Novodvinsk

Novodvinsk
Новодвинск
Lidnanznam;	Flag;
Valdkund	Venäma
Eläjiden lugu (2023)	32,826 ristitud
Pind	41 km²
Pämez'	Marija Hvostük; (kül'mku 2023—,; velgusentäutai)
Telefonkod	+7−81 852-xx-xxx
Avtokod	29
Aigvö	UTC+3 (MSK+0)

Novodvinsk (ven.: Новодви́нск) om Venäman lidn da lidnümbrik Arhangel'skan agjan pohjoižes, Arhangel'skan suvine ezilidn.

Istorii

Vspäi 1924 penen «Rusked zor'a»-kommunan aluz (ven.: Красная заря) oli pandud rahvahatomha sijha Pohjoižen Dvinan Mečka-Polai-hijaman randal. Vl 1935 zavottihe sauda sul'fit-cellülozišt kombinatad necil sijal i nimitihe sauvomišt Arhbumstroi:aks.

Nügüdläižen eländpunktan aluz om pandud vl 1936 sauvojiden žiloks kombinatanno, kävutihe türmatud-ki mehiden radod. Žilo sai oficiališt statusad vl 1941 kuti Vorošilovskii-radnikžilo, sikš miše kombinat oli jo nimitadud Vorošilovan kanzannimel. Vl 1957 udesnimitihe sidä Pervomaiskii-žiloks, mülüi Arhangel'sk-lidnan Isakogorkan rajonha. Lidnanvuitte žilo sai lidnan statusad vn 1977 24. päiväl kül'mkud, nimitihe nügüdläižikš, se kändihe lidnaks agjan alištusenke.

Arhangel'skan cellülozbumagaine kombinat om järed lidnan edheotand (3,9 tuh. radnikoid vl 2015). Sen ližaks, raudbetontegesiden tegim i Arhangel'skan fanerantegim^[1] ratas Novodvinskas.

Geografijan andmused

Lidn sijadase Pohjoižen Dvinan (sen huran Mečka-Polai-hijaman) hural randal, 20 m ü.m.t. keskmäižel korktusel, kümnes kilometras päivnouzmha M8-avtotespäi.

Matkad Arhangel'skan keskushesai om 20 km pohjoižhe orhal vai 27 km avtotedme, röunhasai — üks' kilometr jogedme lodeheze.

Tobmuz

Pavlovo-külä (ristitišton lugu om tundmatoi) mülüb lidnümbrikho Novodvinskan ližaks.

Lidnümbrikon pämez' om sen Administracijan pämez'. Edeline lidnan pämez' om Sergei Andrejev (sulaku 2016 — kül'mku 2023). Lidnümbrikon Deputatoiden nevondkundan ezimez' om Viktor Dmitrijevskii vn 2022 redukuspäi. Edeline nevondkundan ezimez' om Andrei Korotkov (reduku 2017 — reduku 2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 40 615 ristitud, vn 2021 — 33 294 ristitud. Kaik 38 735 eläjad oli lidnas vl 2017. Kaikiš suremb lidnan ristitišt oli 49..50 tuhad eläjid vozil 1986−1995.

Rahvahad (enamba 0,4 % vl 2021): venälaižed — 90,9 %, ukrainalaižed — 0,4 %, toižed rahvahad — 1,5 %, rahvahuden ozutandata — 7,2 %.

Ortodoksižen hristanuskondan nell' pühäpertid^[2] oma avaitud lidnas: kaks' jumalanpertid i kaks' časounäd.

Lapsiden opendusen aluzkundad oma kahesa nimitadud i nomeruidud päivkodid (sidä kesken nomer 10, 12..14, 17), kuz' keskškolad (nomer 1, 2, 3, 4, 6, 7), Novodvinskan gimnazii, lapsiden sädamižen pert', norišton pert', čomamahtoiden škol, lapsiden da norišton sportškol. Novodvinskan industrialine tehnikum^[3] om lidnan professionaližen opendusen aluzkundaks.

Transport

Avtobusad da taksid oma kundaližeks transportaks lidnas, ned-žo ühtenzoittas lidnad lähižidenke eländpunktoidenke, niiden kesken Severodvinskanke.

Lähembaine Isakogork-raudtestancii sijadase ühesas kilometras päivlaskmha i mülüb Arhangel'skha, radab passažiroiden i jüguiden täht.

Galerei

Jumalanmaman Katken puine pühäpert' (2019, om saudud vl 1995)
Arhangel'skan cellülozbumagaine kombinat, vn 2009 nägu
Pühän hengen tulendan jumalanpert' (2019, om saudud vl 2006)
Lidnan ühthine nägu Pohjoižen Dvinan vastrandaspäi (2019)

Homaičendad

↑ Arhangel'skan fanerantegimen sait (arkpf.ru). (ven.) (angl.)
↑ Novodvinskan pühäpertid sobory.ru-saital. (ven.)
↑ Novodvinskan industrialižen tehnikuman sait (novindteh.ru). (ven.)

Irdkosketused

Novodvinsk Vikiaitas

	Arhangel'skan agjan lidnad
	Arhangel'sk \| Kargopol' \| Koräžm \| Kotlas \| Mezen' \| Mirnii \| Nar'jan Mar \| Novodvinsk \| Nändom \| Oneg \| Severodvinsk \| Sol'vičegodsk \| Šenkursk \| Vel'sk

[1] Arhangel'skan fanerantegimen sait (arkpf.ru). (ven.) (angl.)

[2] Novodvinskan pühäpertid sobory.ru-saital. (ven.)

[3] Novodvinskan industrialižen tehnikuman sait (novindteh.ru). (ven.)

[1]

[2]

[3]