Hobart

Hobart

Lidnanznam	Flag
Valdkund	Avstralii
Eläjiden lugu (2024)	254,930 ristitud
Pind	1,695,3 km²
Pämez'	Anna Reinolds (2018—)
Telefonkod	+61-(0)3−62-xxx-xxx
Aigvö	tal'vel UTC+10, kezal UTC+11

Suren Hobartan kart tenke lendimporthasai (2008)

Hobart (mugazo anglijan kelel, virktas [ˈhoʊbɑːrt]) om Avstralijan lidn da valdmeriport, kahtenz' süvütte mail'mas. Se sijadase Tasmanii-saren suvipäivnouzmas, om Tasmanii-štatan administrativižeks keskuseks da palaks.

Istorii

Eländpunktan aluz om pandud vn 1804 20. päiväl uhokud (kahtendeks Sidnein jäl'ghe) kuti türm Suren Britanijan ogernikoiden täht. Nimitihe Britanižen imperijan soda- da kolonijoiden azjoiden ministran Hobart-lordan oiktastuseks, ezmäi Hobart Town, Hobarton. Hobart sai «siti»-statusad vn 1842 21. päiväl elokud.

Nügüd'aigan lidn om laivansauvomižen edheotandoiden päsija, rahvahidenkeskeižen turizman järed keskuz, laivoiden oigendusen keskuz Antarktidha. Ende Hobart oli kitoiden samižen päižeks portaks.

Geografijan andmused

Lidnan sijaduz štatas i valdkundas vn 2005 kartal

Hobart sijadase Deruent-jogen (angl.: Derwent) estuarijan randoil. Kunanii/Vellington-mägi seižub vižtoštkümnes kilometras päivlaskmha lidnan azjaližes keskusespäi, mägenpä om 1271 m ü.m.t. kortte.

Klimat om ven valdmeren. Keza om päivoikaz, tal'vaig om pil'vekaz. Voden keskmäine lämuz om +12,6 C°, tal'vkun-keväz'kun +16,2..+17,9 C°, kezakun-elokun +8,9..+9,7 C°. Maksimaline registriruidud lämuz om +41,8 C° (viluku), minimaline — −2,8 C° (kezaku, heinku), mägen päl — −9,1 C°. Kezaaigan minimum om +3,3 C° (tal'vku, viluku), tal'vaigan maksimum om +24,5 C° (eloku). Voib panda halad semendkus-redukus. Paneb sadegid 566 mm vodes, läz tazomäras kuidme, enamba elokus-tal'vkus (51..63 mm kus), vähemba uhokus-keväz'kus (37..38 mm kus). Kun keskmäine relätivine nepsuz vajehtase 58..64 % röunoiš semendkus-heinkus, 49..53 % sügüz'kus-keväz'kus.

Eläjad

Vn 2016 Avstralijan rahvahanlugemižen mödhe lidnan ristitišt ezilidnoidenke (Sur' Hobart) oli 222,356 eläjad vai Tasmanijan kaks' videndest, ičeze Hobart-lidnan — 50,439 eläjad. Vn 2021 rahvahanlugemižen mödhe ned-žo lugud oliba 247,068 i 55,077 eläjad. Kaik 229 tuhad eläjid oli ezilidnoidenke vl 2018. Kaikiš suremb lidnan ristitišt ezilidnoidenke om nügüd'.

Suren Hobartan ristituiden videndez om sündnu verhiže maihe.

Edeližed lidnan pämehed oliba Ron Kristi (2018), Sju Hikki (kül'mku 2014 — keväz'ku 2018).

Transport

Avtobusad da venehed oma kundaližeks transportaks lidnan südäimes.

Rahvahidenkeskeine civiline Hobart-lendimport (HBA / YMHB, 2,4 mln passažiroid 2016−17 finansižel vodel) sijadase Kembridž-ezilidnas, seičemetoštkümnes kilometras pohjoižpäivnouzmha lidnan keskuzpalaspäi. Sišpäi tehtas reisid Avstralijan surihe lidnoihe, jügureisid Kitaihe.

Galerei

• 
  Pühän Marijan päjumalanpert' (katoline), vn 2022 sügüz'kun nägu
• 
  Tasmanijan universitetan Meren da Antarktikan tedoidusiden institut (viluku 2020)
• 
  Vanhan i uden čomamahton muzei (MONA, tal'vku 2015)
• 
  Kunigazline teatr (Theatre Royal, alusenpanend 1837, keväz'ku 2023)
• 
  Hobart-lendimport vn 2015 kül'mkus

Irdkosketused

• Lidnan ohjastusen oficialine sait (hobartcity.com.au). (angl.) (jap.) (kit.)