenijan Tazovaldkundan keskuzpalas.

Istorii

Eländpunktan aluz om pandud 18. voz'sadal kuti Ustargardoi. Ustar kändase «(azegišton) mastar» türkižiš kelišpäi, gardoi (čeč.: гIоьрда) om veičen (teran) toižend. Žilo sai lidnan statusad vl 1967, venäkel'ne nimituz om anttud jogen mödhe. Vspäi 1990 lidn alištub tazovaldkundan tobmudele oikti. Voziden 1994−1996 sodan aigan Argunan tegimišt i äjad pertid oliba muretud.

Argun šingotase sauvondmaterialiden tehmižel (raudbetontegesed, metalline lava), «VAZ»-avtoiden ühthekeradamižedheotandal (enzne mašiništon tegim jomižcehoiden täht), metalližtegesiden pästandal (sured vezibakad, katl'ad), sömtegimištol (sahar, jauh), mugažo Argunan LEK radab.

Geografijan andmused

Rajoniden da niiden keskusiden sijaduz tazovaldkundas vn 2020 kartal

Lidn sijadase ümbrikon pohjoižpäivnouzmas, Argun-jogen oiktal randal (čeč.: ЧІаьнтий-Орг, Terekan oigedpol'ne bassein), 116 m keskmäižel korktusel valdmeren pindan päl.

Matkad Grozniihasai om kümne kilometrad päivlaskmha raudtedme vai avtol. Toižed lähižed lidnad oma Gudermes 25 km pohjoižpäivnouzmha i Šali 10 km suvhe orhal vai 15 km avtol. Argun-raudtestancii om lidnan pohjoižes.

Tobmuz

Lidnümbrik Čečenijan Tazovaldkundan kartal (tal'vku 2019)

Kaik koume žilod mülüdas lidnümbrikho Argunan ližaks vspäi 2020: Čečen-Aul (9300 rist. vl 2019), Berdikel' (6945 rist. vl 2010) i Primikanije (313 rist. vl 2010). Lidnümbrikon pind om 130,21 km².

Edeližed lidnümbrikon pämehed (Deputatoiden nevondkundan ezimehed) oma Eskerhan Bašaev (kül'mku 2016 — reduku 2017) i Naiba Timirsultanov (reduku 2017 — sügüz'ku 2019). Lidnan mer om Iles Masaev vn 2020 heinkuspäi. Edeližed merad oma Has-Magomed Kadirov (eloku 2019 — heinku 2020), Ibragim Temirbajev (radoi vn 2019 elokuhusai).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 29 525 ristitud, vn 2021 — 41 622 ristitud. Kaik 36 486 eläjad oli lidnas i kaikes lidnümbrikos vl 2017. Kaikiš suremb lidnan ristitišt oli 41 767 eläjad vl 2009 (mitte-se eländpunkt mülüi Argunha kaks' vot) i om nügüd' (43 456 ristitud vl 2024). Kaiken lidnümbrikon ristitišt om 59 615 eläjad (vn 2021 andmused).

Rahvahad (2002): čečenalaižed — 98,1 %, venälaižed — 1,1 %, toižed rahvahad — 0,8 %.

Islaman pämečet' Aimani Kadirovan nimed om saudud lidnas vll 2011−2014.

Openduz

Lapsiden opendusen aluzkundad oma kahesa nimitadud i nomeruidud päivkodid (nomer 1..8), ühesa keskškolad (nomer 1..9), gimnazii nomer 13 S. D. Dikanijevan nimed, lapsiden sädamižen keskuz, lapsiden tehnižen sädamižen keskuz, čomamahtoiden škol, olimpižen varan sportškol dzüdos, sportškol nomer 2.

Argunan valdkundaline tehnikum om lidnan professionaližen opendusen aluzkundaks.

Galerei

• 
  Mečet' Aimani Kadirovan nimed, vn 2015 nägu
• 
  Ird lidnas (2006)
• 
  Üläkorktad sauvused (2019)
• 
  Päivlaskmaine bembelüläh avtoten päl vl 2018
• 
  Argun-raudtestancii vn 2025 sügüz'kus

Irdkosketused

• Lidnümbrikon Deputatoiden nevondkundan (Duman) sait (sovetargun.ru). (ven.)
• Municipaližen «Argun-lidn»-ühtnikan Administracijan sait (newargun.ru). (ven.)