Lesozavodsk

Lesozavodsk
Лесозаводск
Lidnanznam;	Flag;
Valdkund	Venäma
Eläjiden lugu (2025)	34,289 ristitud
Pind	71 km²
Pämez'	Konstantin Bancejev; (uhoku 2021—)
Telefonkod	+7−42 355-xx-xxx
Aigvö	UTC+10 (MSK+7)

Lesozavodsk (ven.: Лесозаво́дск) om Venäman lidn Merenrandaližen randan päivlaskmas. Se om Lesozavodskan ümbrikon (edel 2024. vot — lidnümbrikon) administrativine keskuz da pala.

Istorii

Vspäi 1894 ristitud tuliba elämhä sihe Venälaižen imperijan Kijevan, Černigovan i Poltavan gubernijoišpäi, paniba stanicoiden alusid. Šingotihe mecan ümbriradmišt, «Ussurin mecanümbriradai kombinat» oli olmas nevondkundaližen aigan. Lesozavodsk-eländpunkt om sätud vl 1932 radnikžiloks nügüdläiženke nimenke Dal'les-žilon, Ussuri-stancijan (nüg. Lesozavodsk-1, om olmas jogen hural randal) da küliden ühtištusel. Žilo sai lidnan statusad vn 1938 2. päiväl uhokud. Vozil 1963−1992 lidn alištui randan tobmudele oikti.

Lesozavodsk šingotase raudtestancijal, mebel'fabrikal, omblendfabrikal, sömtegimišton edheotandoil.

Geografijan andmused

Lesozavodskan ümbrikon sijaduz randas vn 2008 kartal

Lidn sijadase ümbrikon päivlaskmas, Ussuri-jogen muugotil randoil, 80 m keskmäižel korktusel valdmeren pindan päl.

Matkad Vladivostokhasai om 269 km suvipäivlaskmha orhal vai 350 km «Ussuri»-avtotedme. Kitain valdkundröun om kümnes kilometras lodeheze. Lähembaižed lidnad oma Dal'nerečensk vižkümnes seičemes kilometras pohjoižpäivnouzmha orhal vai 72 km «Ussuri»-avtotedme, i kitajine Hulin'-lidn 63 km lodeheze avtotedme.

Tobmuz

Kaik ühesatoštkümne küläd da kaks' raudtestancijad mülüdas ümbrikho Lesozavodskan ližaks. Municipaližen ümbrikon pind — 3 063,8 km², se röunatab Kitainke.

Eläjad

Vn 2010 Venäman rahvahanlugemižen mödhe lidnan eläjiden lugu oli 37 034 ristitud, ümbrikon ristitišton nell' videndest, vn 2021 — 35 433 ristitud. Kaik 35 816 eläjad oli lidnas vl 2017. Kaikiš suremb lidnan ristitišt oli 45..46 tuhad eläjid vozil 1992−2001 (46 800 rist. vl 1996).

Ortodoksižen hristanuskondan Pühän Jumalanmaman Katken jumalanpert'^[1] om saudud lidnas vll 1998−2002, mugažo ph. Mikulai-čudonsädajan jumalanpert' om letud Ružino-stancijal vodele 2002.

Openduz

Arni lidnan lapsiden opendusen aluzkundad oma kahesa nomeruidud päivkodid (nomer 3, 5, 7, 10, 11, 13, 14, 105), kahesa keskškolad (nomer 1..5, 7, 34, 156), specialine (korrekcine) škol-internat, ümbrikon lapsiden sädamižen keskuz, čomamahtoiden škol (koume palakundad: horeografine, čomamahtoine, muzikaline), ümbrikon lapsiden da norišton sportškol, estetižen kazvatandan Radost' -keskuz («Ihastuz»), kanzan sauvondan abun keskuz. Ende ehtal'ne škol nomer 9 radoi mugažo.

Lidnan professionaližen opendusen aluzkundad oma Lesozavodskan industrialine kolledž^[2] i Vladivostokan bazižen medicinižen kolledžan filial^[3]. Mererandaline mectehnologijoiden, ekonomikan i transportan kolledž (ende tehnikum) kändihe industrialižen kolledžan palaks vspäi 2020.

Transport

Ružino-raudtestancii om Transsiban palaks, sijadase Habarovsk — Ussuriisk jonol, seižub jogen oiktal randal vspäi 1936. Stancii om kaikiš surembaks radonandajaks: vagondepo, vedimiden depo, raudten elektrovaratoitandan distancii sijadasoiš lidnas.

Avtobusad da taksid oma kundaližeks transportaks lidnas. Kümnekilometrine sarak «Ussuri»-avtotelpäi (A-370) tuleb lidnha päivnouzmpolespäi. Raudtesild i R449-ten avtotesild ristikoitas Ussuri-joged neciš lidnas.

Galerei

Avtotesild Ussuriš päliči vl 2012
Ružino-päraudtestancijan sauvuz vl 2005

Homaičendad

Irdkosketused

Lesozavodskan ümbrikon tobmuden aluzkundoiden oficialine sait (mo-lgo.ru). (ven.)

Lesozavodsk Vikiaitas

	Merenrandaližen randan lidnad
	Arsen'jev \| Artöm \| Dal'negorsk \| Dal'nerečensk \| Fokino \| Lesozavodsk \| Nahotk \| Partizansk \| Spassk Dal'nii \| Sur' Kivi \| Ussuriisk \| Vladivostok

[1] Lesozavodskan pühäpertin sait (hram-lesozavodsk.cerkov.ru). (ven.)

[2] Lesozavodskan industrialižen kolledžan sait (les-collegelik.ru). (ven.)

[3] Lesozavodskan filialan lehtpoled Vladivostokan bazižen medicinižen kolledžan vbmk1.ru-saital. (ven.)

[1]

[2]

[3]