Kozlovk

Kozlovk
Козловка (ven.)
Куславкка (čuv.)
Lidnanznam;	Flag;
Valdkund	Venäma
Eläjiden lugu (2021)	8,450 ristitud
Pämez'	Lübov' Osipova; (reduku 2020—)
Telefonkod	+7−83 534-xx-xxx
Avtokod	21, 121
Aigvö	UTC+3 (MSK+0)

Kozlovk (ven.: Козло́вка, čuv.: Куславкка) om Venäman lidn Čuvašijan Tazovaldkundan pohjoižpäivnouzmas. Se om Kozlovkan rajonan i Kozlovkan lidnankundan administrativine keskuz.

Istorii[redaktiruida | redaktiruida purde]

Nügüdläižen lidnan territorijal kaikiš amuižemban eländpunktan aluz om pandud vl 1671 kuti Bogorodskoje-külä (toine nimi — Vauged Voložk, sid' Belovolžskoje). Vl 1938 Kozlovk-külä kändihe radnikžiloks. Vspäi 1959 Belovolžskoje-külä mülüb Kozlovkha, i vspäi 1965 ližatihe koume küläd. Vl 1967 Kozlovk sai lidnan statusad.

Kozlovkan ižandusen päsarak om mašinansauvomine (furgonad jüguavtoiden täht, plazmleiktandan portaližed tömašinad), mugažo kalanümbriradmižen edheotand i omblendfabrik ratas lidnas.

Geografijan andmused[redaktiruida | redaktiruida purde]

Lidn sijadase Volgan oiktal randal (Čeboksaran vezivaradim), 70 m keskmäižel korktusel valdmeren pindan päl. Matkad Čeboksarhasai om 97 km lodeheze avtotedme.

Jogivaldmad da ehtatuz Volgas päliči oma lidnas. Marii Elan Tazovaldkundan Volžsk-lidn seižub vastrandal koumes kilometras pohjoižpäivnouzmha.

Koume pen't küläd mülüdas lidnankundha Kozlovkan ližaks. Lidnankundan pind om 50,76 km².

Eläjad[redaktiruida | redaktiruida purde]

Vn 2010 kaiken Venäman rahvahanlugemižen mödhe lidnan eläjiden lugu oli 10 359 ristitud. Kaikiš suremb lidnan ristitišt oli enamba 13 tuhad eläjid vozil 1992−1998 i 2002−2003 (13 300 rist. vl 1996). Vl 2017 kaik 9 058 ristitud elihe lidnas i 9 239 ristitud kaikes lidnankundas.

Ortodoksižen hristanuskondan Kazanin Jumalanmaman jumalanpert'^[1] om udessaudud lidnas vll 1990−2005.

Kozlovkan äiprofil'ne agrarine kolledž^[2] om professionaližen opendusen aluzkundaks.

Edeline lidnankundan pämez' (Deputatoiden suiman ezimez') om Aleksandr Gofman (2011−2015). Lidnankundan Administracijan pämez' om Andrei Pocelujev vn 2022 vilukuspäi.

Galerei[redaktiruida | redaktiruida purde]

Kozlovkan rajonan käskuzkund (2006, ende Volčkov-torgovanan pert')
Volgan nägu lidnas (2009)
Socialižen sferan aluzkundad pertištos vn 2014 vilukus
Lobačevskii-matematikantedomehen muzei hänen enččen usadiban ühtes pertišpäi (2015)