Šumerl'

Šumerl'
Шумерля (ven.)
Çĕмĕрле (čuv.)
Lidnanznam;	Flag;
Valdkund	Venäma
Eläjiden lugu (2021)	26,873 ristitud
Pind	13,78 km²
Pämez'	Sergei Jargunin; (heinku 2016—)
Telefonkod	+7−83 536-xx-xxx
Avtokod	21, 121
Aigvö	UTC+3 (MSK+0)

Šumerl' (ven.: Шу́мерля, čuv.: Çĕмĕрле) om Venäman lidn da lidnümbrik Čuvašijan Tazovaldkundan päivlaskmas. Se om tazovaldkundan videnz' lidn eläjiden lugun mödhe, om Šumerlin rajonan administrativižeks keskuseks (vspäi 1935), ei mülü rajonha.

Istorii

Nügüdläižen eländpunktan aluz om pandud vl 1916 kuti Šumerl' -raudtestancii da žilo senno «Moskv — Kazan'»-raudten sauvomižes, nimitihe lähižen Šumerl'-külän mödhe. Vl 1930 kätihe Šumerlid radnikžiloks, vn 1937 23. päiväl kezakud anttihe lidnan statusad.

Šumerlin ižandusen päsarakod oma avtosauvomine (avtofurgoniden kombinat^[1], avtod specialiženke konor'anke — sömsija, kirhuližen abun) i sömtegimišt (leibtegim, voitegim, sömkombinat), mugažo omblendfabrik i mebel'fabrik ratas.

Geografijan andmused

Lidn sijadase Sur-jogen (čuv.: Сăр, Volgan oigedpol'ne bassein) oiktal randpolel, koumes kilometras jogespäi, 100 m ü.m.t. keskmäižel korktusel.

Matkad Čeboksarhasai om 85 km pohjoižpäivnouzmha orhal vai 105 km avtotedme. Lähembaižed lidnad oma Kanaš 68 km päivnouzmha orhal, Sergač (Alalidnan agj) 59 km päivlaskmha orhal i Jadrin 60 km pohjoižhe avtotedme.

Klimat om ven kontinentaline. Voden keskmäine lämuz om +3,4 C°, heinkun +18,7 C°, vilukun −12,2 C°. Paneb sadegid 500 mm vodes.

Tobmuz

Šumerl' om lidnümbrikon üks'jäižeks eländpunktaks.

Lidnümbrikon tobmuden pämez' om sen Deputatoiden suiman ezimez'. Lidnan Administracijan pämez' om Eduard Vasil'jev vn 2023 uhokuspäi. Edeližed lidnan Administracijan pämehed oma Valerii Šigašev (semendku 2020 — uhoku 2023), Aleksei Grigorjev (eloku 2017 — keväz'ku 2020).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 31 722 ristitud, vn 2021 — 26 873 ristitud. Kaik 29 553 eläjad oli lidnas vl 2017. Kaikiš suremb lidnan ristitišt oli 42 800 eläjad vl 1992.

Rahvahad (2010): venälaižed — 68 %, čuvašalaižed — 14 %, toižed rahvahad — 18 %.

Ortodoksižen hristanuskondan kaks' jumalanpertid^[2] oma saudud lidnas: Ioann-jumalantedomehen (sauvomine jätktase vspäi 2009) i ph. Serafim Sarovalaižen (om letud vll 1988−1990).

Lapsiden opendusen aluzkundad oma severz'-se päivkodid, nell' keskškolad (nomer 1, 2, 3, 6), gimnazii nomer 8, muzikškol, čomamahtoine škol, sportškol. Šumerlin politehnine tehnikum^[3] om lidnan professionaližen opendusen aluzkundaks.