Čistopol'

Čistopol'
Чистополь (ven.)
Чистай / Çistay (tot.)

Lidnanznam	Flag
Valdkund	Venäma
Eläjiden lugu (2021)	58,815 ristitud
Pind	19,24 km²
Pämez'	Dmitrii Ivanov (reduku 2014—)
Telefonkod	+7−84 342-xx-xxx
Avtokod	16, 116, 716
Aigvö	UTC+3 (MSK+0)

Čistopol' (tot.: Чистай / Çistay, ven.: Чи́стополь) om Venäman lidn Tatarstanan Tazovaldkundan keskuses. Om Čistopolin rajonan administrativine keskuz, vspäi 2011 mülüb rajonha lidnankundaks.

Istorii

Eländpunktan aluz om pandud 17-18. voz'sadal kuti Čistoje Pole-žilo. Se sai makundan lidnan statusad vl 1781 udenke nügüdläiženke nimenke.

Čistopolin ižandusen päsarakod oma sömtegimišt (maidkombinat) da omblendtegimišt, mugažo časuidentegim i laivoiden kohendusen tegim, avtomašiništon edheotandad oma olmas.

Geografijan andmused

Lidnan sijaduz rajonas i tazovaldkundas vn 2010 kartal

Lidn sijadase Kamanjogen hural randal (Kuibiševan vezivaradim), 100 m keskmäižel korktusel valdmeren pindan päl.

Matkad Kazanihesai om 103 km lodeheze orhal vai 130 km avtotedme. Lähembaižed lidnad oma Mamadiš kuz'kümnes kilometras pohjožpäivnouzmha orhal vai 220 km avtotedme, Nižnekamsk 105 km pohjožpäivnouzmha avtotedme i Laiševo 85 km päivlaskmha avtotedme.

Klimat om ven kontinentaline. Voden keskmäine lämuz om +4,1 C°, kezakun-elokun +17,7..+20,3 C°, tal'vkun-uhokun −10,1..−10,9 C°. Il'man keskmäine vozne relätivine nepsuz om 69,8 %.

Tobmuz

Čistopol' om lidnankundan üks'jäižeks eländpunktaks.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 60 755 ristitud, se om rajonan ristitišton koume nelländest, vn 2021 — 58 815 ristitud. Kaik 60 564 eläjad oli lidnas vl 2017. Kaikiš suremb lidnan ristitišt oli 67 500 eläjad vl 1996.

Rahvahad (enamba 1 % vn 2002 rahvahanlugemižen mödhe, ozutadud rahvahudenke): venälaižed — 62,6 %, totarlaižed — 32,8 %, čuvašalaižed — 2,3 %, toižed rahvahad — 2,3 %.

Islaman kuz' pühäpertid oma avaitud lidnas: Ezmäine pämečet', «Munir», «Iman», «Anas», «Ihlas», «Eniler». Ortodoksižen hristanuskondan 17 pühäpertid oma olmas: ph. Mikulai-čudonsädajan kafedraline päjumalanpert' (1838), kuz' jumalanpertid, koume loičendpertid, koume časounäd, mugažo vanhuskolaižiden koume loičendpertid oma lidnas i Jumalanmaman Emäganpäivän naižjumalankodin sauvused (1864−1879) oma kaičenus.

Openduz

Lapsiden opendusen aluzkundad oma päivkodid, aluzškol (nomer 6), nell' keskškolad (nomer 1, 4, 5, 16), kaks' liceid (nomer 1 i 2), koume gimnazijad (nomer 1, 2, 3), Čistopolin kadetine škol-internat, škol nomer 10 lapsiden täht tervhuden röunatud voimusidenke, lapsiden sädamižen pert', čomamahtoiden škol, kaks' sportškolad («Batir», «Lider»).

Kaik kaks' professionaližen opendusen sijališt aluzkundad om lidnas: maižanduztehnikum i medicinine škol. Enzne äiprofil'ne kolledž om ühtištadud maižanduztehnikumanke vn 2021 sügüz'kule. Kazanin üläopendusen aluzkundoiden kaks' filialad oma avaitud.

Galerei

• 
  Käskuzkundoiden pert' (2020, ende gorispolkom, Adivpertin tanaz)
• 
  «Iman»-mečet', vn 2011 nägu
• 
  Ph. Mikulai-čudonsädajan kafedraline päjumalanpert' Kaman randal, vn 2021 nägu
• 
  «Vostok»-časuidentegim vl 2011 (Päivnouzm)
• 
  Gimnazii nomer 1 (2016, ende hengeline škol)
• 
  Nevondkundaline lidnanznam (1967)

Irdkosketused

• Lidnan da Čistopolin rajonan oficialine sait (chistopol.tatarstan.ru) Tatarstanan Tazovaldkundan tobmuden aluzkundoiden portalal. (tot.) (ven.)