Sur' Kivi

Sur' Kivi
Большой Камень
Lidnanznam;	Flag;
Valdkund	Venäma
Eläjiden lugu (2024)	40,697 ristitud
Pind	119,82 km²
Pämez'	Rustäm Abušajev; (viluku 2022—)
Telefonkod	+7−42 335-xx-xxx
Avtokod	25, 125
Aigvö	UTC+10 (MSK+7)

Sur' Kivi (ven.: Большой Камень [bɐlʲˈʂoj ˈkamʲɪnʲ]) om Venäman lidn da lidnümbrik Merenrandaližen randan suves. Vhesai 2015 se oli sauptud lidnaks.

Istorii

Eländpunktan aluz om pandud vl 1947 kuti UNR-261-sauvomine (ven.: Стройка УНР-261), atomlaivoiden tegim radaškanzi vn 1954 3. päiväl tal'vkud. Vspäi 1956 kätihe radnikžiloks i nimitihe nügüdläižikš sijaližen merikaran mödhe. Vl 1963 poukahtihe järedad kived (kall' 15 metrhasai kortte) merikaran randal sauvomha tegimen cehad. Radnikžilo sai lidnan statusad vl 1989.

Sur' Kivi-lidn šingotase vedenalaižiden laivoiden kohendusen i civiližen laivansauvomižen «Tähtaz»-tegimel (ven.: «Звезда»), sömtegimišton edheotandoil (kalan püdon da ümbriradmižen laivišt, leibänkombinat), mugažo pästtas punümbriradajad mašiništod, seifid da meblid tegimel.

Geografijan andmused

Lidn sijadase Japonijan meren Ussuriiskan lahten randal, 48 m ü.m.t. keskmäižel korktusel. Sijaline Sur' Kivi-merikar om kaitud hüvin erazvuiččid tulleid vaste, se om 12 m süvütte, randanpird koume kilometrad.

Matkad Vladivostokhasai om kaks'kümne kilometrad päivlaskmha orhal lahten kal't, 110 km avtotedme Artöm-lidnan kal't vai 105 km raudtedme. Lähembaine lidn om Fokino 25 km suvipäivnouzmha avtotedme. Nevondkundaližen aigan ehtatim ühtenzoiti lidnad Vladivostokanke.

Tobmuz

Petrovk-žilo (ven.: село Петровка, 977 rist. vl 2010) i Suhodol-žilo (ven.: село Суходол, 301 rist. vl 2010) mülüdas lidnümbrikho Suren Kiven ližaks. Lidnümbrikon pind — 119,82 km².

Lidnümbrikon pämez' om sen Administracijan pämez'. Edeližed lidnan pämehed oma Aleksandr Andrühin (viluku 2018 — viluku 2022), Väčeslav Moskajev (edel vn 2018 vilukud). Lidnümbrikon Duman ezimez' om Aleksei Kuznecov vn 2017 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 39 257 ristitud, lidnümbrikon — 40 535 ristitud, vn 2021 lidnan — 41 825 ristitud. Vl 2017 kaik 38 493 ristitud elihe lidnas i 39 739 ristitud kaikes lidnümbrikos. Kaikiš suremb lidnan ristitišt oli 65 621 eläjad vl 1989.

Ortodoksižen hristanuskondan koume pühäpertid^[1] oma saudud lidnas: ph. Mikulai-čudonsädajan jumalanpert' (2007), Raštvoiden jumalanpert' (1999−2003), ph. Petr-apostolan päjumalanpert' (2010−2022).

Lapsiden opendusen aluzkundad (alištadud eländpunktoidenke) oma üks'toštkümne päivkodid, seičeme keskškolad (nomer 1..4, 8, 44 i Petrovk-žilon nomer 27), ehtal'ne škol kolonijanno nomer 29, lapsiden sädamižen keskuz, čomamahtoiden škol, «Lider»-sportškol. Edahaižen Päivnouzmman laivansauvomižen kolledž^[2] om lidnan professionaližen opendusen aluzkundaks.

Galerei

K-434-VA-laivan hat (2015)
K-419 Kuzbass-VA-laiv Edahaižen Päivnouzman «Zvezda»-tegimen dokas (2015, Tähtaz)
Edahaižen Päivnouzman «Zvezda»-tegimen ratud kuva (2010)
Petrovk-raudtestancii vl 2014

Homaičendad

Irdkosketused

Sur' Kivi Vikiaitas

	Merenrandaližen randan lidnad
	Arsen'jev \| Artöm \| Dal'negorsk \| Dal'nerečensk \| Fokino \| Lesozavodsk \| Nahotk \| Partizansk \| Spassk Dal'nii \| Sur' Kivi \| Ussuriisk \| Vladivostok

[1] Suren Kiven pühäpertid sobory.ru-saital. (ven.)

[2] Edahaižen Päivnouzmman laivansauvomižen kolledžan sait (dvssk-bk.ru). (ven.)

[1]

[2]