Menzelinsk

Menzelinsk
Мензелинск (ven.)
Минзәлә / Minzәlә (tot.)
	Lidnanznam;
Valdkund	Venäma
Eläjiden lugu (2021)	16,008 ristitud
Pämez'	Aidar Salahov; (sügüz'ku 2013—)
Telefonkod	+7−85 555-xx-xxx
Avtokod	16, 116, 716
Aigvö	UTC+3 (MSK+0)

Menzelinsk (ven.: Мензели́нск, tot.: Минзәлә / Minzәlә) om Venäman lidn da lidnankund Tatarstanan Tazovaldkundan pohjoižpäivnouzmas. Se om Menzelinskan rajonan administrativine keskuz i üks'jäine lidn.

Istorii

Eländpunktan aluz om pandud 16.−17. voz'sadoil kuti kaičendlidnuz kalaidajiden rahvahiden hogahtusespäi. Nimitihe jogen mödhe. Žilo lidnusenke saiba makundan lidnan statusad vl 1781.

Menzelinsk šingotase sömtegimištol (südäiveded, mineraline vezi), sauvondal, avtotransportan i maižanduztehnikan kohendusen edheotandoil, meblin tehmižel lapsiden täht.

Geografijan andmused

Lidn sijadase rajonan pohjoižes, läz Menzel'-jogensud (tot.: Минзәлә, ven.: Мензеля, 123 km pitte), Kamanjogen hural randpolel (Alakaman vezivaradim), 90 m keskmäižel korktusel valdmeren pindan päl.

Matkad Kazanihesai om 292 km päivlaskmha. Lähembaine järed lidn om Jarčalli vižkümnes kilometras päivlaskmha «Volg»-avtotedme (M7), trass om lidnan suvipäivlaskmaižeks röunaks.

Tobmuz

Menzelinsk om lidnankundan üks'jäižeks eländpunktaks.

Lidnankundan tobmuden pämez' om sen nevondkundan ezimez'. Lidnan radonoigendajan komitetan pämez' om Ramil' Šaisuvarov vn 2021 kül'mkuspäi. Edeline radonoigendajan komitetan pämez' om Ramil' Jagafarov, radoi vn 2021 kül'mkuhusai.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 16 476 ristitud, rajonan ristitišton koume videndest, vn 2021 — 16 008 ristitud. Vl 1979 i vspäi 2002 om enamba mi 16 tuhad eläjid, kaikiš suremb ristitišt oli 17 153 eläjad vl 2017.

Rahvahad (enamba 1 % vn 2002 rahvahanlugemižen mödhe): venälaižed — 50,2 %, totarlaižed — 45,2 %, marilaižed — 1,7 %, toižed rahvahad — 2,9 %.

Islaman kaks' pühäpertid oma avaitud: pämečet' i vn 2012 mečet' M7-trassanno. Ortodoksižen hristanuskondan nell' pühäpertid^[1] oma kaičenus i saudud lidnas: ph. Mikulai-čudonsädajan päjumalanpert', kaks' jumalanpertid, mugažo Illä-endustajan naižjumalankodin (1860) sauvused oma kaičenus.

Openduz

Lapsiden opendusen aluzkundad oma päivkodid, koume keskškolad (nomer 1, 2, 3), gimnazii, Menzelinskan škol-internat armotomiden i tervhuden röunatud voimusidenke lapsiden täht, lapsiden sädamižen pert', čomamahtoiden škol, kaks' sportškolad («Olimp» i «Jubileinii»).

Menzelinskan maižanduztehnikum^[2], pedagogine kolledž^[3] i medicinine škol^[4] oma lidnan professionaližen opendusen aluzkundoikš.

Galerei

Lidnan i rajonan tobmuden sauvuz (2021, ende A. Pasmurov-torgovanan pert')
Islaman pämečet', vn 2021 nägu
Ph. Mikulai-čudonsädajan päjumalanpert', vn 2021 nägu
Pedagogine kolledž Musa Džalilän nimed hänen muzejanke (2021)
Menzelinskan dramteatr vl 2021

Homaičendad

↑ Menzelinskan pühäpertid sobory.ru-saital. (ven.)
↑ Menzelinskan maižanduztehnikum edu.tatar.ru-saital. (ven.) (tot.)
↑ Menzelinskan pedagogine kolledž edu.tatar.ru-saital. (ven.) (tot.)
↑ Menzelinskan medicinine škol edu.tatar.ru-saital. (ven.) (tot.)

Irdkosketused

Menzelinsk Vikiaitas

	Tatarstanan Tazovaldkundan lidnad
	Agriz \| Al'met'jevsk \| Arsk \| Aznakajevo \| Bavli \| Bolgar \| Bugul'm \| Buinsk \| Čistopol' \| Innopolis \| Jarčalli \| Jelabug \| Kazan' \| Kukmor \| Laiševo \| Leninogorsk \| Mamadiš \| Mendelejevsk \| Menzelinsk \| Nižnekamsk \| Nurlat \| Zainsk \| Zelenodol'sk \| Tetüši

[1] Menzelinskan pühäpertid sobory.ru-saital. (ven.)

[2] Menzelinskan maižanduztehnikum edu.tatar.ru-saital. (ven.) (tot.)

[3] Menzelinskan pedagogine kolledž edu.tatar.ru-saital. (ven.) (tot.)

[4] Menzelinskan medicinine škol edu.tatar.ru-saital. (ven.) (tot.)

[1]

[2]

[3]

[4]