Adelaid

Adelaid
Adelaide

Lidnanznam	Flag
Valdkund	Avstralii
Eläjiden lugu (2017)	1,333,927 ristitud
Pind	3,257,7 km²
Pämez'	Martin Hes (kül'mku 2014—)
Telefonkod	+61−8
Aigvö	tal'vel (sulaku-sügüz'ku) UTC+9:30, kezal (reduku-keväz'ku) UTC+10:30

Lidnan kart

Adelaid (angl.: Adelaide [ˈædəleɪd]) om lidn Avstralijan suves. Se om valdkundan videnz' lidn eläjiden lugun mödhe, Suviavstralii-štatan pälidn.

Istorii

Eländpunktan aluz om pandud igähižen kaurna-rahvahan tahondas, vn 1836 28. päiväl tal'vkud kuti žilo joudjaližen immigracijan täht. Om nimitadud britanižen Vil'hel'm IV-kunigahan (ohjasti vll 1830−1836) Adelaida-akan-kunigaznaižen nimen mödhe. Ižandusen ezmäižed vedimed oliba lambhiden kazvatand villaha näht, hobedan, vas'ken i hahktinan samine. Vl 1954 saudihe vedenveimen Murrei (Marri)-jogespäi. Vl 1955 rahvahidenkeskeine lendimport zavodi radod.

Adelaid šingotase kaičendministrusen edheotandoil (VA-laivoiden tehmine, tedoinstitutad), avtosauvomižel (Holden i Mitsubishi), medicinižen i elektronižen ladimišton tehmižel.

Geografijan andmused

Lidn sijadase Indižen valdmeren Sent-Vinsent-lahten randal, 0..727 m korktusil, 50 m ü.m.t. keskmäižel korktusel. Šingotase planan mödhe ičeze alusenpanendaspäi. Matkad Kanber-pälidnhasai om 960 km päivnouzmha orhal vai 1160 km avtotedme. Lähembaine järed lidn om Mel'burn 650 km suvipäivnouzmha orhal vai 725 km avtotedme.

Klimat om Keskmeren kuivahk, ani ei oleskele haloid i lunt. Heinkun-elokun lämuz om +11..+12 C°, uhokun — +23 C°, voden keskmäine lämuz om +17 C°. Absolütine minimum oleli −2 C° rahvahidenkeskeižen lendimportan rajonas. Paneb sadegid 445 mm vodes, vähemb kül'mkus-keväz'kus (17..24 mm kus).

Eläjad

Vl 2014 eläjiden lugu oli 1 304 631 ristitud, štatan enamba seičemed kümnendest.

Kodikelen mödhe (vn 2016 rahvahanlugemine): anglijan kel' — 75,4%, italijan kel' — 2,1%, kitajan kel' — 2,1%, grekan kel' — 1,7%, vjetnaman kel' — 1,4%, kantonan pagin — 0,7%, toižed keled — 16,6%.

Adelaidan universitet radab vspäi 1874.

Transport

Avtobusad, tramvaid, dizel'- da elektroezilidnjonused oma kundaližeks transportaks lidnas. Meriport om olmas lidnas.

Rahvahidenkeskeine civiline Adelaid-lendimport (ADL, 8 mln passažiroid 2016/17 finansižel vodel (heinku — kezaku)) sijadase 6 km päivlaskmha lidnan keskusespäi. Tehtas reisid Suvipäivnouzmaižen Azijan i Persijan lahten järedoihe lidnoihe, Valdmerimaiden lähižihe maihe, mugažo Avstralijan äjihe lidnoihe. Toine Parafel'd-lendimport om 18 km pohjoižhe lidnan keskusespäi, kävutadas penen aviacijan täht (212,8 tuhad lendahtandoid i ištutandoid 2010/11 finansižel vodel).

Irdkosketused

• Lidnan oficialine sait (cityofadelaide.com.au). (angl.)