Kambark

Kambark
Камбарка (ven. i udm.)
Valdkund	Venäma
Eläjiden lugu (2021)	10,080 ristitud
Pind	26,473 km²
Telefonkod	+7−34 153-xx-xxx
Avtokod	18
Aigvö	UTC+4 (MSK+1)

Kambark (udm.: Камбарка / Камбар, ven.: Камба́рка) om Venäman lidn Udmurtijan Tazovaldkundan suvipäivnouzmas. Se om Kambarkan ümbrikon (edel vn 2021 semendkud — rajonan) administrativine keskuz da pala.

Istorii

Eländpunktan aluz om pandud kuti žilo kaugedraudan valamižtegimenno, saudihe tegint vozil 1761−1767 (nüg. mašiništonsauvomižen tegim). Om nimitadud Kambark-jogen mödhe, jogen nimituz sündui baškiralaižiden Kanbar-rodun nimespäi. Vl 1936 kätihe Kambarkad radnikžiloks, vspäi 1937 mülüb Udmurtijha. Vl 1945 radnikžilo sai lidnan statusad.

Kambarkan ižandusen päsarakod oma transportmašinoiden sauvomine (Kambarkan mašinansauvomižen tegim^[1]: lämuzvedimed, raudteiden kohenduzmašinad), metallkonstrukcijoiden tehmine, mecan ümbriradmine, pompiden da metalližiden peitkonoriden pästand, himine sarak (reagent kivivoin samižen täht).

Geografijan andmused

Lidn sijadase ümbrikon suves, ühesas kilometras Kamanjogespäi, sen hural randpolel, Kambarkan uiton randoil (om olmas vspäi 1767), 75 m ü.m.t. keskmäižel korktusel.

Matkad Iževskhasai om 116 km lodeheze. Avtotesild om läz lidnad Kam-joges päliči vspäi 2016, se om maksline. Kambark-raudtestancii om olmas vspäi 1919, «Kazan' — Jekaterinburg»-raudtekeskust läbitab lidnad.

Tobmuz

Kambark oli lidnankundan üks'jäižeks eländpunktaks.

Lidnan üks' jäl'gmäižiš pämehišpäi oli Marat Suleimanov (2015 — sulaku 2019). Kambark-lidnan erigoittud Administracii om likvidiruidud vn 2021 lopus.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 11 021 ristitud, rajonan ristitišton koume videndest, vn 2021 — 10 080 ristitud. Kaik 10 477 eläjad oli lidnas vl 2017. Kaikiš suremb lidnan ristitišt oli 14 121 eläjad vl 1970.

Rahvahad (2012): venälaižed — 84,7 %, totarlaižed — 8,0 %, udmurtalaižed — 2,9 %.

Ortodoksižen hristanuskondan Jumalanmaman Emäganpäivän pühäpert'^[2] om avaitud lidnas, kaks' tošt jumalanpertid oma kaičenus vaiše paloin.

Lapsiden opendusen aluzkundad oma viž nimitadud päivkodid, kaks' keskškolad (nomer 2 i 3), licei nomer 1 N.K. Krupskajan nimed, lapsiden da norišton pert', lapsiden čomamahtoiden škol, Kambarkan sportškol. Kambarkan mašiništonsauvomižen kolledž^[3] om lidnan professionaližen opendusen aluzkundaks, se om Iževskan valdkundaližen tehnižen universitetan filialaks.