Innopolis

Innopolis
Иннополис (tot. i ven.)

Valdkund	Venäma
Eläjiden lugu (2021)	3,955 ristitud
Pind	22 km²
Pämez'	Il'dar Huzzätov (reduku 2021—)
Telefonkod	+7−843-xxx-xxxx
Avtokod	16, 116, 716
Aigvö	UTC+3 (MSK+0)

Innopolis (tot.: Иннополис / Innopolis, ven.: Иннопо́лис) om Venäman lidn Tatarstanan Tazovaldkundan päivlaskmas. Se om Üläuslonan rajonan pala da lidnankund, Kazanin kaimdailidn, mülüb sen aglomeracijha.

Istorii

Eländpunktan aluz om pandud vn 2012 9. päiväl kezakud kuti žilo, sai oficiališt statusad da nimitust vn 2013 sulakus. Innopolis om lidnan statusanke vn 2015 auguspäi. Lidn om projektiruidud singapurižel «RSP Architects Planners & Engineers»-kompanijal, sen ristitišton lugumär voib sadas 155 tuhazesai tulebal aigal. Eländpertid i socialine infrastruktur saudas ühten aigan.

Innopolis šingotase erižen ekonomižen «Innopolis»-zonan edheotandoil (sidä kesken tehnoparkas A. Popovan nimed, kahtenz' N. Lobačevskijan nimed om sauvomas vodele 2022), tedon aluzkundoil (privatine Innopolis-universitet), torguindan objektoil, lebun kompanijoil lidnanno (mägisuksed, gol'f, bouling, «Svijažskan kukhad»-kurort, ambundtahond).

Geografijan andmused

Lidn sijadase Kuibiševan vezivaradimen (Volgan vagonke) oiktal randal i randpolel, 53..220 m ü.m.t. korktusil, keskusen korktuz om 200..220 metrad.

Matkad Kazanin röunhasai om 20 km päivnouzmha avtotedme, keskushesai om 40 km päivnouzmha avtotedme, Üläusloni-žilhosai om kümne kilometrad päivnouzmha orhal vai 15 km avtotedme. Amuine Svijažsk-lidnuz om kaičenus sarel kahtes kilometras päivlaskmha lidnaspäi. Toine lähembaine lidn om Zelenodol'sk vižtoštkümnes kilometras lodeheze orhal vai 35 km avtotedme. Volg-avtomagistral' (M7-trass, «Moskv — Uf») ümbärdab lidnad suvipäivnouzmaspäi, sild Volgas päliči om saudud sil kümnes kilometras pohjoižpäivnouzmha lidnan keskusespäi.

Tobmuz

Innopolis om lidnankundan üks'jäižeks eländpunktaks. Lidnankundan pind om 22 km², sidä kesken pertišton pind om 12 km².

Lidnan tobmuden pämez' om sen Radonoigendajan komitetan ohjandai. Edeline lidnan pämez' om Ruslan Šagaleev (kül'mku 2016 — reduku 2021). Rahvahanikoiden suim om lidnankundan käskusenandajaks tobmudeks.

Eläjad

Vl 2020 lidnan registriruidud eläjiden lugu oli 405 ristitud, no kaikenaigaižiden eläjiden lugumär oli 3,7 tuhad ristituid sil-žo vodel, ristitišt päiväl — 5,2 tuhad. Vn 2021 kaiken Venäman rahvahanlugemižen mödhe lidnan eläjiden lugu oli 3 955 ristitud. Kaikiš suremb lidnan ristitišt om nügüd'. Ezmäižiden pertiden faterad oliba anttud kortomha.

Religijan lähembaižed pühäpertid sijadasoiš Svijažsk-žilos (tot.: Зөя) i rajonan äjiš eländpunktoiš.

Nene socialižen infrastrukturan objektad oma avaitud lidnas: päivkodi i rahvahidenkeskeine škol opendusenke koumel kelel (totaran, venän, anglijan), IT-licei internatanke lahjoitud lapsiden täht, medicinine keskuz, počtan palakund, kovorking, koume supermarketad, hobbikeskuz, sportkompleks 0,9 ga pindal basseinanke i zaloidenke sportansuguidme, lidnanstadion.

Galerei

• 
  Innopolis-universitetan i sen kollegijan nägu (2016)
• 
  Medicinine keskuz (2016)
• 
  Tehnopark A. Popovan nimed (2015)
• 
  IT-licei (2016)
• 
  Sportkompleks vl 2016

Irdkosketused

• Municipaližen «Innopolis-lidn»-ühtnikan oficialine sait (innopolis.ru). (ven.) (angl.) (tot.)