Votkinsk

Votkinsk
Воткинск (ven.)
Вотка / Вотка кар (udm.)
Lidnanznam;	Flag;
Valdkund	Venäma
Eläjiden lugu (2021)	97,471 ristitud
Pind	112,18 km²
Pämez'	Aleksei Zametajev; (kezaku 2018—)
Telefonkod	+7−34 145-xx-xxx
Avtokod	18
Aigvö	UTC+4 (MSK+1)

Votkinsk (udm.: Вотка, Вотка кар, ven.: Во́ткинск) om Venäman lidn da municipaline ühtnik (lidnümbrik) Udmurtijan Tazovaldkundan päivnouzmas. Se om kahtendel sijal eläjiden lugun mödhe tazovaldkundas. Lidn om Votkinskan rajonan administrativižeks keskuseks mugažo (ei ole sen palaks).

Istorii

Eländpunktan aluz om pandud vl 1759 kuti žilo sauvomha Votkinskan raudantegint Pötr Šuvalov-grafan tahton mödhe. Radnikžilo sai lidnan statusad vl 1935. Om Udmurtijan palaks vspäi 1937. Votkinskan tegim om valdkundan järed edheotand tähäsai.

Votkinskan ižandusen päsarakod oma sodakompleksan tehmine (kontinentidenkeskeižed ballistižed raketad — «Jars», «Bulav», «Topol'-M», operativiž-taktižed «Iskander»-raketad), mašiništonsauvomine (kivivoin da gazan samižen täht i kaivuzmašiništ), elektromašiništon pästand, sauvondmaterialiden tehmine (savič, bazal'tizoläcii), sömtegimišt.

Geografijan andmused

Lidn sijadase Votk-jogen (udm.: Идӟи) i Votkinskan uiton randoil (Kamanjogen oigedpol'ne bassein), 130 m keskmäižel korktusel valdmeren pindan päl.

Matkad Iževskan keskuzpalhasai om 52 km suvipäivlaskmha orhal vai 54 km avtotedme. Lähembaine lidn om Čaikovskii (Permin rand) 32 km suvhe orhal vai 42 km avtol.

Tobmuz

Votkinsk om lidnümbrikon üks'jäižeks eländpunktaks.

Edeline lidnümbrikon pämez' om Vladimir Perevozčikov (viluku 2012 — viluku 2018).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 99 022 ristitud, vn 2021 — 97 471 ristitud. Kaik 98 063 eläjad oli lidnas vl 2017. Kaikiš suremb lidnan ristitišt oli 105 tuhad eläjid vozil 1991−1993.

Rahvahad (2021): venälaižed — 90,48 %, udmurtalaižed — 5,55 %, totarlaižed — 2,55 %, toižed rahvahad — 1,42 %.

Ortodoksižen hristanuskondan kahesa pühäpertid^[1] oma kaičenus i saudud lidnas: Pühän Jumalanmaman Blagoveššenjan päjumalanpert' (saudihe vll 1817−1818, surenzoittihe vodele 1863), viž jumalanpertid i kaks' časounäd. Islaman uz' pühäpert' vanhan sijas om avaitud vl 2021.

Lapsiden opendusen aluzkundad oma severz'-se päivkodid, keskškolad. Professionaližen opendusen aluzkundad oma mašinansauvomižen tehnikum^[2], Tazovaldkundan medkolledžan Votkinskan filial^[3], muzikaliž-pedagogine kolledž^[4], Iževskan üläopendusen aluzkundoiden kaks' filialad.