Jadrin

Jadrin
Ядрин (ven.)
Етĕрне (čuv.)

Lidnanznam
Valdkund	Venäma
Eläjiden lugu (2021)	7,918 ristitud
Pind	54,71 km²
Pämez'	Vladislav Mihailov (sulaku 2017—)
Telefonkod	+7−83 547-xx-xxx
Avtokod	21, 121
Aigvö	UTC+3 (MSK+0)

Jadrin (ven.: Я́дрин, čuv.: Етĕрне, nitmar.: Ядырна, mägimar.: Йӓдӹрнӓ) om Venäman lidn da lidnankund Čuvašijan Tazovaldkundan lodehes. Se om Jadrinan municipaližen ümbrikon (edel 2023. vot — rajonan) administrativine keskuz (vspäi 1927) da üks'jäine lidn.

Istorii

Eländpunktan aluz om pandud vl 1590 kuti varjoičendpost. Külä sai lidnan statusad vl 1781 oficialiženke Jadrinsk-nimitusenke, möhemba nimi lüheni nügüdläižeks.

Jadrinan ižandusen päsarakod oma sömtegimišt (spirttegim, maidon da lihan ümbriradmižen edheotandad), sauvondmaterialiden tehmine (savičun tegim), mugažo metallmašiništon tegim i omblendfabrik ratas. Lidn om maižanduzrajonan keskuseks.

Geografijan andmused

Jadrinan rajonan sijaduz tazovaldkundas vn 2009 kartal

Lidn sijadase ümbrikon päivlaskmas, Sur-jogen hural randpolel, päivlaskmha jogen känmaspäi, 70 m ü.m.t. keskmäižel korktusel.

Matkad Čeboksarhasai om kuz'kümne kilometrad päivnouzmha orhal vai 77 km avtotedme. Lähembaine raudtestancii radab Šumerl'-lidnas 59 km suvhe avtotedme.

Tobmuz

Jadrin oli lidnankundan üks'jäižeks eländpunktaks.

Lidnankundan tobmuden pämez' oli sen Deputatoiden nevondkundan ezimez'. Edeline lidnan nevondkundan pämez' oli Irina Oblinova (reduku 2015 — 2017). Jäl'gmäine lidnan Administracijan pämez' oli Igor' Čečeneškin (kül'mku 2020 — kezaku 2022).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 9 614 ristitud, rajonan ristitišton koumandez, vn 2021 — 7 918 ristitud. Kaik 8 451 eläjad oli lidnas vl 2017. Kaikiš suremb lidnan ristitišt oli 11 tuhad eläjid vozil 1996−2001.

Rahvahad (enamba 0,4 % vl 2021): čuvašalaižed — 66,7 %, venälaižed — 31,1 %, marilaižed — 0,4 %, ukrainalaižed — 0,4 %, toižed rahvahad — 1,4 %.

Ortodoksižen hristanuskondan viž pühäpertid oma kaičenus i saudud lidnas: päjumalanpert', koume jumalanpertid i časoun'. Niišpäi Spasan Toižetamižen päjumalanpert' i Mikoi-arhangelan jumalanpert' oma kaičenus vaiše paloin i ei ole väges.

Openduz

Lapsiden opendusen aluzkundad oma koume nimitadud päivkodid (niišpäi kahtel om kaks' adresad), kaks' keskškolad (nomer 2 i 3), gimnazii nomer 1, lapsiden sädamižen pert', ümbrikon čomamahtoiden škol, sportškol.

Jadrinan agrotehnine tehnikum om lidnan professionaližen opendusen aluzkundaks.

Transport

Avtobusad oma kundaližeks transportaks lidnas.

«Volg»-avtote (M7) mäneb vides kilometras pohjoižhe lidnaspäi.

Galerei

• 
  Lidnan sauvused Eläban Eziauguižen Stroican jumalanpertinnopäi (1829), vn 2018 nägu
• 
  Eläban Eziauguižen Stroican jumalanpert', vn 2025 vai sen aigemba nägu
• 
  Rahalugendan sauvuz vl 2018
• 
  Znam armastuses lidnannoks, 2018
• 
  Jadrinan polkan znam (1776)
• 
  Jadrinan lidnanznam (1859)

Irdkosketused

• Jadrinan municipaližen ümbrikon tobmuden sait (yadrin.cap.ru) (ven.)
• Lidnan informacine sait (yadrin.ru). (ven.)