Fokino (Merenrandaline rand)

Fokino
Фокино

Lidnanznam	Flag
Valdkund	Venäma
Eläjiden lugu (2025)	19,171 ristitud
Pind	16 km²
Pämez'	Aleksandr Baranov (tal'vku 2016—)
Telefonkod	+7−42 339-xx-xxx
Avtokod	25, 125
Aigvö	UTC+10 (MSK+7)

Sil sanal voib olda toižid znamoičendoid; miše nähta niid, tulgat tänna.

Fokino (ven.: Фо́кино) om Venäman lidn da lidnümbrik Merenrandaližen randan suves.

Tünvaldmerižen laivišton sodabaz sijadase SATÜ:s.

Istorii

Vl 1867 pordaigaline sodapost oli pandud kontroliruimha kuldan samišt lähižel Askol'd-sarel. Promislovk-eländpunktan aluz (ven.: Промысловка) om pandud vl 1891, vspäi 1958 oli radnikžiloks. Registriruihe Tihookeanskii-žilod vl 1963, vspäi 1967 se oli radnikžiloks i Promislovk mülüi sihe aigan mändes.

Vn 1980 redukun 4. päiväspäi om olmas sauptud territorijaks, nimitihe Škotovo-17-lidnaks rajonkeskusen mödhe. Vspäi 1994 oficialine nimi om nügüdläine Tihookeanskii-žilon ezmäižen sauvojan, Vitalii Fokin-admiralan kanzannimen mödhe. Laivad seištas valdmoidenno lähižes merikaras, ümbriratas da kaitas VA-laivoiden reaktorid.

Geografijan andmused

Fokinon lidnümbrikon sijaduz randas vn 2008 kartal

Lidnan keskuzpala sijadase mägidenkeskeižes katl'uses, kahtes kilometras randaspäi, 40 m ü.m.t. keskmäižel korktusel, mugažo om rajonid Tünen valdmeren randal.

Matkad Vladivostokhasai om nell'kümne viž kilometrad päivlaskmha orhal vai 130 km avtotedme Ussuriiskan lahten randpolel. Lähembaižed lidnad samhas avtol oma Sur' Kivi kaks'kümnes vides kilometras lodeheze i Nahotk 57 km päivnouzmha.

Tobmuz

Lidnanvuiččed Dunai- (7 614 rist. vl 2017) i Putätin-žilod (780 rist. vl 2017) mülüdas lidnümbrikho Fokinon ližaks. SATÜ:n pind — 291,29 km², korktused 0..530 m.

Eläjad

Vn 2010 Venäman rahvahanlugemižen mödhe lidnan eläjiden lugu oli 23 696 ristitud, lidnümbrikon — 32 164 ristitud, vn 2021 lidnan — 19 711 ristitud. Kaik 23 157 eläjad oli lidnas vl 2017. Kaikiš suremb lidnan ristitišt oli 25..26 tuhad eläjid vll 1996−2009 (26 500 rist. vl 1996 i vl 2003).

Ortodoksižen hristanuskondan ph. Ondrii Ezikuctud-apostolan jumalanpert' om saudud vll 1999−2000.

Openduz

Lapsiden opendusen aluzkundad oma viž nimitadud i nomeruidud päivkodid (nomer 1..3, 12, Rodničok «Purdeihut»), aluzškol nomer 257, kaks' keskškolad (nomer 251 i 256), gimnazii nomer 259, lapsiden sädamižen pert', čomamahtoiden škol, lapsiden da norišton sportškol. Ende ehtal'ne škol radoi lidnas mugažo. Niiden ližaks Dunai-žilos om kaks' päivkodid (nomer 13 i 35), kaks' keskškolad (nomer 253 i 258) i lapsiden da norišton Orbita-sportškol («Orbit»). Keskškol (nomer 254) radab Putätin-žilos.

Professionaližen opendusen aluzkundad ratas lähembaižiš lidnoiš.

Galerei

• 
  Marija Tsukanovan muštnik (2015)
• 
  Raštvoiden kanman ph. Ondrii Ezikuctud-apostolan jumalanpertiš, vn 2011 nägu
• 
  Dunai-žilon nägu Starcevan mägelpäi (2014)

Irdkosketused

• «Fokino-lidn»-SATÜ:n Duman oficialine sait (dumafokino.ru). (ven.)
• SATÜ:n Administracijan oficialine sait (adm.fokino-prim.ru). (ven.)