Glazov

Glazov
Глазов (ven.)
Глаз / Глазкар (udm.)
Lidnanznam;	Flag;
Valdkund	Venäma
Eläjiden lugu (2025)	85,340 ristitud
Pind	68,27 km²
Pämez'	Sergei Konovalov; (viluku 2019—)
Telefonkod	+7−34 141-xx-xxx
Avtokod	18
Aigvö	UTC+4 (MSK+1)

Glazov (ven.: Гла́зов, udm.: Глаз, Глазкар) om Venäman lidn da lidnümbrik Udmurtijan Tazovaldkundan pohjoižes. Se om tazovaldkundan nellänz' lidn eläjiden lugun mödhe, mugažo Glazovan rajonan administrativine keskuz, ei ole sen palaks.

Istorii

Eländpunkt mainitase ezmäižen kerdan vl 1678 kuti Glazovo-külä (ven.: деревня Глазова). Se sai makundan lidnan statusad vl 1780. Vl 1921 (viluku — kezaku) Glazov oli Votin avtonomižen agjan ezmäižeks administrativižeks keskuseks, sid' Iževsk. Toižen mail'man sodan aigan severz'-se sodategimid personalanke oliba sirtud lidnha NSTÜ:n päivlaskmaspäi, niiden potencial radoi valdkundan sodategimišton kompleksan hüvüdele sodan jäl'ghe-ki.

Glazovan ižandusen päsarakod oma südäitukuižen poltusen tehmine, harvoiden mametalloiden da niiden suladusiden sand, ahtištimiden da ventiläcijan mašiništon tehmine, sauvondmaterialiden pästand (metalltegesed), sömtegimišt (leibtegim, maidtegim, likörvodkantegim, lindvodindan holding), mecan ümbriradmine (sen tegim, meckombinat i mebel'fabrik), mugažo omblendfabrik, kombisötken tegim i tipografii ratas.

Geografijan andmused

Lidn sijadase Čepcanjogen hural randal (udm.: Чупчи́, Vätkan hurapol'ne bassein), 135..235 m korktusil, 150 m ü.m.t. keskmäižel korktusel. Langenijad Čepcha ližajoged: Sig (27 km pitte, ven.: Сыга, udm.: Ваёбыж, läbitab lidnan keskuzpalad) i Ubit' (100 km pitte, ven.: Убы́ть, udm.: Ыбыт, om lidnan päivlaskmaižeks röunaks).

Matkad Iževskhasai om 180 km suvhe. Lähembaižed lidnad sijadasoiš Kirovan agjas, ned oma Omutninsk 65 km lodeheze-pohjoižhe orhal vai 96 km avtol i Zujevk 93 km päivlaskmha orhal vai 123 km avtotel.

Tobmuz

Glazov om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez', edel vn 2015 redukud oli Duman ezimez'. Edeline lidnan Administracijan pämez' om Oleg Bekmemet'jev (reduku 2015 — reduku 2018). Lidnan Duman ezimez' om Igor' Volkov vn 2015 redukuspäi. Edeline Duman ezimez' om Aleksandr Veršinin (heinku 2010 — reduku 2015).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 95 854 ristitud, vn 2021 — 87 762 ristitud. Kaik 93 628 eläjad oli lidnas vl 2017. Kaikiš suremb lidnan ristitišt oli 106..107 tuhad eläjid vozil 1991−2001.

Rahvahad (ozutadud rahvahudenke vl 2021): venälaižed — 71,4 %, udmurtalaižed — 22,4 %, totarlaižed — 4,0 %, toižed rahvahad — 2,2 %.

Ortodoksižen hristanuskondan kuz' pühäpertid^[1] oma avaitud lidnas: Sündun Toižetamižen kafedraline päjumalanpert', nell' jumalanpertid, ph. Aleksandr Nevalaižen časoun'. Islaman pühäpert' om saudud vll 2010−2019.

Lapsiden opendusen aluzkundad oma severz'-se päivkodid, keskškolad, koume gimnazijad, fiziž-matematine licei, čomamahtoine škol, muzikškol, čomamahtoiden licei. Professionaližen opendusen aluzkundad: Glazovan valdkundaline inženeriž-pedagogine universitet V.G. Korolenkon nimed^[2] (edel vn 2023 heinkud nimituz oli Glazovan valdkundaline pedagogine institut), Glazovan politehnine kolledž^[3], Tazovaldkundaližen medicinižen kolledžan Glazovan filial^[4], Glazovan agragiž-tegimištoline tehnikum, toižiden lidnoiden üläopendusen aluzkundoiden koume filialad (Iževsk, Moskv).

Transport

Avtobusad (15 maršrutad) da taksid oma kundaližeks transportaks lidnas. Vspäi 1899 Glazov-raudtestancii radab «Kirov — Perm'»-keskustal.

Galerei

«Parafraz»-teatr (2015)
Bankan palakund (huralpäi) i lidnan kodirandantedištandmuzei (oiktalpäi) ühtes pertiš (2019)
Sündun Toižetamižen kafedraline päjumalanpert', vn 2019 nägu
Čepeckii mehanine tegim vl 2011
Glazovan likörvintegim vl 2009
Glazovan valdkundaližen pedagogižen institutan päsauvuz (2019)
«Rossija»-kul'turkeskuz (2019, Venäma)
«Progress»-jäpert'kulu (2011)
Avtotesild Čepcas päliči vl 2012
Glazov-päraudtestancijan sauvuz vl 2019