Mamadiš

Mamadiš
Мамадыш (ven.)
Мамадыш / Mamadış (tot.)
	Lidnanznam;
Valdkund	Venäma
Eläjiden lugu (2021)	15,726 ristitud
Pind	15 km²
Pämez'	Vadim Nikitin; (sügüz'ku 2024—)
Telefonkod	+7−85 563-xx-xxx
Avtokod	16, 116, 716
Aigvö	UTC+3 (MSK+0)

Mamadiš (ven.: Мамады́ш, tot.: Мамадыш / Mamadış) om Venäman lidn da lidnankund Tatarstanan Tazovaldkundan pohjoižes. Se om Mamadišan rajonan administrativine keskuz da üks'jäine lidn.

Istorii

Nügüd'aigaižen eländpunktan aluz om pandud vl 1613 kuti Troickoje-Mamadiš-žilo jumalankodin seiniden taga. Žilo sai lidnan statusad vl 1781 nügüdläiženke nimenke.

Mamadišan ižandusen päsarak om sömtegimišt (maid-, liha- i kalaproduktad, maploduiden, marjoiden i meden konservtegim), mugažo savičuntegim om saudud i himijan edheotand maižandusen kazmusiden da živatoiden täht.

Geografijan andmused

Lidn sijadase Vätk-jogen oiktal randal (Kamanjogen oiged ližajogi) läz Ošm-jogensus, 80 m ü.m.t. keskmäižel korktusel.

Matkad Kazanihesai om 167 km päivlaskmha «Volg»-avtotedme (M7). Lähembaižed sured lidnad oma Nižnekamsk 27 km suvipäivnouzmha orhal (Kaman hura randpol') i Jarčalli 62 km päivnouzmha orhal.

Tobmuz

Mamadiš om lidnankundan üks'jäižeks eländpunktaks.

Lidnankundan tobmuden pämez' om sen Nevondkundan ezimez'. Edeline Nevondkundan ezimez' om Anatolii Ivanov (2010 — kezaku 2024). Lidnan Radonoigendajan komitetan ohjandai om Rašit Garipov vn 2008 kezakuspäi.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 14 435 ristitud, rajonan ristitišton koumandez, vn 2021 — 15 726 ristitud. Kaik 15 699 eläjad oli lidnas vl 2017. Kaikiš suremb lidnan ristitišt oli 15 880 eläjad vl 2020.

Rahvahad (enamba 1 % vn 2002 rahvahanlugemižen mödhe): totarlaižed — 65,3 %, venälaižed — 30,1 %, toižed rahvahad — 4,6 %.

Islaman koume mečetid oma avaitud: «Izge Nur», Keskuzline i «Galiulla»^[1]. Ortodoksižen hristanuskondan nell' pühäpertid^[2] oma kaičenus i saudud lidnas: Eläban Eziauguižen Stroican päjumalanpert' (om udessündutadud vll 2018−2021), ph. Ksenijan jumalanpert' (om letud vll 1876−1882), kaks' časounäd.

Lapsiden opendusen aluzkundad oma severz'-se päivkodid, koume keskškolad (nomer 1, 3, 4), licei (nomer 2), specialine (korrekcine) škol-internat VIII toižendan, čomamahtoiden škol, lapsiden da norišton koume sportškolad («Olimp», borcuindas, hokkejas i figurštargundas). Mamadišan politehnine kolledž^[3] om lidnan professionaližen opendusen aluzkundaks.

Homaičendad

↑ Mamadišan pühäpertid bogiisus.com-saital. (ven.)
↑ Mamadišan pühäpertid sobory.ru-saital. (ven.)
↑ Mamadišan politehnine kolledž edu.tatar.ru-saital. (ven.) (tot.)

Irdkosketused

Lidnan i sen rajonan mamadysh.tatarstan.ru-sait Tatarstanan Tazovaldkundan tobmuden portalal. (tot.) (ven.)

Mamadiš Vikiaitas

	Tatarstanan Tazovaldkundan lidnad
	Agriz \| Al'met'jevsk \| Arsk \| Aznakajevo \| Bavli \| Bolgar \| Bugul'm \| Buinsk \| Čistopol' \| Innopolis \| Jarčalli \| Jelabug \| Kazan' \| Kukmor \| Laiševo \| Leninogorsk \| Mamadiš \| Mendelejevsk \| Menzelinsk \| Nižnekamsk \| Nurlat \| Zainsk \| Zelenodol'sk \| Tetüši

[1] Mamadišan pühäpertid bogiisus.com-saital. (ven.)

[2] Mamadišan pühäpertid sobory.ru-saital. (ven.)

[3] Mamadišan politehnine kolledž edu.tatar.ru-saital. (ven.) (tot.)

[1]

[2]

[3]