Dal'negorsk

Dal'negorsk
Дальнегорск

Lidnanznam	Flag
Valdkund	Venäma
Eläjiden lugu (2025)	32,310 ristitud
Pind	31 km²
Pämez'	Aleksandr Terebilov (heinku 2019—)
Telefonkod	+7−42 373-xx-xxx
Aigvö	UTC+10 (MSK+7)

Lidnan kart i «Dal'polimetall»-edheotandan kaidraižuine raudte (2018)

Dal'negorsk (ven.: Дальнего́рск) om Venäman lidn Merenrandaližen randan päivnouzmas. Se om lidn randan alištusenke, Dal'negorskan lidnümbrikon (edel 1998. vot — rajonan) administrativine keskuz da pala.

Istorii

Eländpunktan aluz om pandud vl 1897 kuti Tetühe-žilo samha äimetalližid kivendoid, nimitihe jogen mödhe (kit.: 野猪河 ječžuhe «mecsigoiden jogi»). Vspäi 1930 oli radnikžiloks. Vl 1972 udesnimitihe Tetühe-radnikžilod nügüdläižikš. Vn 1989 sügüz'kun 22. päiväl Dal'negorsk sai lidnan statusad Venäman NFST:n Ülembaižen Nevondkundan Prezidiuman käskön mödhe.

Dal'negorsk šingotase kaivuztegimištol, sadas nenid substancijoid: tin, cink, hahktin, borühtnendad.

Geografijan andmused

Dal'negorskan lidnümbrikon sijaduz randas vn 2007 kartal

Lidn sijadase lidnümbrikon keskuzpalan suves, koumekümnes vides kilometras Japonijan meren randaspäi, Sihote-Alin'-mägisisteman päivnouzmaižil pautkil, 180..804 m ü.m.t. korktusil, 200 m keskmäižel korktusel. Dal'negorsk om läz kaks'kümnen viden kilometran pitte i kahten..koumen kilometran levette, seižub pidust' Rudnai-jogen randoid (ven.: Ру́дная 73 km pitte, edel 1972. vot Tetühe, lankteb merhe). Jogen alangišt om kaid i ümbärtud sambnuziden vulkanoiden pautkil.

Matkad Vladivostokhasai om 340 km suvipäivlaskmha orhal vai 490 km avtotedme (05H-100). Lähembaižed järedad eländpunktad oma lidnanvuitte Kavalerovo-žilo kuz'kümnes kahesas kilometras suvipäivlaskmha avtotedme i Arsen'jev-lidn 187 km päivlaskmha orhal vai 255 km sil-žo avtotel.

Klimat om ven mussonine, vilu Mererandaline joksend valatoitab sidä. Tahond om Edahaižen Pohjoižen arvoimižihe tazostadud. Voden keskmäine lämuz om +4,3 C°, kezakun-sügüz'kun +14,8..+19,4 C°, tal'vkun-uhokun −10..−12,8 C°. Tal'v om lumekaz, keza om neps pil'vekaz. Kaikiš päivoikahambad oma keväz'ku i reduku, kezakun-elokun pord om kaikiš pil'vekahamb.

Tobmuz

Kaik nell' žilod i koume küläd mülüdas lidnümbrikho Dal'negorskan ližaks.

Edeline lidnan da lidnümbrikon pämez' om Igor' Sahuta (kül'mku 2013 — 2018).

Eläjad

Vn 2010 Venäman rahvahanlugemižen mödhe lidnan eläjiden lugu oli 37,519 ristitud, ümbrikon ristitišton nell' videndest, vn 2021 — 33,655 ristitud. Kaik 35,034 eläjad oli lidnas vl 2017. Kaikiš suremb lidnan ristitišt oli 50,400 eläjad vl 1992.

Ortodoksižen hristanuskondan kaks' pühäpertid om saudud lidnas: phh. Borisan i Gleban puine jumalanpert' (om letud vll 1996−1998), ph. Jurgii-vägestusenkandajan pühäpert'.

Openduz

Lapsiden opendusen aluzkundad oma nimitadud i nomeruidud päivkodid (kümne lidnas: nomer 1, 2, 13, 15, 22, 30, 31, 33, kaks' muite nimitadud; i koume žiloiš: nomer 3, 7, 12), kuz' keskškolad lidnas (nomer 1, 2, 8, 17, 21, 25), Istok-gimnazii («Purde») i nell' keskškolad lidnümbrikon žiloiš (nomer 3, 5, 7, 12), lapsiden sädamižen keskuz, čomamahtoiden škol, lapsiden da norišton «Lotos»-sportškol, boksan i karguiden sekcijad, kanzan sauvondan abun keskuz (Seržantovo-žilos).

Dal'negorskan industrialiž-tehnologine kolledž om lidnan professionaližen opendusen aluzkundaks, mugažo Vladivostokan bazižen medicinižen kolledžan filial.

Galerei

• 
  Lidnan ühthine nägu Televizionnai-mägespäi (uhoku 2018)
• 
  Himine edheotand vl 2001
• 
  Kodielon holitišiden keskuz (2002)
• 
  Lendimport vl 2018

Irdkosketused

• Lidnümbrikon tobmuden aluzkundoiden oficialine sait (dalnegorsk-mo.ru). (ven.)