Volžsk

Volžsk
Волжск (ven.)
Юлсер-Ола (mägimar. i nitmar.)
Lidnanznam;	Flag;
Valdkund	Venäma
Eläjiden lugu (2023)	52,164 ristitud
Pind	39,47 km²
Pämez'	Tat'jana Binina; (tal'vku 2021—,; Татьяна Бынина)
Telefonkod	+7−83 631-xx-xxx
Avtokod	12
Aigvö	UTC+3 (MSK+0)

Volžsk (ven.: Волжск, mugažo totaran kelel, mägimar. i nitmar.: Юлсер-Ола) om Venäman lidn da lidnümbrik Marii Elan Tazovaldkundan kaikiš suvižembas čokkoimes. Se om Volžskan rajonan administrativine keskuz mugažo, ei mülü rajonha.

Istorii

Eziauguine eländpunkt oli Lopatino-külä, mainitase 19. voz'sadaspäi. Nügüdläižen eländpunktan aluz om pandud vl 1938 Lopatino-žiloks sauvomha cellülozbumagašt kombinatad. Radnikžilo sai lidnan statusad Volžsk-nimenke vl 1940.

Volžskan ižandusen päsarakod oma cellülozbumagaine, mašiništonsauvomine (vilugoitimed), sauvondmaterialiden (gazbeton), meblin tehmine. Nevondkundaližen aigan pästtihe magnitofonid-ki.

Geografijan andmused

Lidn seižub Volg-jogen hural randal, 60 m keskmäižel korktusel valdmeren pindan päl.

Matkad Joškar-Olhasai om 97 km pohjoižhe avtotedme. Lähembaižed lidnad oma Tatarstanan Zelenodol'sk kümnes kilometras päivnouzmha avtotedme, Kazan' 49 km päivnouzmha avtotedme, Innopolis 28 km suvipäivnouzmha avtotedme, Čuvašijan Kozlovk koumes kilometras suvipäivlaskmha orhal (Volgan vastrandal), Novočeboksarsk 60 km päivlaskmha avtotedme.

Tobmuz

Volžsk om lidnümbrikon üks'jäižeks eländpunktaks. Kaik ühesa lidnanlaptad, kaks' tegimištrajonad i koume žilod oma lidnan territorialižikš paloikš.

Lidnümbrikon tobmuden pämez' om sen Deputatoiden nevondkundan ezimez'. Nadežda Len'kova radoi nevondkundan ezimehen hätken aigan, vn 2006 vilukuspäi vn 2019 redukuhusai. Lidnümbrikon Administracijan pämez' om Rafis Šagvaleev vn 2022 uhokuspäi.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 55 659 ristitud, vn 2021 — 53 013 ristitud. Kaik 54 519 eläjad oli lidnas vl 2017. Kaikiš suremb lidnan ristitišt oli enamba 60 tuhad eläjid vozil 1987−2001 (62,5 tuh. ristitud vl 1992).

Rahvahad (enamba 0,4 % vl 2010): venälaižed — 67,9 %, marilaižed — 13,5 %, totarlaižed — 13,2 %, čuvašalaižed — 1,6 %, ukrainalaižed — 0,5 %, mordvinalaižed — 0,4 %, toižed rahvahad — 1,1 %, rahvahuden ozutandata — 1,8 %.

Ortodoksižen hristanuskondan nell' pühäpertid^[1] oma saudud lidnas: ph. Mikulai-čudonsädajan kafedraline päjumalanpert', kaks' jumalanpertid i časoun'. Islaman üks'jäine pühäpert' om avaitud, se om mahallä-mečet'.

Openduz

Lapsiden opendusen aluzkundad oma kaks'kümne nimitadud i nomeruidud päivkodid (nomer 1..4, 7, 8, 12..14, 16, 17, 19..23, 25, 26, 28, 29), aluzškol (nomer 3), kahesa keskškolad (nomer 1, 2, 4, 5, 6, 9, 10, 12), licei (nomer 7), avoin (aterjoiden) škol, škol-internat, lapsiden da norišton sädamižen pert'kulu, ližaopendusen Kaskad-keskuz, čomamahtoiden škol, čomamahtoine škol, fizkul'turan da sportan šingotesen keskuz (ende olimpižen varan lapsiden da norišton sportškol grekanriman borcuindas i meladuses), tehnižen sädamižen keskuz, Volžskan ekologine keskuz.

Professionaližen opendusen aluzkundad: Volžskan industrialiž-tehnologine tehnikum^[2], Sauvomiž-tegimištoline kolledž^[3], Joškar-Olan medškolan filial, üläopendusen aluzkundoiden nell' filialad.

Transport

Avtobusad da maršruttaksid oma kundaližeks transportaks lidnas. Avtobusad da ezilidnelektrojonused ühtenzoittas Kazaninke, Volžsk-raudtestancii radab vspäi 1940.

Kaik kaks' valdmad oma saudud Volgan randal lidnan röunoiš.